Inthlan hun a hnai tial tial

Inthlan hun puan la ni lo mah se kan hnaih ta hle. Inthlan hunah meuh chuan Demo­cracy ram ropuizia a lo lang leh dawn.

Democracy chu mipui sawrkar, mipui­te din, mipuite tan a ni. Inthlan dawn boruakah chuan party tinte kan in sawisel tawn leh ang a, a mimal tak pawhin kan inbei nasa ṭhin. Mahse a tak takah chuan tumah kan inhaw hlen chuang lo a, democracy lung­phum ropuizia a lo lang leh ṭhon. Mahni awmna party sawh nghah nan democracy ramri kham pel rawk khawpa ke pen a awl ṭhin a, hetah hian kan in enfiah chu a ṭul a ni.

Khawvela demo­cracy ram ropui ber Ame­rica (USA) Presi­dent Donald Trump a khu inthlan dawna vote a zawnnaah thlan tlin a nih chuan a thil tih turte a puang lawk vek a. Thlan tlin a lo ni ta a, a thu tiamte chu a hre reng a, a mal malin a hlen chhuak chho ta zel mai a. A ṭhente chu mipuiin an duh loin kawng te an zawh a, ram chhungah buaina a chhuah phah fo a. Ram tinah a duh lotuten an duhlohna thu an au chhuah pui a, a tih luih zel chuan an ram tan pawh a him loh tur thute thlengin an au pui ṭhin.

Chutiang ang buai­na karah chuan a thu lo tiam tawhte chu a hlen chhuak zel tho mai a. Mi tumruh, mi huaisen, mi rinawm a va ni tehlul em! Amah puitu a cabinet te pawhin a hmalaknaah an thlawp ṭhat loh chuan a ban zel mai a, a dang a ruat leh mai ṭhin. Amah paih thlak tumte pawh awm ve bawk mahse tun thlengin a hna a la chelh reng a ni.

Trump-a hi kan ram hruaitute tan tan mi entawntlak tak niin ka hria a, ka rawn tarlang a ni.

Anni cuan ‘i thu­tiam i hlen zel chuan a pawi ang’ an tih laiin keiniah chuan ‘a thutiam a hlen lo’ kan inti zel thung a. Kan ram hian roreltu a thutiama ding nghet tlat, mi tumruh, huai­sen leh taima a ma­mawh mang e. Inthlan dawna thutiam an neihah te pawh hian kan ram tan a ṭha ang em? a ṭha lo dawn em? tih chu uluk taka kan ngaihtuah a ngai ve e.

Tlin duh luat avanga mipuite thutiam neih pui vak vak pawh hi a ṭha ber lo, kan man thiam vek tawh bawk. Mizoram mipui a tam zawk hi retheihna khurah kan la tang a, ram tana ṭha tur pawh ngaihtuah mah ila min khaichhuaktu tur kan mamawh ber a, rilru in chutiang mi chu a dap ru nasa viau reng a ni.

Mi hausa chu awm ve bawk mahse min dawm kang ngai lo a, sorkar bawkin kan chhungkua min dawm kan a ṭul leh ṭhin.

Chutih lai chuan mite hip nana thutiam ṭha deuh deuh lo neih pawh chu thil awl tak a ni ngei ang. Mahse fimkhur a ngai hle; nakinah kan ram tan a la ṭha lo thei a, min vel lettu an ni thei a ni. Tin, thutiam hi term khat chhunga hlen chhuah a nih loh chuan mipuiten an ring zo tawh ṭhin lo. A hnua rawn sawrkar ten an chhunzawm ṭha duh bawk si lo.

A pawimawh ber chu mipuite hian thil hi chip peih ila, party ringawt ruihchilh loin kan ram tana mi ṭha tur kan thlan thiam theihna turin Lalpa hnen­ah dil ang u. Chuti­chuan Zoram nuam kan siam dawn a ni.

- H. Neihchungnunga, Durtlang North