Sawrkar hnathawk tihtlem

Inthlan kan hmachhawn a, ram kan hmangaih leh ta sup sup mai le. Khawpui pa leh thingtlang pa vote inzat miau hek, thingtlang paho pawhin ngaih pawimawh leh hmangaih an hlawh leh ta hlein a hriat theih leh ta. Nakkum lawka Aizawla an varandah a inthlahrung em ema kan nghah hlawhchham ṭhak ṭhak turten, chinghne beram vun sinin thingtlanga kan sumhmunah min rawn nghah ve lai a ni.

Mizorama mipui tam berte hi thingtlang lo neia ei zawng kan nih avangin ‘thingtlang’ mite han ngaih­pawimawh viau pawh hi a awm e. Inthlan dawn na na na hi chuan Mizo mipui tam zawkte hian eng nge an mamawh tih kan hre chiang khawpin a lang. Tlin tawh hnu hian kan hai der leh mai ṭhin pawh a!

Ka vei leh ka ngaihtuah ve fo chu sawrkar hnathawk tihtlem chungchang hi a ni. Sawrkar hnathawk hlawh leh anmahni mamawha sum kal tam lutuk tihtlem hi thil ṭul tak a ni. Sawrkar hnathawkten an hlawh bakah an awmpuite hlawh te, officer rinawm lo deuhte phei chuan an awmpui loh te hlawh thlenga an la nghek nghek mai te hi! Sawrkar hna hi engtikah mah mipui nawlpui eizawnna chi a ni ngai dawn si lo.

USA a kan UPC Hqrs-ah khuan hnathawktu an intih tlem viau thu an sawi ṭhin a. Tunah phei chuan a chanve ngawta an intih hniam tawh thu an sawi. A chhan chu, hmanraw thar lo chhuak zelah hian, khawl nena ṭangkawpin tunhmaa thawktu pathumin an thawh aia tam mah kha mi pakhatin a thawk zung zung thei tawh a ni an ti ṭhin.

Kan ram riang teah pawh hian, office tinah computer leh khawl thiltithei tak tak kan hung fer fur tawh a. A man ziahna lama a lan ang tak a nih hlawm chuan khawvela khawl ṭha ber ber hi kan kawl fer fur niin a lang. Khawl thiltihtheihna kan hman tam tak avangin office a han len nikhua pawhin mi chuang sa chuang kan tam tawh hle.

Office ṭhenkhat phei chu nuho inkawm khawmna leh hlawh neia chawei khawmna in a ni ringawt mai ang tih a hlauhawm. Sawrkar hna­thawkte chaw ei khawm kan uar viau ta te, thil tih khawm, ei khawm leh in khawm kan uar lutuk ta te hi a hrana sawi tham fe a ni awm e. Kan tih­khawm ṭhinte hi tihkhawm loh chi tak takte pawh a ni awm e. A tawi zawngin, kan sawrkar hi a thei deuh te chuan a chenin an chen a ni mai.

Thingtlang lam mite hmasawn theihna ve tur, kawng te a chhe tual tual a. Tunhmaa an chan ve ṭhin, sawrkarin a puih ve ṭhinna te pawh vote a an thleng zel a lo ngai ta. Patling ve nafam chu an ngaihdan an lo thlak zung zung thei bik si lo, vote loh chuan a dawn ve theih bawk si loh, an tuar tlawk tlawk a. A tawp a tawpah thinlung chhungril ṭap chungin, nupui fanaute rilṭam ai chuan tiin an in hralh leh nge nge ṭhin a ni.

Ram leh thingtlang kuthnathawktu hmangaih em emtu politician-te hian thingtlang loneitute lamah sum tam zawk a kal theih nan te, private sector lam tihhmasawn a nih a, private company/ agency lamah lehkhathiam leh thiam lo tan pawh mahni thawh theih tawk hna a lo pun thur thur theih nan sawrkar inrelbawlna atana sum luangral nasa lutuk tihreh a nih theih nan, sawrkar hnathawk tihtlem lam hi han vei hlawm sela a va ṭha dawn em!

- Rev. Jh. Za Hluna