Christmas Outreach Program: JAN. 8-AH PAWH KRISMAS KAN LA HMANG!

(Krismas awmzia leh Kristiante thurin laimu inngahna dik tak chu "Pathian kan hnena awm" (Emmanuela) tihna a ni)

Vawiin Jan. 2, 2022-ah pawh Cambodia ramah chuan hmun/khaw ṭhenkhatah Krismas hman a la ni a, keini pawhin Tropeang Amnuek khua, Kampot province-ah hun kan la hmang cheu!

Ka zin leh awm mekna Tonluab khua, Takeo province aṭanga 103km vela hla a ni a, nizanah ka ṭawnglettu ber Pastor Souey Lak chuan motorbike-a kal tur angin min hrilh a, motor hman tur a awm a ring chiah lo va, niminah 60km vela Krismas hmanna pakhat chu motorbike-a inphur chu ka dar veilam herh indim deuh a la ngaih vangin ka ṭhulhsan a, a nupui nen an kal thung.

Vawiin chu motorbike-a kal ngei tura kan inrin laiin, a kohhran member Taxi Van secondhand nei chuan a rawn thawh thei hlauh mai a, a nupui leh fate leh Upa pahnih leh Tonluab khuaa Police hotu (Kristian an la ni lo), an chhungkaw ṭha nupa leh American David te nen kan kalho va, kan Krismas hmanna tur khua chu dar 12 noon rik hma deuhvin kan thleng a, dar 2pm-ah hun hmangin, dar 5pm velah Arsa leh Vawksa buh hawp, sawhchiar aia tuiril deuh an siam kan ei a, kan hlimin kan puar ve viau zel mai. Zan dar 9pm-ah dam takin Tonluab village, Takeo province kan thleng ve leh. Vawiin Krismas hmannaa lo tel chu ka chhiar chinah naupang 43, puitling 70 (total 103) kan ni. Hmun danga Krismas kan hmanna ang lo takin, Buddhist an tlem thung a, Kristian ni sa deuh vek, mahse, "Ringthar" tihtur ang chi an tam ber niin, Pastor Lak chuan min hrilh.

Nuho leh naupang ṭhenkhat an zai a, naupang ṭhenkhat chu Western hla leh music play-in an lam rem ve a, sound system/box a ṭha thei bawk a, mit leh beng a tlai ṭhin. Naupanghoten phur tak maia an tihtur/chanvo tiin, an han zai lam ve te te hmuh chuan a hlimawmzual. Chung naupanghote chu hun lo kal tur (next generation) atana Cambodia beiseina leh Pathian ram leh kohhran din nghehna tur hmanraw pawimawh tak an ni si a... Program kan hman zawh lamah, Pastor leh an nupuite leh hruaitu mi 15 vel chu platform-ah min ko chhuak a, min lam (dance)-hotir nghe nghe.

DAVID-AN A RI–A ṬAWNGṬAI RUAL A HRETHIAM LO!

Kal lamah chuan, mi 15 ṭhut theihna Taxi Van chhungah chuan Pastor Lak-a nupuiin ṭawngṭai rual a rawt angin, kan ṭawngṭai rual a. Kan ṭawngṭai rual hma chuan ka ding lama pa lianpui mai American David chuan, India ram zin a chakzia leh US chanchin, an awmna state Minnesota vawhzia leh US politics te sawiin, Donald Trump-a auhla " Make America Great Again" (MAGA) pawimawhzia te, America ramin Bible enin kawng dik lo a zawh meka a hriat dante chu tui takin a sawi a, a changin kan nui dun a. Keiin Mizo leh Mizoram/India chanchin ka hrilh nual bawk a, mak a ti thei hle. "Indian tak i ang lo, i ṭawng zawngin i kutin zaizirin thu i sawi vak ngai lo," tiin amah chuan Vaiho tihdante zirin, " Namaste" tih chu US-a Vai pakhat aṭanga lo hre tawhin, a Hindi ṭawng thiamchhun a ni. Kan ṭawngṭai rual lai chuan American pa lian pui David chu a ngawi kur reng mai a!

Ṭawngṭairual a zawh chuan, "Tuna mi ang tho khan in hnam, Mizo/Indian te chuan in ti ve ṭhin em ni?" tiin mak tih hmel deuhvin min zawt khauh mai a, kei chuan rang deuhvin, "Inang fo e, hetianga ṭawngṭairual hi kan ching a lawm," ka tih chuan a nui suk a, mak a tih hmel kher mai. "Engah nge, mak i ti viau e law? Eng nge i ngaihdan?" tiin ka zawt let thung a. Min chhanna chu Pastor Lak nen chuan kan nuihpui nasain, kan hlimpui hle. Pu David chuan, " Confusing" (Hriatthiam harsa) tiin min chhang! Fiamthu ti takin, "Khatiang ri mur mura ṭawngṭai chu Pathian tan pawh hriatthiam a harsa thei ang e!?" a tih phei chuan nuih a tizazual.

Asian hote leh Western hote rilru sûkthlêk leh ngaihdan hi a lo danglam daih fo hi a lo ni a! David chuan, "Hetiang group angah chuan mimal kha an inṭawngṭai chhawk ṭhin a, a fel thliam mai asin," a la ti ta deuh deuh va! "US-ah chuan group anga Bible Study neihte hian, Bible chang kha an inchhiar chhawkin, an rilrua Pathianin thu a sawi ang ṭheuh kha mimal tinin an sawi ṭhin a. Cambodia leh Asia ramah chuan mi pakhatin a sawi ṭeuh va, midang an ngawi reng mai a..." a ti sam leh et a. Asia mite leh Khawthlang hoten Pathian kan biak leh chawimawi duhdan chu a inang lo fo dawn a lo niawm asin maw le!

BLACK CHICKEN SA A TUI BIK AN TI!

Kan Krismas hmanna tur khua kan thlen chuan Nuho fatu leh pa ṭhenkhat chu phone camera-in thla ka laksak chuan, "He pa hi eng hnam nge?" tiin mak ti deuhvin an inzawt vel a! Pakhatin "Indian" a tih chuan mak an ti a, an nui deuh hak a! Kan Indian (Vaiho) puite an hmuh ṭhin hmel nen kan lo inang lo deuh ṭhin a ni ang e, "Indian ka ni," tih pawhin dawt sawiah min puh/ngai letling zawk fo mai! Chuvangin a chang chuan "Khmer/Cambodian ka nih hi," ka tih khum ṭhin a, mahse, kan chezia leh aw ki/ṭawng aṭangin an hre hrang leh si ṭhin.

Kan chhun chawfak tur an lo siamah chuan Arsa an lo chhum a, a bawp ruh kan ei chu a ti leh ruh ṭhenkhat a lo dum deuh ka hmu a, a rukin an vuak silna a ni ang, tiin ei duh lovin ka thlengah chuan paih turin ka dah ru deuh va, mahse, Pastor Lak chuan a titi pahin, "Kan chaw hmeh hi Arsa dum chi (Black Chicken) a nih hi. Hetiang arsa hi a tui bikin a chak bik a, Ar váng tak a ni. Kan PM pawhin hetiang ar dum sa tuihang hi a duh ber," a tih chuan mak ka ti hle a, chutianga Ar dum bik awm ka hriat loh vang a ni. Ka han zawt chiang a, a sa pawh a to bikin 1kg chu USD 10 dawn a nih thu leh Black Chicken chu a lian lutuk ngai lo va, 1kg aia rit an awm meuh lo, a ti. Ar dum satliah ni ringawt lovin, a sa ṭhenkhat leh ruh thenkhat a dum a, an ke (leg) a dum ngei ngei ṭhin niin a sawi. Cambodian-ho hi SE Asia rama hnam upa inti an ni a, tun hma aṭanga an hnam thil chîn (traditional) vawnhim mak tihtur hi an nei nual.

Vawiinah Ar til lak farm min tlawhpui bawk a! Vawkte til an la ṭhin tih chu ka hria a, Ar til reh (circumcise) kher kher chu ka vawi khat hriatna a ni leh bawk!

Zanah Chum Kiri District, Kampot province aṭanga Kirivong District, Takeo province (Cambodia leh Vietnam inrina bul) kan kal lai chuan Pastor Lak chuan, "Vawiinah pawh kan ṭhian Pastor ṭhenkhatin Krismas an hmang a, tunah chuan Bon Noel (Merry Christmas) tih chu kan mipui Buddhist hote zingah a lar ta hle a ni. Sumdawngmi leh sorkar hnathawkte pawhin "Merry Christmas" hunah bungraw SALE tiin, 'Chuti zata man tihhniam (discount) a ni,' tiin TV, Social Media leh telephone aṭangin an infak reng tawh mai a! Tun hmaa Cambodian zinga Krismas hre ngai lote pawhin, a hming na na na chu an hre bel chho hle a ni. Mahse, a awmzia leh ṭobul hria erawh an tlem hle si," a ti.

Cambodia ramah Dec. thla a lo kai tawh ek ek chuan, Kristian fahrah tak takten an khuaah an ṭhenrual ṭha leh chhungte – Buddhist hote nen Krismas hmanho ngeite an duh ve ṭhin a, rin aiin kum khatah Krismas program a hman tam theih duh phian! Chu bakah, kohhran ṭhenkhat hruaitute chuan an Cell group/House Church neihna hmun leh khuaah te Krismas hmanpui ngei an duh ṭhin avangin, khaw hrang hrang leh hnum hrang hrangah Dec-Jan 10 inkar hi chuan Krismas hmanpuiin an hmanhlel a, mawng vawm ba ang sekin an virbuai ṭhin. Tin, Dec 25 hrim hrim hi an ram Holidays list-ah a la inziak chhin ve eih lo bawk.

Engpawhnise, heti khawpa a pianni leh thla khawvelin nghakhlel a, mihringten Birthday kan lawm nasat ber leh sakhaw hrang hrang vuantute pawhin an hriat lar em em, "Dec 25 - Krismas Ni" hmanna tura mite thinlung hipkhawm leh fawkkhawmtu Isua Krista hi chu, "Buaipui tham, nunpui tham, hlimpui tham leh ṭahpui tham Isua" a lo ni ngei e!

- CT Lalrinawma