Tuikuk roll revision

Tuikuk Roll Revision neih chungchang hi awmhmunah ka lo vei ve hle ṭhin a, Mizo­rama NGO zawng zawngten Tripura Camp-ah roll revision nei tawh lo turin Election Commission lamah an ngen tawh a. Nimahsela an ngenna chuan awmzia a nei thui lo nge ni, kar liam ta mai khan Tripura hmunah Tuikuk raltlante awmkhawmna hmunah Mizoram aṭangin neih chhunzawm tur ni awmin sawi a awm leh a.

A bikin Kolasib District chhunga roll revision a hming lut 5300 vel lai mai an awm nia hriat a ni a, hetih lai hian Kolasib Constituency bikah kum 2013 inthlanah khan vote hmu sang ber khan vote 6078 a hmu a. Amah hnaih bertu nen vote 595 in an inthlau a ni. Hetiang a nih chuan heng Bru raltlante vote hi MLA General Election-ah chuan deciding factor a ni thei dawn ta a nih chu. Central India a politic bawlhhlawh kan hriat ṭhin vote in lei, tualthahna leh corruption te hi Tuikuk vote hian kan ramah pawh nasa takin a ti hluar thei dawn a ang ta hle mai.

A kum telin Mizoram hian MPF leh NGO te vang hian inthlan kan thiam chho sawt viau a, kan Kristianna nen pawh a inhmeh viau mai. Election a central lam mi Observer a rawn ṭang te pawh hian Mizoram inthlan chu hahdam thlak an tih thu leh Observer nia Mizoram an chang thei te chu an ṭhiante aia an vanneih bikzia an sawi ve ṭhin. Heng ang kan thianghlimna zawng zawng hi heng mi te vang hian rei lo te ah tih bawrhbanin a awm thei a ni.

Kan Mizo officer fel tak takte pawh hian hnam anga kan ṭan rual a ṭulzia hria in tun hi ṭan rual hun a ni tih hmu thiam se a va ṭha dawn em. Tuikuk buaipui nan hian central aṭangin pawisa tam tham tak a rawn kal ṭhin a, tun ṭumah pawh hian engzat nge lo kal leh dawn ni, officer ṭhenkhat hi heng sum vang hian an phur mah mah em? kan hnuai ami te hi kan nawr lui deuh mah mah em? biru chung leh tlanchhe chunga kan ti lui a nih chuan thil fel lo, Mizo te him lohna tur thil a awm tawh ṭhin a nia. Tuna kan dinhmun hi kan ram hian a chhiatpui thei a, democracy ram mipui rorelnaah hian roreltu thianghlim lote tan kawngka hi zau takin kan hawng thei tlat a ni.

Kan tawn ang hi kan ṭhenawm state te tawn nise an ni khuan phur takin an ti lui duh ang em? Keini chu kan hlawkna tur a nih chuan pawisak nei lo khawpin kan a tlat ṭhin a nia. Mi ram ṭhatzia te hi social media-ah te hian kan sawi a, kan duh tawk leh mai ṭhin; a takin hma la ang u.

Hman kumah Tripura hel Debarman hnam pakhat Kolasib District jail a tang hi ṭum hnih ka va kawm a. Ka bula a sawi ka rilru a ri nawn reng ṭhin chu, tihian a ram mi dik takten sorkar lakah kan han hel a, mahse kan siam ṭha thei tawh lo. Kan ram rorelna khawlah roreltuah an ṭang tawh a, sumdawnna lian zawng zawng an khawih a, market an control vek a. Keini chu an hlawhfa chauh kan ni tawh, an lei kan ba er ur mai a nih hi. Mizoram hi tunah chuan harsatna in la tawk lo a, mahse in inven ṭhat loh chuan nakin lawkah kan dinhmun ang hi in la tawk mai ang tiin min hrilh a ni.

Amah hi Vairengte gate-ah a PSO-in pistol a lo pai lan vangin duty ten ringhlelin an man a. Hel pawl secretary niin LLB a zir zo tawh a ni, a nupui pawh doctor niin state dangah a thawk a. Judiciary a la indan hma kha a ni a, khatihlai khan Tripura aṭangin sipai ṭhahnem tak an rawn thawk chho a, SDO(s) Pu Lal Sangliana court-ah hruai a ni a, Tripura sipaiho hriat loh khan Magistrate hnenah khan Kolasib District jail a tan a dil mawlh mawlh a, an hruai haw chuan tlan chhuah a tum min ti ang a, min kap hlum dawn tho tho, a ti hial a ni. Mi fel leh bright tak a ni a, a khawngaihthlak hle mai. An ram hnamdang kuta lut ta mai hi a vei em avangin a duhthusam loh nun a dai phah ta a ni.

Kan sawi kual duah chhan chu, kan nakin hun tur hi kan thlir thiam a ngaih vang a ni. Vawiina ka hlawkna tur ka ngaihtuah luat vang hian kan kan tu leh fa te chenna tlak lohah kan siam thei a nia.

- H. Vanlalnghaka