Party chhung a war awm ṭan ta

Congress hian an MLA nilai pahnih hi an khawi ngam hleithei lo tih a ni. MNF-ah hian MLA candidate nih inchuh an intai ṭan an ti. ZPM hian a tira an beisei aiin candidate tur an hmu ṭha leh si lova, tunah hian patuai deuh deuhin an inchuh mek an ti. BJP leh PRISM hi chu titiah an lang phak tawh vak lo a nih hmel.

Congress-ah hian han sawi ta bawl bawl mai ila. Khawzawl - Khawhai lama an MLA hi Congress President khan hman deuhah tawh khan MLA candidate a nih leh tur thu kha a sawi mauh mai a, he MLA hi a hmaa Minister ni ṭhin an chawlh tir tak kha a nih vangin party hotute chungah hian a lawm vak lo niin an sawi a, MNF lama MLA-te nen pawh chaw an ei khawm zauh zauh an ti. Heti chung hian Congress chhuahsan hi a ngam chiah si lova, Congress hian candidate hual dang an nei bawk si lova, chuvangin Congress hi an buai ru hle an ti.

Congress MLA zinga a zawna tlingah chuan senior ber chu Saitual lama mi khi a ni a, ani hian Saitual bialah din a tum tawh loh thu a sawi a, amah leh party a buai zo ta. Ani hian a dinna tur bial a melh kual nasa hle niin an sawi. Ramhlun lamah a leng hmasa a, Durtlang lamah a chho leh a, Champhai thlengin a kal a, tunah hi chuan Hmar hnam awm bitna lamah a zin ngun deuh ber an ti.

A kalna apiangah hian an MLA neih sa leh MLA beisei dangte nen an inmelh rum viau zel an ti. Lunglei lama Congress MLA pawh amah rawn lovin a damloh hlanin amah thlak theitu an lawm lut a, a dam ṭha leh deuh tawh nen a lawm lo an ti.

MNF hian candidate tur hi an set fel hma khawp mai a, set fel lohna bial an neih hi chu an buai rukna bial niin an sawi. Tunah hian Ramthar - Ramhlun South - Ramhlun North pa hian seat pakhat an inchuh mek a, a senior ber Ramthar Veng pa hian Hnam Run lamah thlawptu a nei ngah ber a, chutihlaiin MNF President lama va zualkoa an MP hlui paih tum ngar ngar pawl hi an awm ve bawk an ti. Aizawl tlak lama an MLA thawm ring ber hi a bialah AMC inthlan hnuhnung belhkhawmah khan a party-in vote an hmu chhe hle a, Congress lama MLA nih chak hian a awm chilh ve reng bawk si a, a thla a muang lo hle niin an sawi tel bawk.

MNF Vice President leh Home Minister hlui hian tunah pawh Khawzawl lam hi a tlanchhiat san leh deuh roh a, kalna tur tak a la van a. Khawzawlah hian a kir leh nge nge dawn niin an sawi ve leh bawk a; mahse Khawzawl pa MNF ticket chan inbeisei hi a lungawi bik lo an tih chu. MNF lam CM candidate hi chu a dinna tur a chiang tawh a, a tira a duh ber ni lovin an sawi hmuhna lamah a kal a, a luh tirh aiin a phur lo niin an sawi. Bajaj Allianz lama sawi ve hat kai tawh hi chuan din a tum lo an ti.

ZPM hian sorkar an inbeisei tawh lo law law a, MLA tlem azawng neih chiah an sawi ri ngam tawh an ti. ZPM ṭhatna sawi aiin tunah chuan an elpui phak deuh MNF chhiatna sawi leh a mawi tawka Congress khak zauh zauh hi an thiam tawk niin an sawi. ZNP leh MPC party inkhak zauh zauh erawh a reh ṭan a, an inlungrual phian tawh a, an boruak erawh an beisei angin a lian tual tual lem lo an ti.

- Lalchhandama (Dama)