CHANGE..!!

Tum ṭumah hian America ramin Change an tih ang kha sawi tam ka tum lem lova. Ka sawi tum ber zawk chu, Mizo mipuite hi Change tia kan ṭanrual a hun tawhzia lam a ni.

Hei kan hma lawkah thla­sik rim a nam ang a, chutah chuan kan ram hruaitu tur kan thlang dawn a. Tuna kan ram dinhmun hi a ṭha nge ṭha lo chu, mimal tinte chhan turah dah ta ila. Tun mai lo deuhah kan ramin hruaitu a lo neih tawhte pawh an ṭha tawk em?

Ram inrelbawlna kawngah kan duh thu an sam em? Eirukna kawngah te an fihlim em? Khawtlang inrelbawlna kawngah duhthusam an ni em? tihte ngaihtuah chungin kan hma a, Mizoram Legislative Assembly (MLA) inthlan lo awm turah hian ram hruaitu atan mi ṭha, mi dik, eirukna laka fihlim, mahni pumpui hma ngai lo, Pathian ṭih mi, kan thlan chhuah a pawimawh hle mai.

An ṭhat lohna hai der a, kan party an ni alawm ti a, kan thlan tlin leh mai chuan kan ram leh hnam tan hmasawnna tur engmah min thlen pui leh tak tak dawn lo. A dik tak chuan tunah hian kan ramin a mamawh loh politician kan ngah tawh lutuk.

Khawpui a ni emaw, thingtlang pawh nise, inthlan dawn hnaiha kan khawtlang leh kan veng hmangaiha ngaihtuah bik riau politician-te hi lalna kan pe a, kan veng leh kan khua hi an hmangaih tak tak em? tihte pawh mipui te kan inzawh a hun ta khawp mai. Party hruaitu inthlan dawna sum tlemte hmanga thlem lungawi theih kan awm hi, ram ṭhan mawhbawk an ni. Chhungkhat pa ni ve si, sum tlem te hmanga lei theih nih bik te hi i zak ang u.

Politician-te pawhin engtin nge ka tlin ang, tih lam ringawt in ngaihtuah avangin lalna induh luatah inkhaw hmuh a zim deuh ṭhin em? Engtin nge kan ram tan hna ka thawh ang? Tuna ka hna thawh hi nakina ṭhangtharte tana chen fakawm ni turin engtin nge ram hmasawnna turin hna ka thawh ang tih lam ngaihtuahna hi in neih tam a ngai.

In ṭhaa intling a nih chuan ram hruaitu atan kan thlang tling em em ang che u. A tling lo na na na chu lal lukhum pek hi mipui te'n kan ba lo, chuvangin ram mipuite hi sum hmanga min thlem lungawi tum lovin, hun in la neih lai hian tling ngei turin hma la ula, mi ṭha na na na chu ram hruaitu atan mipuite hian kan awt che u tih hi min hriatsak teh u.

Hawh u, politician-te aia vote ngah zawk, mipuite hi in thurual teh ang u, party lam a ni lo. Hei leh chen state puitling kan ni ve tawh a, kan politician-te hian change an thlen tir thei lo a nih chuan keini mipuite hian ram siamṭhatna kawngah change kan siam tur a ni dawn lawm ni? Party politic ruihchilhna bansanin ram leh khawtlang siam ṭhatna lama rilru dik pu, Pathian ṭih mi, ram hruaitu atan an lo inzuar a nih chuan thlang tling mai ang u.

Kan party mi leh sa nihna bansanin, Congress, MNF adt. an ni emaw ni lo emaw an ṭhat loh chunga an party kan sahuai thing vawn tlat hi bansanin a ṭha lam awnin change kan tih a hun ve tawh lo em ni?

Tun hmain party-ah hruaitu hlun te pawh kan ni thei, eng sawrkar emaw ber chhawr em em tu pawh kan lo ni tawh thei a. Chu chu hun kal tawhah ngai ila, tuna kan ram dinhmun hi en ila mipuite hian kan tih takzet a hun ta, kan tu leh fate chenna tlaka ram nuam siam duh ṭheuh kan ni lawm ni? Chuti a nih si chuan tunah hian kan za vaia kan chet chhuah a hun ve ta.

Party tin te inthlan dawnah manifesto ṭha tak tak nen, mipui hnenah an rawn inzuar ang a, he an manifesto hi lehkhabuah pawh siam dawn ila bu khat chhah tak daih tur pawh nise, anmahni an ṭhat chuan si loh chuan thlan loh ngam hi a finthlak. Inthlan dawnah kan sawrkar chuan chu chu kan ti ang, chu chu ka tiam a che u, titu nazawng hi lalna i pe tawh lo teh ang u. Ṭawngkama hnathawh leh a taka chantir hi thil hrang hlak a ni.

Inthlan dawna min ma­mawhtute hi kum nga lo awm tura kan mamawh turte an nih avangin mipui lam kan fimkhur a ngai hle mai. Ram hruaitute tih theih loh change hi mipui te'n kan ti thei a ni tih hi lantir a hun ta hle mai.

- Ramchhana Hmar, Phuaibuang