AMC hian engnge an thawh?

Aizawl Municipal Corporation (AMC) hi term hnihna (kum 5 term) a kal mek a, term hnihna kal mekah hmalakna lian tham hmuh tur a la vang khawp mai. Eng ber nge an thawh tih hi mipui lam hian kan thlir ve reng a, mahse hmasawnna lian tham a la awm meuh lo chu a nih hi.

State lian leh state dangah chuan hma­lakna ruhrel lian pui pui an nei a, khawpui enkawltu ber an nih avangin an hmalakna pawh a lian tham ṭhin hle. Keini state-ah pawh hian AMC hian sum tam tak tak budget-ah an nei a, chung an sum neihte chu hmuh nawm khawpa hmalak nan an hmang meuh lo emaw tih tur a ni.

State dangah chuan fly-over bridge sei pui pui an siam a, khawpui chhung kawngte zauhin an ti hnum hlurh hlawm. Kei ni municipal corporation ni ve si, footpath zim te te an siam a, kawngpui an tichep zel ringawt a; party mite induhsak nan hna chhe te te an insem mai mai a ang khawp mai.

Entir nan Bawng­kawn junction kawng­pui zauh hawk te, Vaivakawn hmun hnih junction zauh te, Vaivakawn chhak Hunthar peng junction zauh te, Dawrpui Vengthar, Dinthar panna junction tihzauh te, Upper Republic leh Venghlui junction, Pi Pangi keng zauh hawk maite hi AMC-in an thawh zawk tur ni awm tak; UD&PA sum hmanga hengte hi siam a ni daih si.

Hrangbana Co­llege bul kawng chho/ chhuk pawh car parking atan rua­hmanna a kal daih tawh a, mahse AMC hi a che hleithei lo nge, tun thlengin hmalakna a awm lo ni awm tak a ni. Hman deuhah khan tender-te an chhuah a, a thawktu tur pawh thlan fel vek tawh ni khan ka lo hria a, mahse kum hei leh chen hi a vei leh ta reng mai. Engtikah thawk ta ang maw?

Tuna an hnathawh langsar ber chu bawlhhlawh paih hi a ni mai a, a bak chu kan sawi tak ang khan footpath tlem tlem, anmahni party mi induhsak nan an siam den den chauh a ni a. Heti reng renga corporation ding ve luah si hi an hna­thawh hmuh tham awm ve tawh awm tak a ni a, hmuh tur a la awm meuh loh bakah hmalakna tur lian tham hmachhawp an neih awm ka hre miah lo nia!

Tuna AMC enkawl mektu MNF party leh official-te hi an inrem lem lo nia sawite pawh a awm a, chutiang a nih ngat chuan engtin mah hmachhawp lian han neih ngaihna a awm lo a nih hmel. Chutianga official-te leh AMC enkawl mektute an inrem lo a nih chuan a enkawltute an thiam lo ti pawhin a ngaih theih ang.

Chuti a nih chuan AMC aṭang chuan hmalak leh hma­chhawp lian tham deuh chu engti kawng mahin a lo beisei ngam loh a nih hmel viau mai.

Chu mai a la ni lo, a enkawltu party pawh an councellor-te an la inlungrual lo nia sawi pawh a awm a, chuti a nih lek phei chuan engtin mah hna an thawk lian vak thei dawn lo chiang a ni. Chuvangin, khawpui enkawl tura kan thlan leh hunah pawh khawpui kan nihna ang tak enkawl thei tur kan thlan a ṭul ta em? Heti ringawta khawpui min enkawl chuan a ngaihna a awm dawn tlat lo.

- Lalchungnunga