ZIRNA INAH SOCIAL MEDIA/ NETWORK HMAN DAN ZIRNA

Engnge social media/ networking?
Social media kan tih hian social networking site hi kan sawi tlangpui a, bangbo lutuk chu kan tam tawh lo ang. “Internet emaw khawl hmanga kan inbiakna te, chanchin, thu leh hla, thlalak, video, etc. kan inpek tawnna hmanrua ho hi a ni,” te pawh ti ila a dik thei mai awm e. Entir nan: Facebook, WhatsApp, YouTube, Instagram, Twitter, etc.

Social media nghawng ṭha lote
Social media hian kawng tam takah rah ṭha chhuah mah se, a ṭha lo lam hi kan zir nasat zawk a ni zel. Mizo zingah pawh harsatna tawk kan tam ta khawp mai. Depression leh anxiety neih phah te kan kat nuk a, invauna leh intihduhdahna, cyber harassment, sextortion, online bullying, tel/ hriat ve loh hlauhna (FOMO/ Fear of Missing Out) te leh cybercrime hrang hrangte pawh kan hre chho ta.

Thlalak leh video dukdak lo thehdarh kawngah zir tur kan ngah hlein a hriat bawk. Thu thang dik tawk lo kan siam nasain kan suan kual zung zung ṭhin te hi a pawi hle. Mi dang tana chhiar nuam lo tur emaw, mi dang tithinrim thei zawnga post leh comment a tam ṭhin khawp mai - a dawngsawngtu chan tur kan ngaihtuahpui lo ni berin a lang.

Account lem (fake account) hmanga huangtau taka mi beih ching kan awm ta fur a. Hawihhawm lo taka hmeichhia va ṭhin te pawh kan tam ta. Sawi sen pawh a ni lo ang, tihrem vek theih lah a ni hek lo ang. Chutihrualin, inzirtirna mumal tak nen chuan kan harsatna hi a kiang duak theiin a rinawm.

Kan thiam loh a ni vek bik lo
Mizote hian kum zabi 20-na tawp lam deuh aṭang khan computer leh internet kan hmelhriat ṭan a. Kum zabi 21-na a inher chhuah meuh chuan khawvel changkanna hian min tuam nasa tawh hle. Mobile phone thar a chhuak deuh reng a, ṭhalaiin Six Degrees, Friendster, hi5, MySpace, Orkut, etc. te kan tuipui chho a. Reiloteah Facebook, WhatsApp leh Instagram kan khawih leh a, tunah phei chuan Mizo zingah pawh Youtube-a channel nei kan tam ta hle.

Heng khawvel changkanna te hian min luh chhuah rang lutuk a, kan in siamrem hman lo ni berin a lang. Kan thiam loh emaw, kan zir loha puh thluk vek chi a ni bik lo ang. Zirtirna ṭha leh kawng dik kawhhmuhtu kan nei mumal lova, kan duh dan danin kan khawsa ta ti ila, a dikna chen a tam viau awm e.

Zirna inah han inkaihruai ta ila...
Mizoramah pawh sex education kan zir ang deuh hian social media-a awmdan mawi, chanvo leh mawh­phurhna (ethics) inzirtirna hi zirna inah hian han kalpui chho tak tak ila, rah ṭha tak a chhuah ngei ang. Tun aia nasa hian social networking hman dan leh hman ṭangkai dan hi zirlai naupangten an zawh tawk tur leh an hriatthiam tawk tur zelin han inzirtir ila.

Kindergarten (KG) aṭanga University thlenga zir tur pawh a chhawp chhuah theihin a rinawm. Anganwadi lamah pawh, “Nu leh a pate awm loh lai chuan phone leh computer khawih loh tur,” tih ringawt inzirtirna pawh hian thui takin an hma hun a hril thei a ni.

Social network khawih theihna khawl hrang hrang Laptop, Desktop, Phone, iPad, etc. kan faten an khawih hian engnge an en a, eng nge an khawih tih hriatpuite pawh hi a ṭha hle a ni. Kan ṭhianpa chuan, “Kum 18 an tlin hma chuan ka fate hi chu phone ka leisak lovang,” a ti hmiah mai a, kawng tam takah a fate pawh an him viauin a rin theih.

Buaina lian zawk kan pumpelh nan
Mizote hi chu kan la fel (mawl?) a, court a in khing emaw, buaina lian tham tak chawh chhuah phah hi kan la tam lutuk lo niin a hriat. Chutihrualin, hemi ringawt hi in hnem nan emaw, ngaihṭhat nana hman chi a ni lo. Social media hman dik loh vang hian pawisa tam tak chawi theih a ni a, lung in tan theihna a ni. Kan huat zawng hi a lo inang lo thei khawp mai a, kan tawngkam (post/ comment) pakhat lek hian mi rilru a tina thei tih te hi hre tel ta bawk ila.

Inzirtirna mumal kan dawn loh chhoh zel chuan hengho hi kan hma huna kan tawn theih vek a ni. Khua a tlai tak tak hma hian kan sorkar/ thuneitute pawn a ranglama hma an lak a pawimawh hle. Mahni theihna zawn ṭheuha hmalakna pawh hian kawngro a su khawp ang. ‘Inngaihdamna leh inhriatthiamna’ ringawt changchawi lo hian ‘dan’ kan hriat tel a pawimawh.

A ṭha zawngin aw...
Social media platform hi dan palzut nan leh mahni ngaihdan sawina ringawt aia ṭangkai zawkin a hman theih. Mizo zingah pawh hian eizawn nana hmang tam tak kan awm tawh a, midang ṭanpui nana hmang pawh kan awm ta nual mai. Zirna leh hnathawh nana ṭangkai taka hmang te pawh kan awm a, nupui pasal hmuh nana hmang te pawh kan awm ta hial a nih hi.

Heta ṭang hian social media/ networking site hi a ṭha zawnga hman dan tam tak a awm tih hre thar ila. Mahni, khawtlang leh kan ram tana a ṭangkai thei ang berin kan khawvel changkang zelin a ken tel hi hman dan i zir zel ang u.

- Daniel Lalrinfela, Assistant Professor Dept. of Social Work Divine Mercy College