Khawtlang hruaitu ṭha

Inthlan kum a ni a, kum tir aṭangin political party te in­hnial thawm kan hre nghal a, inthlan a hnai telh telh a, an inbei na telh telh a.

Sorkar duh khawp lote'n ram hruaitu ṭha kan mamawh thu an aupui a, politician lamin mipui ṭha an pawimawh an ti thung a. Enga pawh ni se, tun ṭum chu kan ramin khawtlang hruaitu ṭha kan mamawh thu hi ka'n thailang ve ang e.

Hmanni deuh khan chanchinbu pa­khat thuziak social media-a an thehdarhah rangkachak tawlhruk man thu leh leh a tawlhrutu chu Group YMA pakhat hruaitu a nih thu a lang a. Kha thil ka hmuh khan mak tiin ka phu deuh zawk a, chutih rual chuan kan khawtlang hruaituteah hian sum thianghlim lo uma a ruka rala thil ti duh an tamzia min hriat chhuah tir a ni.

Hman deuh khan Local Council member pakhat chu khehpuam tawlhruk avangin man a nih thu chanchinbu-ah leh TV-ah kan hmu a, YMA hruaitu pakhat a rangkachak tawlhruk suam a nih thu kan hre tawh bawk. Veng pakhat YMA Kumpuan hruaitu heroin lo tawlhru man an nih thu te, police leh excise mi ngei an thil man sa lo hralhru duh pawh an awm ni-a sawi a ni bawk.

Ram hruaitu kan tihte hi chu politician, an thusawi ngeite pawh anmahniin an awih loh tur sawi mai ṭhin an ni a, lo ṭha lo deuh mahse, a mak lo a tih theih a. Khawtlang hruaitu, tlawmngai tura mi­puiin kan awmna veng ṭheuha kan thlan chhuah, mi pangngai leh fel tak tura kan ngaihte'n sorkar leh ram dan phal loh thil an lo ti ṭhin hian rilru a ti nat bakah hetiang mi in kan khawtlang an kaihhruai chuan kan khawtlang chu a va ngaihtuah awm dawn em ka ti a ni.

Local Council hruai­tu in ruihhlo hlauh­awm a tawlh ru duh a nih a, sum hmuh­na tur a nih chuan a aia hlauhawm, a kaih­hruai khawtlang chhiatna tur pawh ni se, amahin hlawkna a tel a nih chuan a tizel duhin a rinawm a, YMA hruaitute'n rangkachak tawlh ru-in dik lo leh thianghlim lo takin sum an hailut duh a nih chuan YMA sumte pawh an eiru duhin a rinawm a, sum hailuhna awlsam leh dik lo dangte pawh an hmuh remchan chuan an tizel duh dawn tih a chiang reng.

Hetiang mite hian kan khawtlang hi an kaihhruai kan phal tur a ni lo. Hetiang mi khawtlang hruaitu-a nei vengte chu an ngaih­tuahawm awm mang e ka ti a, an awm­na venga mi ṭha tam takte chu an zak awm mang e ka ti ṭhin. Haw u, heng mi dik lo te hi i hnawl ngam ang u, kan khawtlangah hetiang mi te hi i ti­tlangnel lo ang u.

An sum leh pai neihin khawtlangah tlangnel tumin rawn thawh ṭhin mahse, i hnar ngam ang u. Hetiang mi khawtlanga an tlangnel nana lo kawm tlangnel ṭhinte pawh hi i hnawl ngam ang u. Kan khawtlang hi a thianghlim loh chuan kan tu leh fate an ngaihtuahawm lutuk ang.

Kohhrante pawh­in hetiang mi hi kan Kohhranah an awm a nih chuan rawng­bawlna i chelhtir lo ngam ang u. Hetiang mi, mi dik lo, dik lo taka sum hai luh hreh lo te'n rawngbawlna ki pawimawh an chelh chhung chuan kan Kohhran rawngbawlna a nung thei lo ang a, Kohhrana mi tel tura kan sawm khawm aiin kan tidarh palh ang tih a hlauhawm.

- Lalramnghaka Sailo