MGT 2021

Mizoram’s Got Talent an sawi tirh khan zep miah lovin ka ngaihdan ka sawi ang ‘another copycat’ tih ka rilruah a lo lang a. Zai vel bak a ni leh lovang tiin rilru ka siam sa a; ka beisei sang lo a nih chu.

Talent show tam tak kan Zoramah pawh kan lo ti tawh a, kan hlimpui ṭhin viau chungin a lehpek a sang lutuk ṭhin lo.

Mizo Idol, Youth icon etc a lo awm tawh, hming chhera larpui pawh an awm nual mai. Ralkhata tuipui ber pawl ka ni deuh ziah chungin ka rilru a hnual ṭhin viau. A chhan chu, thiam thil neite inphochhuahna mai­cham hi a vangin a har lutuk tawh computer khawvelah hian.

Music video te leh thil hrang hrang, film thlengin, piracy huat lamah kan chau si a, kan inhawlh chhawng zung zung a, artist-te hlawkna tur a awm tawh ṭhin lo. Ka lo nat pui ve ṭhin a ni.

Kan thuah lut ang. MGT chu an ṭan ta a, ka ngaihnep avangin ka buaipui lem lo. Mahse ka nupuiin a hmuhnawm a nia a ti fo a, kei thaibawih chuan ka en ve ta a. Ka lo ngaih ang ngawt kha a lo ni lo tawp mai a, stage 2 aṭanga en ka ni a, ka lawm ta riau mai. Ka tuipui chho ta viau mai a, chutah live audition-ah Rody C ti a in sawi han che ka hmuh khan uluk leh zualin ka en chho ta a, ka lawm ta riau mai.

He nau, Rody C hi ka en bik chho ta a, ka lung a ti awi. Magician lah ṭha tak tak kan lo nei a, Joute rubik’s cube magic te kha a ropui e. Pakhatna ni ta guitar play te kha a ngaihnawmin a hmuhnawm tel. Bar tending ti tupa che velte kha a class riau. Ramlaitui nula zai thiam em emzia te kha. Purple rain hla cover-tu kha a sap a zovin a la thiam berin ka hria, ka bengah chuan!

Rody C khan lawm­man a la ve ta lo niin ka hria a, mahse ama hlaphuah leh ama intumchawpa rawn ti vek mai, tuma tih sa kharchhawng miah lova rawn che kha ka thlan tur nise pakhatna a ni ang.

MGT hi tun hnaia kan reality show-ah chuan a ṭha berah ka ngai. Judge te an thiam, an chiang, an hre bawk. Nl Pensy, Tv Sailova, Pu Nunkunga leh Alana te an kalnaa ngaihsanawm ṭhiau - show an ti hlu.

MGT season 2 nghakhlel takin kan lo ngai chang e.

- Dr Para