Tu nge i thlan dawn le?

Mizoram Legis­la­tive Assembly inthlan­pui kan hnaih leh ta hle mai. Political party-te pawh mei kawhin an ṭang chho mek zel a; party-a inlawm luh thawm pawh hriat tur a tam leh ta. Thu dik te, thu dik tluantling lo te, thu dik lote hmangin politician-te'n thu an vai vir chho leh ngei dawn. Chu'ng zawng zawng karah chuan, ram hmasawnna leh tlukchhiat theihna a ni tih hriain, mipuite'n rilru fím tak kan put a, ram hruaitu tur kan thlan a pawimawh hle dawn a ni.

Kan hriat angin, kumin 2018-a inthlan­puiah hian pawl hlawm lian tak pathum - Congress party, MNF party leh ṭangrual pawl invuah Zoram Peoples' Movement (ZPM)-te hi a inbei ber tura ngaih an ni a. Chutih rualin, mahni pawl member-te aṭang ngau ngau chuan a eng pawl mah hian sorkarna an siam zo lo vekin a rinawm a; party bik nei lo, neutral-te hi an pawimawh viau ngei ang.

Sorkar lai Congress party hi pawl hlâwm lian ber leh sorkar leh tura mi rin ber an la ni mai thei a. Chutih rualin, tun hma deuh aṭanga Mizo mipuite'n kan ngaihtuah chian loh fo chu, sorkarna chelh tura ṭha kan tihte aia sorkar tura rin kan thlang leh ṭhin hi a ni. Congress party chungchangah pawh, an sorkar rin vanga thlang loin, ṭha kan tih vanga thlang i ni ang u.

Kan hriat atana ṭha chu, kan biala Cong­ress candidate kan vote hian, Pu Lal Thanhawla kan vote tel a ni tih hria ila; chutiang bawkin, MNF candidate kan vote a nih chuan Pu Zoramthanga kan vote tel a, ZPM candidate kan vote a nih chuan Pu Lalduhoma kan vote tel a ni tih hi a ni.

Sorkarna chelh zui turin Congress party kan duh a nih chuan thlang mai ila, kan duh lo a nih erawh chuan thlang lo ngam ang u hmiang. Pu Lal Thanhawla hi Chief Minister la ni zui zel turin i la duh a nih chuan Congress candidate vote mai rawh; i duh lo a nih chuan vote suh. Congress party-in sorkarna chang tawh lo se i duh a, CM atan Pu Lal Thanhawla i duh tawh lo ni ta se, eng pawl nge sorkar tura i duh a, tu nge CM atan i duh?

Congress party leh Pu Lal Thanhawla thlak nan MNF leh Pu Zoramthanga i duh em? I duh a nih chuan vote mai la, i duh lo a nih erawh chuan vote lo mai rawh. Sorkar turin MNF leh CM turin Pu Zoramthanga i la duh lo leh zel a nih chuan, tu nge duh thlan tur (option) la awm ngaituah la; chu chu thlan mai tur a ni.

Congress party/ Pu Lal Thanhawla leh MNF/Pu Zoramthanga duh lo ve ve tana duh thlan tur la awm leh thei chu ZPM an ni a, CM atana an zawrh chu Pu Lalduhoma, ZNP President a ni. Sorkarna siam turin ZPM i duh a nih chuan in khua/veng awmna biala ZPM candidate vote mai la, CM atan Lalduhoma i duh chuan a awmna ZPM chu vote mai tur a ni.

ZPM leh Pu Lal­duhoma i la duh lo leh zel a nih chuan, BJP leh PRISM-te pawh an la awm a; anni pawh hi vote theih an ni bawk.

Ka sawi tum ber chu, tun ṭum inthlanah hian 'Tling tura kan rin ni loin, mi ṭha nia kan hriat, kan ram hruai tura kan duhte in thlang ang u,' tih hi a ni. Ram hruai tura ṭha kan tih ber ni lem lo, tling tura kan rin kan thlan hian ram hmasawnna nasa takin a tiṭhanṭhu thei tih hria ila; a/an tlin kan ring chiah lo a nih pawhin, ṭha kan tih chu vote mai nachang hriat a hun tawh.

I kutah, kan kutah hian kan ram hma lam hun thui tak a innghat ve a ni tih hriain, kan ram tana ṭha ber tur thlang turin rilru siam ila, i inbuatsaih ang u hmiang!

- K. Zoramchhana