1875 ramri hi neih kan tum lo em ni?

Mizoram ramri chu 1875 kha a ni tia kan Cabitet Meeting in a pass rum kha chuan keini ang lo ngaihtuah ve dan chuan, "Ehe le, ram neitute nge nge, MNF hi chu zalenna lo sual rup tawh an ni bawka 1875 ramri nei let tur hian Dholai lamah ramri ban an phun ngei dawn a nih hi, Inner Line reserve chhunga ramhnuaite pawh Mizo ta a ni tawh dawn a nih hi," kan lo tih ve tawh nen Vairengte daia metre 100 bawr vel ramri zauh turin sipai kan chhuah tir ngam ve ek ek chauh mai hi chu Cabinet Meeting thurel leh a taka kan ramri hauh dan hi chu a inhmeh lo hle a nih hi a.

Entirna kan hriatthiam theih dan han sawi ta ila a ṭha ang - Kulikawnah pakhat huaisen zet mai hi a awm a, chu pa chuan an veng ramri a kawk a, an ramri chu sawtah Hualngohmun thleng rawk saw a nih thu a sawi a, mahse Kulikawn ramri tia an hauh chin chu Saikhamakawn nen an inrina thleng chauh a ni bawk si.

Kulikawn veng pain an veng ramri a kawh chu hla tak a ni a, an ram chin erawh chu hnai tak Saikhamakawn thleng chauh a ni si a, Hualnguhmun thleng an veng ramri chhunga khung tumna pakhatmah nei lo chungin, "Kan ram chin a nih hi," tiin va kawk ve ta ringawt se miin an nuih hum hum dawn a ni.

Kan ram hruaitute hian ramri tia an kawh chu a va hla em em a, hei hi chu Cabinet Meeting in an pass hma tawh pawhin Mizorama NGO leh political party dang pawhin an pawm chin a ni a, mahse kan ramin kan luah chin chu Vairengte chin chauh hi a ni si a, kan ram tia kan chhal leh a taka kan ram tia kan luah hi chu a inhlat em em avang hian 1875 inremna tia kan sawi reng dawn chuan 1875 ramri humhalh tur hian sorkar hian hma han la ve se mawle. Kan sorkar hian 1875 inremna kha Mizoram ramri nia a pawm tak tak chuan khami ramri luah turin a ṭul chuan Court ah kal se a ṭhat a rinawm a, Assam sorkar pawh lehkhate lo thawn ve se kan ramri chin (kan kawh chin Dholai bul thleng rak) chu hrilh chiang bawk ila, Assam pawh hrilh lo, sorkar laipui pawh hrilh lo, Court ah pawh kal si lova 1875 inremna ramri kan pawm thu sawi mai hi chu inbumna angin ṭhenkhat chuan an sawi thei dawn a ni.

Kan ram chin hi kan luah chin aia zau a nih chuan tunah hian chumi luah tur chuan sorkar in ṭan han la tak tak se ramri humhalh kawngah chuan sorkar hi kan fak dawn a ni, Dholai bula tlem te tea tawlh thlak hi chu Congress hunlai khan an lo tawlh thla duai tawh a, tunah tlem an tawlh thla leh a, hei hi chu Dholai aṭang chuan kilometre tam taka hla a la ni a, kan ram kan tih chuan a luah tur leh nei ngei turin ṭan la ve tawh ang u, a sawia sawi hi chuan ramri hi a zauh thei si lo a ni. Mizo te hi i ṭang thar ang u.