THINGTLANG MIN HMUSIT ZUI KHER LO TURIN KA NGEN A CHE U

Hripui chuan thingtlang min han nuai ve ta buaih buaih a, a rapthlak dan hi sawiin a siak lo. Kan chanin maian chan pawh a tluk lo e tih chu nep te a ni ringawt. Hre pha chiah lo mah ila, hmanlaia raicheh awm nia an khawtlang rehzia an sawi ang vel kha kan ni nitin mai. Sawi ngaihna a awm lo.

Hetiang kan nih mek laia social media lama min ngaihnepna leh thuawih loh vanga tuara min ngaihna post leh comment hmuh tur awm fo hi a na kan ti tak zet. Khawpui mi te tawrh ang tho hri kha asin kan tuar. Nikuma inbuai em em lai khan a chhan kan zawn sak miah lo che u. Pawi kan tiin kan tawrhpui em em che u vangin hri hlau chung chungin tlaivarin kan rawn tlan vawn vawn tih pawh in hriat kha. Min diriam zui lo hram teh u. Kan rilruin Ar bo a zawn tawh laiin keini tan chuan a na mah mah.

Thingtlang miten heti taka hri kan kai chhan hi in hre duh a nih chuan maw ka hrilh ang che u. Khawvelah hripui a leng a, Wuhan leh London a mi te tawrh ang tho kha kan lo tuar ve a, kan buai a nih hi. Feh kan ngai ngawih ngawih asin, hri kai hi kan tan a hmanawm loh lutuk, kan cho lo.

Kan VLTF (In LLTF chang­­­tlung tak ang) te buai leh manganzia, indaih lohzia hi a rapthlak tawp. Tlem naklaiin hri vei leh khung ngai an lo awm ve bawk nen. Patling hi an hui pap pap asin.

Kan 4C te mawlh hi asin hrehawm, sikul chhuat, paw lutuk leh tlabal tak mai, sawi thui lo zawk ang. 4C ei leh in chungchang te phei chu sawi ngam a ni lo zawk, sabebuh a ni hawt e. Positive ni chunga mahni in lama riah mai ngai te pawh kan ni nawk hlawm.

Medical duty in neih ang kha kan nei ve tho a maw, doctor chu sawi loh, nurse pakhat pawh kan nei lo, a chhan chu maw, kan khuaah nurse an awm ve lo.

Heng ka sawi hian beisei leh phut neia sawi ka ni lo. Khawngaih takin social media lamah in ṭawngkam tal kha chu min lo fimkhur sak turin ka ngen ngawih ngawih che u. Kan tawrh hi a rit lutuk tawh e. Buai hle mah i la phone khawih thei chuan kan la awm ve bawk sia.

Aizawl mi insual ta vek kan tihna a ni miah lo. Mi ṭhenkhatin heti zawnga insawi kan hmuh hian a tuartu rilru lo hah sa nen a na em a ni. Kan ngaihsanzia che u chu in hrethiam pha lo hial zawk ang. In ṭawngkam khat hi kan tan dam sawng sawngna a tling asin.

A mawl zawk leh a rethei zawk kan nih hi, diriam zui tlak kan awm lo. Zahngai hram teh u. He hri hi kan hlauh ve em avangin Sawr­karin Aizawla a tih ngam loh kha hre mah i la kan in test hum hum mai a nih hi.

Eng em kan ti lo ang a, kan dam ve leh mai ang chu maw.

E.. taka, kan Bialtu MLA te ho kha an dam ṭha maw...An chanchin hi kan hre ngai ta miah lo a, an ngaihawm ve a...

- Madawnga Khiangte