IKEA leh Mizoram...

IKEA Company-in ni 9 Aug 2018 hian India ramah an dawr hmasa ber an rawn hawn ve dawn takah chuan he article hi ka han ziak a ni.

IKEA company hi Sweden ram aṭanga din niin Ingvar Kamprad-an kum 17 mi a nihin kum 1943-a a register a ni. A company hming pawh hi a founder Ingvar Kamprad leh Elmtaryd (a farm seilenna) leh Agunnaryd (A khua) hming chawia phuah a ni a. A company a din tirh chuan thirsakawr (cycle)-in nawhalh bawm leh Kristmas card a zuar ṭhin a. Kum 60 a lo inherliam meuh chuan Forbes magazine chuan khawvela mi hausa top 10-ah a lo dah.

Kawvela mihausa tam zawk hi chu company share (neitu nihna) neih tam avang te an ni hlawm a, IKEA company-ah hi chuan share holder an awm lo a, stock market-ah an innghat ve lo; a company hi a hausa hle a, bank-ah loan pawh an puk ngai lo, hei hi engtin nge a tih dan leh IKEA company chungchang leh kan ram aṭanga tih ve theih a awm em tih te i lo thlir ho ila.

Tunah hian thawktu mi 1,94,000 zet an awm a, tin an turnover hi 38.3 billion Euro (2017 report) lai a ni.

Vision (thil tum): Nunphung ṭha zawk nei tura mipuite kaihhruai.

IKEA thil tum ber chu mitin ten nun nuam tak kan neih theihna atana kan phak tawk ang zela in chhung bungrua ṭha tak leh mawi tak tak tlawm taka kan lei theihna atana hma lak a ni.

IKEA company hi furniture company tia hriat lar a ni. IKEA hian mi thilsiam chi hrang hrang catalogue hmangin a zuar chhawng ṭhin a, kum 1953 khan IKEA dawr hmasa ber furniture dawr hawn a ni. Khawvela commercial thing kih zawng zawng 1% hi IKEA kum khat hmanral a ni pha a, chuvangin khawvela thing company lian ber a ni.

IKEA retail chain: Stores/ retail (dawr)- IKEA hian ram 49 ah dawr 403 a nei (Nov 2017 report). IKEA dawrho hi a tlangpuiin average size hi 30,000 sq meter a nia (Lammual football field hi 480 sq meter). IKEA hian item hrang hrang Range an neih zat hi 12,000 a awm a, dawr size lian loah chuan an range hi 8,000 vel bak hralh tur an dah thei lo.

Warehouse/ distribution center: IKEA dawr­ho­vin bungrua a zawrh te hi kar hnih chhung stock chiah an dah avangin, dawrin bung­rua chatlak loa an awm theih nan an godown lian (warehouse)-ah an stock ṭhin. Warehouse lian hi 30 chuang ram hrang hrangah an nei a. India ram aṭanga bungrua supply-ho hi, lawngin German wareshoue-ah thawn luh a ni a, wareshouse aṭangin dawr hrang hrangah an lo pe ve leh ṭhin a ni. An warehouse ṭhenkhat hi robot hmanga control a ni.

Purchasing office: IKEA-ina an thil zawrhho hi anmahni siam a ni lo a, mi dang thilsiamte chu khawvel hmung hrang hrang ram 50 chuang aṭangin Purchasing office 45 vel kal tlangin bungrua an lei khawm ṭhin. Purchasing office hna ber chu a siamtute (supplier) enkawl, a supply na man tlukpui, quality endik leh ontime delivery (a hun taka bungrua thawn) te endik.

IKEA dawra zawrh tur hi thil man tlawm mi nawlpui hman theih tur an tinzawn avangin, raw material tamna rama thil siamtute hnenah hlawm lian deuhin an order a, a volume a len avangin siamtu tenau tan chuan a awhawm ṭhin hle a, IKEA bungrua siamsak hi an inchuh ṭhin a ni. Hemi hi hriain IKEA Purchasing office lam ami te hian kum tinin quotation an la thar a, head quarter Sweden-ah supply-na rate thar pek ziah a ngai ṭhin a ni. Purchasing office ram hrang hrangte hian IKEA supply thei nih kha an inchuh ṭhin a ni.

IKEA hian China leh Sweden ram aṭanga thil siam chhuah an zuar hnem ber a. Kum 30 vel chhung chu India ramah thilsiamtu 48 hnen aṭangin 315 million Euro kum tin bungraw hrang hrang carpet, textile (parda, beadsheet, towel etc), lighting lam, plastic, dry flowers etc te an lei ṭhin. Foreign exchange a siam hnem em avangin RBI pawhin Super Star Trading house nihna a pe a ni.

Supplier: IKEA bungraw siamsaktute hi supplier an ti mai ṭhin a, khawvel pumah 2000 vel an awm a. IKEA supplier nih hi thil har tak a ni a, a process a thuiin, IKEA hian supplier pakhat appoint-na atan pawisa tam tak a seng bawk ṭhin. IKEA supplier ni tur chuan, dan strict tak IWAY (supplier-te thawh dan thuthlung) zawm a ngai a. A quality dik lo anga bungrua thawn chuan an rawn claim let leh theih avangin fimkhur a ngai hle.

I.O.S. (product development): IKEA hian an dawrah mi tam tak kal ṭhin tur leh bazar reng tura an duh avangin an product design-ah tha leh zung an seng nasa khawp mai. Hemi mawhphurhna kengtu ber chu IKEA of Sweden (IOS) office a ni. An design thar tihchhuah, design mawi tak siam, mi nawlpui lei theih tur, ṭangkai bawk si leh a siamtute siamna ram aṭanga tlawm taka thleng thei tur hian a packing te tih thiam a ngai hle. An product reng reng hi democratic design an ti a, chumiina a ken tel chu man tlawm, quality ṭha, ṭangkai leh sustainability (hman zel theih) a ni.

Catalogue: IKEA catalogue hi an sumdawn­na atan hian a pawimawh hle a, IKEA catalogue siamna hmun hi Europe-ah pawh studio lian ber a ni. Product catalogue-a lang pha chin tawhho hi chu supplier leh trading office aṭang pawh hian delay phal a ni lo a, ngaih pawimawh lehzual a ngai a ni. Kum tin catalogue print zat chu 208 million copies (2013) a ni.

Inrelbawlna: IKEA company hi khawvela company kalphung (principle) nei ṭha ber leh nundan mawi ber an lo ti hial ṭhin a ni.

IKEA supplier te hian naupang kum tling lo chhawr (child labour) leh bonded labour hi kum 1992 khan an lo remti lo tawh a, hei hi UNO pawhin Child Labour an buaipui hma daih kha a ni a. IKEA foundation hian UNICEF ho nen thawkhoin, child labour a zung nen a phoro turin, a root cause (retheihna leh lehkha thiamlohna) te hi nuai bo tumin, India ram khua 200-ah school din turin pawisa tam tak a seng a ni.

Kum 1990 khan ‘Environmental Policy’ a lo ziak tawh a, hei hi a hnathawktute leh a com­pany ten mawhphurhna an neih vek thu a ni deuh ber. Khawvelah ram a chereu lohna atan hma theihtawpin an la a, IKEA furniture siamna atana thing leh mau te chu enkawlna felfai tak huana mi lo chu hmang lo turin thutlukna felfai tak an siam a, an duh dan chuan thing leh mau kha khawi huan aṭanga lo kal nge a nih tih te document proof-na te an duh ṭhin a ni. Global Forest Watch-ho hnenah donation USD 2.5 million an pe a, forest tracking neihna turin. Kum 2002 khan WWF te nen thawk hoin, forest lam tih hmasawn nan an lo thawkho ṭan tawh bawk.

‘The testament of Furniture Dealer’ tih chu Ingvar Kamprad hian a lo ziak tawh a, hei hi IKEA thil tum hrilhfiahna a ni.

Work culture: IKEA staff-ho hi an taimain an work culture pawh a ṭha hle. IKEA office hna­thawh ṭan hun hi dar 9 pawh nise, a tam zawk hian dar 8 ah office te an thleng hman ṭhin a ni.

Thil pek dawng lo tura inzirtir: IKEA hna­thawkte tana zawm tur hian thilpek lak theih leh dawn theih chin bithliah an nei a, hemi bakah restaurant etc. ah ei man inpeksak thlengin dan mumal an nei a ni. Hei hi Mizo te chuan a ho kan ti maithei; he dan an neih chhan chu miin thil min khilai fo chuan ṭan ngam te, huai te hi a har a, hei hi hnam changkang zawkte hian an lo hmu chiang viau. Thil khilai lawm em em hnam kan ni em?

Thawkkhat lai khan IKEA aṭanga carpet lei zawng zawng 80% kha India aṭanga lei a ni a, amaherawhchu eng eng emaw thil felhlel deuh (corruption etc.) a awm nia an hriat avang khan India rama sumdawnna lian ber carpet-a an sumdawnna pawh kum khat chhung an titawp lailawk a nih kha; heng aṭang ringawt pawh hian an inrelbawlna dik leh ṭhatzia a hriat theih mai awm e.

IKEA India: Sawi tak ang khan IKEA hian India aṭangin bungrua kum 30 a lei tawh a, IKEA hian India ramah an bungruate hralh ve turin dawr hawn ve an tum a, mahse India ram danah foreign pawisa hmanga dawr company pakhat tan (FDI-in single brand) dan a awm loh avangin, kum sawm chhung chu license nei turin an nghak ta a. An survey aṭangin dawr 25 hawn an titlu a, dawr pakhat zelah Rs. 500 crore vel seng turin thutlukna an siam ta a ni. India sorkar hian license a pek hma hian an thil hralh aṭanga 30% hi india siam ani tur a ni tiin bond a sign tir ve a. IKEA-in India-ah investment tih a tum zat chu 12,500 crore a ni a, tunah hian India rama IKEA dawr hmasa ber ni turin Hyderabad-ah Rs. 1,000 crore an seng a ni. Mumbai, Banglore, Gurgaon, Pune etc ah te pawh dawr hmun tur an lei nual tawh.

IKEA leh Mizoram: IKEA hotuten India Prime Minister Pu Modi an hmuh ṭumin darkar khat an meeting a, Pu Modi-a hian darkar chanve chu Mau lam a lo sawipui. “North East India-ah han kal ula a changkan theih nan hma han la rawh u” a lo ti a ni.

Mizoram sorkar hian IKEA company hi sawmin ni 11 Feb 2016 khan kan Chief Minister Chairman-na-in IKEA Bamboo Workshop neih a ni tawh a, IKEA forest team te April 2016 khan rawn kalin, kan sorkar hotute leh mau huan neitute an rawn kawm leh bawk a ni.

IKEA company tan hian mau lam hi material pawimawh tak a ni a, kum 7 kal ta vel khan mau hmanga thil siam an dawrah an zuar ve ṭan chauh a, rin ai takin an customer ten an lo duh a, tunah hian kum tin 750 crore an lei ta der mai. A ṭhan dan en zel chuan kum 2022 ah chuan 1500 crore a tlin chhoh an ring. Chutihrual chuan an leina ram China-ah thil man a sang chak em em a, India leh Vietnam-ah te an Mau lam product te siam sak theitu tur an dap mek a ni.

India ramah hian Mau hi North East-ah lo chuan a lo tam vak lo a, state ralmuang aṭang lo chuan company lianho hian an lei theih loh bawk avangin Mizoram hian chance ṭha tak kan nei a ni.

Mizoram hian forest produce kan ngah a, kan ram a kilkhawr avang leh tlang ram kan nih avangin heavy industry product lian pui pui din ve hi a rem lem lo a. Hmun danga raw material awm ve vak lo forest product te hi hmang ṭangkai turin ṭan la ta ila. Company lian IKEA, Homedepot, Walmart, Cosco, Target etc. te hmang hian mau leh natural materials dangho aṭanga siam thil khawvela pholang ve thei turin ṭan la ila. Heng company liante nena kan inthlunzawm chuan kan buaina ber ṭhin a market-ah kan buai ve a ngai tawh lo ang a, a bungraw siam chauh kha kan tih ve tawh tur chu a ni. Tichuan kan sorkar leh mipui ṭang kawp hian world class industry kan din ve thei ngeiin a rinawm.

Industry hlawhtling din tur chuan rawmaterial tam, a sengkhawm mumal, skill labour, thawktu taima leh rinawm an awm a ngai. Current leh kalkawng lam hi chu a rawn ṭha chho ve zel turah ngai ila.

Hnang lam (rattan), changel (banana fibre), water grass aṭang tea thilsiam te hi IKEA-ah chuan sumdawnna lian tak a ni. IKEA hian India aṭangin pot poori (dry flower) pangpar leh hnimhnah ro aṭanga siam an lei nasa bawk. Ram changkangho hian natural material lam aṭanga product siam hi lei tur an zawng na sa hle.

Bamboo product market 85% chu ram changkang North America, Europe, Australia leh Japan-ah te an ni. Henghoah hian kan thil siamte thawn tur chuan thei leh thlaiah organic certificate an tih ang hian forest produce atan chuan Forest Stewardship Council (F.S.C) certified a ngai a ni.

Kan state ṭhenawm Tripura forest depart­ment chuan kum 2015 khan an Bamboo leh rubber plantation te FSC certified an lo ti tawh a. Kan ramah hian kan state sawrkar hian hma han la ve sela, kan ram forest plantation, farmer group, private ram te FSC certification zau tak hi nei ila chuan company lianho hian kan ram thing, mau etc te lei tur hian min rawn pan dawn a ni. He certification tel lo chuan kan mau ngahzia hi puang puang mah ila awmzia a nei thei dawn lo a ni.

FSC hian kan ram neitu nihna (land laws) lam te, maximum land holding law te leh thil hrang hrangte a ken tel avangin, ram changkang zawkte nen kan indawr ve theihna tur hian sorkar hian hma la thei sela a lawmawm ngawt ang.

Arunachal Pradesh-ah chuan an state pum FSC turin hma an la mek a, Mizoram state hian engtin nge hma kan lak ve dawn le?

Mizorama kan industry te leh kan thil thar chhuahte buaina ber chu a market a ni zel. Retail chain company IKEA, Walmart, Home­depot etc. te market neih ṭhat hmang hian kan ram hian thilsiam lamah hma thar kan la ve thei a ni. Heng retailer chain lianho thawhpui ṭhatna chu, ram dang China, Vietnam, Thailand etc ah te an tihdan thuruk (technology transfer) te min hrilh thei dawn a. India rama zirna ṭha ber berten min zirtir theih loh kha anmahni kaltlang hian kan hre thei dawn bawk a ni.

Tuin nge IKEA dawr Mizoramah hawng ve ang tihlam ai mahin, tunge Mizoram aṭanga thilsiam hmanga IKEA company supply ve thei ang? tih hi a ngaih pawimawhawm zawkin ka hria. Tu sorkar hian nge kan ram hmasawnna tur atan kan forest produce te market ṭha zawk thleng thei tura hma la dawn le?

- C. Laldinliana Proprietor King Marketing Ex- employee of IKEA