Aizawl bial 11-ah Candidate tur a hriat thawkhat ta

Kum 2018 MLA inthlanpui neih turah political party hrang hrang an inbuatsaih zel a, ṭawngka feikibar hmanga inbeihna thawm pawh a awm leh ṭan mek. Khawpui leh thing­tlang lama politics ngaihventute chuan "Tu nge kan bialah ding ang?" tih chu an beng chhitna lian ber zing a mi a ni ta mek. Kan beng tivartu atan MLA candidate ni thei tura ngaih leh ni chiang deuh thawte tarlan kan tum dawn a ni. Ṭum khatah ziah sen a ni lo a, Aizawl khawpui chhung bial 11 kan thlir phawt ang.

Aizawl North I: Aizawl North I-ah inkhing thei tura ngaih zingah mi panga hming a lang mek. MPCC aṭangin bialtu MLA nilai Pu R Romawia chu ding leh tura ngaih a nih laiin, MPCC Vice President Pu R Lalzirliana chu ding thei tura sawi rik a ni ve leh mek. AMC lama Pi Zomuanpuii hming pawh sawi ri tawk an awm. MPCC-a a palian leh hotu sang pahnih an nih avangin Congress party chhunga inhruipawhna nia sawi hi a ngaihnawm mai thei.

Ṭangrual pawl ZPM aṭangin MPC Vice President Pu Vanlalhlana chu ding tura sawi rik a ni a, ani hi he biala hnuhma lo nei tawh a ni. Opposition party lian ber MNF aṭangin MLA hlui Pu Lalchhandama Ralte ding tura sawi rik a nih laiin, AMC Councillor ni lai Pu H Lalringliana chu an sawi tel bawk a, anni pahnih hi bial chhunga awm ve ve an nih avangin an party chhungah pawh chinfel a harsa ang em tih hi zawhna lian tak a ni ang.

Aizawl North II: Aizawl N-II ah MNF aṭangin MP hlui Pu Lalhmingliana bakah AMC councillor ni lai pahnih Pu Laltlanzoa Khiangte leh K. Romawia te chu ding thei tura sawi rik an ni. MNF party hian party lama mi hlun leh experience nei ṭha nge ṭhalai lam an dintir dawn tih chu zawhna awm leh mite hriat chak a ni ang. MPCC aṭangin a hmaa bialtu lo ni tawh Pu H Liansailova chu chawlh tum anga sawi ni mah se an beisei ang candidate dang an hmu si lova, ding leh ngei tura ngaih a ni.

ZPM aṭangin bialtu MLA ni lai Pu Lalthan­liana MPC party a mi chu beisei leh a nih laiin, Dr Vanlalthlana PUC zirtirtu ZEM mi leh sa chu sawi rik a ni ve mek bawk a, ṭangrual pawl hi party hrang hrang awm khawm an nih avangin bial inchuh an awm hian chin fel a harsa zual deuh mai thei a, ngaihnawm tak a tling ang.

Aizawl North III: He bialah hian MPCC aṭangin bialtu MLA nilai leh bial chhung mi Pu Lal Thanzara chu an party chhungah chuhpuitu an awm lo. Hetih lai hian ZPM chuan candidate tur ruat chhin an la nei lo nia hriat a ni. MNF party aṭangin bial chhung mi tho, AMC Councillor ni lai Pu C Lalmuanpuia chu sawi rik a ni a, hetihlai hian MNF party hian an bial chhunga mi tho midang an bia tih hriat a ni a, an inbiakna an chawlhsan leh rih deuh avangin Pu C Lalmuanpuia hi a din beiseina a lian hle.

Aizawl East I: Aizawl East I-ah MNF party lamin ding tur an tichiang tawh a, an party president Pu Zoramthanga a ding dawn. ZPM chuan ZEM hruaitu Pu K Sapdanga chu an dintir dawn chiangah ngaih a ni a, mipui hriatah pawh puan a ni tawh. He bialah hian sorkar lai MPCC chuan mi pahnih sawi rik an nei a, bialtu MLA nilai leh bial chhung mi Pu R Lalrinawma Dy Speaker chu ding leh tura sawi a nih laiin, bial chhung mi tho MPCC a Chief Orginiser Pu K Vanlalrawna chu ding thei turah ngaih a ni bawk.

Anni pahnih hi MLA election hmasa lamah pawh din inbeisei ve ve tawh nia sawi a ni a, an insiam rem thei dawn em tih chu hriat chakawm tak a ni ang. Aizawl East I ah hian BJP chuan an party President Prof JV Hluna ding tura ngaih a ni a, eng emaw chen a vil ve hman a, beisei a nei sang leh ta lo nge tun hnaiah a chhuahsan leh rih nia sawi a awm thung.

Aizawl East II: Bial ngaihnawm tur dang Aizawl East II-ah bialtu MLA leh Minister nilai Pu Lalsawta chu ding leh tur chiang saa ngaih a ni a, an party aṭangin chuhpuitu an awm rih lo. Ani hi Finance Minister hming ṭha tak a ni mek a, Congress sorkar tihmingṭhatu zinga mi a ni. MNF party aṭangin a tirah MLA hlui Sailothanga Sailo ding ngei tura ngaih a ni a, anni hi inthlan hmaaa vote tlem te chauha chak lo kha a ni. Tun hnaiah Pu Robert Romawia Royte NECS neitu chu sawi rik a ni leh thung.

Pu Robert Romawia Royte hi MNF party ah a la lut lo a, Mizo Hnam Run pawh a la kal rih meuh lo. Heti chunga ding tura ngaih theiha a awm hi MNF party-ah a buk a rit hleah ngaih a ni. Party a la tel lo chunga pawn lam aṭanga candidate ni chiang deuhthaw tura sawi a nihna hi a dangdaina tak a ni. ZPM pawhin ṭan an la mek zel a, ṭhalai lehkhathiam leh vengva tak ZEM hruaitu Pu B Lalchhanzova an din tir dawn nia hriat a ni a, chuhpuitu hming dang a awm rih lo. Hetiang hi he bial boruak tur a nih avangin bial ngaihnawm tur a ni.

Aizawl West I: He bialah MNF party chuan bialtu MLA nilai Pu K Sangṭhuama an dintir leh ngei dawn nia hriat a ni a, senior politician niin, MNF party-ah pawh hruaitu senior zinga mi a ni mek a. ZPM pawhin ZNP president leh Chief Minister atana an hual Pu Lalduhoma dintir an tum nia hriat a ni. Rorel lai MPCC chuan MPYCC president hlui Pu Albert Lalthlamuana an dintir dawn nia sawi a nih laiin, tun hnaiah MNF aṭanga MPCC zawm ta, Pu PC Laltlansanga chu sawi rik a ni. Anni pahnih bâkah hian Congress party-a senior member Pu Lalfelkima pawh ding thei tura sawi a ni leh bawk a, he bialah hian MPCC hian candidate tur hi an zawng nasa hle niin a lang. Aizawl West I bik hi rorel lai Congress party aṭanga mi pathumin an beisei avangin tu ber nge an hotuten an dintir dawn tih leh he mi chingfel tura an party chhung boruak inlumlet pawh ngaihnawm tham a tling ngei dawn.

Aizawl West II: Aizawl West II chu bial ngaihnawm tur zingah a tel leh a, MNF party chuan bialtu MLA nilai Pu Lalruatkima chu MNF party aṭangin a ding leh ang. ZPM chuan MPC President Pu Lalhmangaiha Sailo an dintir dawn nia sawi a ni a. Rorel lai MPCC chuan MPYCC president Dr Lalmalsawma an dintir dawn chiang bawk a. He bial ngaihnawmna chhan tur chu MLA nilai Pu Lalruatkima chu a viak a ṭha hle a, session a chevel pawh MLA zingah chuan mipuiin hmuhnawm an tih ber zingah a tel pha a; nimahsela AMC inthlan kha tehna tling chiah lo mah se he bialah hian vote belhkhawmah MNF an che ṭha vak lo.

He bial hi tun hma aṭangin MPC ṭhatna nia sawi a nih miau avangin MPC president Lalhmangaiha pawhin beisei a nei sang ang. MPCC candidate tura ngaih Dr Lalmalsawma pawh zirna lamah mithiam niin a viak a ṭhain bialtu MLA ang thoin a taima hle a. Kil hrang hrang aṭanga tehin he bialah hian tling tur chuan an ṭan zual hle a ngaiin a rinawm a, bial ngaihnawm ber tur a ni ang.

Aizawl West III: Aizawl West III ah ZPM chuan MPC mi Pu VL Zaithanzama an dintir dawn nia sawi a ni. MNF party chuan CYMA President leh MP hlui, tuna bialtu MLA Pu Vanlalzawma an dintir leh dawn chiangah ngaih a ni a, MPCC aṭang hian Pu Vanlalruata Secretary MPCC chu ding tura beisei a ni. MPCC hian Aizawl West III atan hian pawn lam mi sawm an nei mek a, MPCC te mi sawm hi MNF party pawhin bial dang atan na takin an sawm mek bawk a, an mi sawm hi khawiah pawh kal se, thawm na tak tur leh mi hming

ṭha a nih avangin politics a luhchilh a nih chuan mipui ngaihven tur zingah a tel ang.

Aizawl South I: Aizawl South I-ah MPCC chuan bialtu MLA nilai Pu R Vanlalvena an dintir leh hmel. MNF chuan he bialtu MLA lo ni tawh leh ZNP aṭanga MNF zawm ta Pu K Liantlinga an dintir leh dawn a, ani pawh hi a chiangah ngaih a ni. ZPM chuan mi pahnih hming sawi rik neiin, AMC Councillor ni lai Pu C Lalsawivunga an dintir tura ngaih a nih laiin Pu C Zairema, zirtirtu pension pawh sawi rik a ni ve mek bawk. Aizawl South I a ding tura ngaih­te hi bial chhung mi vek an ni. BJP aṭangin Dr Zonuntluanga pawh sawi rik a ni a, mahse, East Tuipui lam a en leh zawk nia sawi a ni.

Aizawl South II: He bialah hian MPCC chuan bialtu MLA nilai Col ZS Zuala chu an dintir leh mai thei a, mi dang ṭha an awm a nih chuan chawlhsan a, ken mai pawh a hreh lo niin an party mi ten an sawi thung. MNF party chuan bial chhung mi tho Pu Denghmingthanga an dintir beisei a ni a, Mission Veng Local Council member Pu Francis Lalrammuana chu ding theia sawi a ni bawk. ZPM chuan Aizawl S-II ah hian ding tur tihfel an la nei lo a. Mission Venga KṬP hruaitu lam sawi rik chu an awm.

Aizawl South III: Aizawl South III-ah hian bialtu MLA nilai leh Minister ni bawk Pu KS Thanga chu MPCC aṭangin a chiang tang. MNF party chuan MZU a zirtirtu leh an party mi ni bawk Dr F Lalnunmawia an dintir dawn chiangah ngaih a ni tawh. BJP chuan bial chhung mi Nl Lalremsangi Fanai an dintir turah ngaih a ni. Hetih lai hian ZPM chuan bial chhung mi tho Lalthanfela chu an dintir hmel bawk.

Aizawl khawpui chhung bial 11 ah hian BJP leh PRISM lam hian mihring hming sawi vak tur an la neih rih loh avangin thai lan tur a vang rih hle.

- Lalnunṭawma Fanai