DC khing ngam awmna ram

Tunlaia titi lian ber Champhai DC Pi Maria CT Zuali laka FIR thehluh chungchang hi ka thiam ang tawk tawkin ka lo chai ve a. Zonet TV lamin Pi Maria an interview leh Ruatfela Nu an interview kha ka lo en chhuak ve leh dap bawk a. Chuta lang chiang em em chu kan Police lam hian Kuhva tawlh ruk man hi an phur vak lova, kan kawngpui lun laiah ualau takin kuhva tawlh 'ru' ni si hi an phur muah muah a, chu mite chuan Champhai DC lakah FIR an thehlut ta a ni.

Dan bawhchhetuten "A hlawk avangin an thik a ni," tia kuhva tawlhtu mi tlemte leh truck neituten thil dik duh Mizoram mipui min han challenge let ngam ta hial mai hi chu a dik thei hlawl lo a ni.

Ruatfela Nu khan chiang tak leh huaisen takin Police lam kha a rawn dem ngam a, kha khan thil hriat a nei ngei ang tih a chiang. He ramah hian min vengtu tura kan ngaih leh kan ram veng him tura hlawh neia sorkarin a rawihte hian min veng lo mai ni lovin ven ngai zingah an tel ve ta em ni le? Hei hi keini ang duang chuan a chhanna kan nei ve ngai dawn lova, mi huaisen zawk leh hre zawkte an ṭawng chhuah ngam a ngai ta.

YouTube lama sawihona pawh theih ang angin ka en a. Champhai tlangval RamBoss tihin a channel Zosiam tihah khan Pu Hriata Chhangte a interview kha a pahnih khan ka lo en leh bawk a, ram dang aṭanga an thar chhuah kan rama mi anga waybill lo siam ve ngawt chungchang pawh hi kan sorkar hian pawisa a duh luatah mi ram thar ni na na na hi GST a lo la ve ringawt thei em ni le? GST hi dan ang takin la dawn ni ta se eng vangin nge a motor phurh kuhva hlutna ang ni si lova hniam em ema a lak leh si? tih zawhna pawh a lo awm nghal.

Dan leh dun hre ve si se lo mah ila GST lak dan leh Police in an man duh loh/ man theih loh tih leh Custom lam man tura dah an man duh bik si loh te hi he ramah hian zalen taka a kal zel mai chuan Kristian ram hi sum duh vangin sual pawh haw ngam lovin kan awm tawh tihna a ni em le?

DC khin chungchang hi chu Facebook pakhata an ziah khan ngaihtuah a ti thui khawp mai. Rangvamual leh Phunchawngah dan lova zu siam hi an man fova, a zu mai ni lovin a siamna hmanrua hi an tichhe ṭhin.

Dan lova kuhva phurh lo kang ta hi DC thiam loh em ni le? DC lakah FIR an thehlut ngam mai ni lova DC laka FIR thehluttute thu rang taka bawhzui a nihzia DC in a hriat a, "Kan thawhpuite thuneihna piah lam," a ti hian Champhai SP aia thuneitu sang an awm tih a tichiang tihna a ni mai em?

He ramah hian sum a awm chuan duh duh tih thiang a nih chuan ram kan tichhe dawn ni lovin ram hi kan tichhe tawh zawk a ni. Kan ram dinhmun hi ngaihtuah chian chuan a rapthlak a ni e.

- Lalrinmawia