RORELTUTE U, BIAK INAH CHUAN A NI LO VANG!

Krismas & Kumthar vuakvetah kan zalen a, tunah hri kai kan pung chho mek bawk a. SOP thar a lo chhuak leh ṭan a, Biak Ina Inkhawm chungchanga khuahkhirhna hrang hrangin titi a luah leh ta hle mai.

Covid hri len tirh ata mahni inphat chhe deuh­thaw khawpin Kohhranin sorkar a thlawp a. Inkhawm pawh thil hlauhawm nia inzirtir a nih avangin Koh­hran mipui tam takte thlarau nun awngrawp phah khawp hialin tihtawp vek a ni a. Tunah CAB zawm ṭha chungin Biak In kan hawng leh ta a, CAB zawm ṭhatna ber chu Kohhranho Inkhawmnaah bawk a ni. Khaw ṭhenkhat, him dama inhria, mask vuah ṭha lova zalen taka awm tawk chu an awm ngeiin a hriat a, mah se a nawlpui chuan Inkhawmnaah CAB kan zawm ṭha khawp mai.

Pathian thil phut - fak leh chawimawina pawh sorkarin a phal loh chuan tiin Pathian hmel pawh zah zo lovin kan insum a, hri lah chuan a kiam phah sawt thu hriat tur a awm hauh lo va. Pathian fak leh Inkhawm khap rei ber state hi kan hluar rei em em mai a nih kha. A kaikuang chu Kohhran Inkhawm hi a ni lo tih a chiang reng mai. Mahse, kan harh thei rih si lo!

Kum thara SOP thar lo chhuakah chuan Covid hnehna lamah leh chenpui thiam tumna lamah hma­sawnna a tam leh viau chuang lo. Rei vak loah chuan min chhanhim zo lotu LOCKDOWN bawk kha kan himna emaw kan ti leh dawn pawh a ang ta!

Zan curfew ningtute thawm a lian viau a, chutiang bawkin zan Inkhawm khap­na pawh hi ngaihtuah chian chuan awmze nei lova inchungtlakna a ang khawp mai. Zanah hri a pung a ni bik lo va, zan Inkhawmnaa hri inkai darh theih a nih ngai chuan chhun lama Inkhawmnaah pawh kan inkaidarh vek tawh awm tho si a.

Zan Inkhawm kan khap chhan ber nia ka lo rin chu - Zan lama Kohhran an khuahkhirh loh chuan mi zawng zawng an zalen a, Inkhawm lova teihawi mai mai an tam chuan hri inkai an hlau a ni ang a, ka lo ti ve ngawt a. Mahse, curfew lah chu zan dar 9:00 hnu lamah District Magistrate ten an puang ang tih a ni chauh bawk si! A him thei ang bera Inkhawmna buatsaih chu kan ngaithei tlat si lo! Setana hi a va hlim dawn em!

Pathian Kohhranho programme hi lei lam thil satliah a ni lo va, chunglam nena indawr tawnna a ni. Mizoramah erawh hri kan hlauh luatah 'Meizuk khap' nen intiat lekah kan ngai ta a nih ber hi maw! Malsawmtu hian mal min sawm tak ang maw? "Lalpan khawpui a vawn ṭhat loh chuan a vengtu chu a meng thlawn mai a ni" (Sam 127:1) tih kha rilruah a lang e. Chunglam khian hri hi min dopuiin min venpui tak ang maw?

Covid hlauhna kara Setana inrawlhna hi hmu thiam tak ang i maw!? Pa­thianin mihring a chherna - zirna (education = all round development) leh cha­tuan nunna (thlarau) min venpuitu Kohhranin a tuar nasa leh ber dawn a nih hi! Zoram, harh lul teh.

- Vanrambeiseia