2021 : Kum lungchhiatthlak

Covid-19 chungchangah chuan hmasawnna awm hret hretin, nikum hmasa lam ai chuan 2021-ah zalen viau tawh mah ila, kum lungchhiat zawk a nih dan a awm nualin a lang.

Kristiante dinhmun aṭanga thlirin chu chu a chiang lehzualin a hriat theih a. India ram sorkar leh khawtlang boruakah sakhaw zalenna a kiam telh telh a, hmarchhak meuh pawh a rawn thleng tituai tawh a ni tih kan hriat ṭheuh ṭul tawh. Tun hma aṭang pawhin sakhaw dang betute kara khawsa leh rawngbawl Kristiante tan harsatna a awm neuh neuh ṭhin tih chu tu hai rual a ni lo. Mahse, India ram pumpui thlira hluar lam a pan zel mai leh state leh sorkar laipuiin a beng a chhu ngawng tlata hriatna hian a ti-lungchhiatthlak lehzual a ni.

Kristiante chunga hleilen nasat ber kum

United Christian Forum-in a report danin Kristiante chunga hleilenna hi 2014 aṭang khan a zual zel a, pandemic kan chhawrna emaw tih theiha 2020 kumah tlema a tlak hniam laiin 2021 ah chuan a rawn pung hlut a. A hma kuma ṭum 279 chu nikumah chuan 486 a rawn ni chho ta dawrh mai a ni. Pawl ṭhenkhat phei chuan ṭum 500 chuang a awm an ti.

Kum tawp lamah a pung hlut mai pawh hi ngaihtuahna tithui tak a ni. Kristiante hun puia tihbuai an tum hrim hrim emaw tih theih hial turin Krismas ni takah khan hleilenna thleng hmun 16-ah a awm niin an sawi. Hmar lam state Uttar Pradesh, Chhastisgarh, Jarkhand leh Madhya Pradesh-ah ringawt ṭum 274 lai a thleng. Heta ṭang hian ‘Hindu Heartland’ an tihah phei hi chuan Kristian nih a harsa telh telh a ni tih a hriat theih mai a ni.

Thil thar duhawm lo tak

Kumina thil langsar tak duhawm lo tak mai chu India chhim lam Karnataka-ah Kristiante chunga hleilenna a hluar ta riau mai khu a ni a. Tum 59 lai an record a, Bible an hal lai video-te pawh a rawn darh chuai chuai a nih kha.

Karnataka state hian Sakhaw Inleh Khapna dan December 23 khan an pass tawh tih hria ila. South India lam hi Kristian tamna hmun leh hman lai aṭanga an lo inbun nghehna a ni a, heti taka Karnataka state-a kut an tuar tam ta hi a pawi hle. Thil hriat hrehawm tak ṭhin chu thuneitute leh dan kengkawhtuten lehlam hawisan ang deuhthawa an hum zo lo tlat ṭhin hi a ni a. Anni hian thil tisualtute man ngei tumin ṭan han la ṭhin se chuan a ziaawm hle a beisei theih UCF thuchhuak chuan a sawi.

India hmarchhak a lang ta tlat

Tun hma chuan Kristian tihduh­dahnaah hian India hmarchhak hi a lang ngai lo. Nikumah chuan Assam-ah ṭum khat a lang a, a pawi hle a ni. Assam-ah hian Kristian leh Muslim-te an chep sawt viau a, boruak neuh neuh a awm ṭhin thu an sawi. Tin, Bangladesha Hindu hovin an tuar avangin Tripura-ah Muslim ho biak in (Mosque) 4, dawr 6 leh in 2 tihchhiat a ni a. Hetianga kan kawtchhuah meuhah pawh sakhaw zalenna nuai bo duhna hnuhma a lang ta zel mai hi ngaihtuah chian a pawimawh hle mai. A kaikuang kan zawn a, kan theih ang anga kan ṭang ve a nih loh chuan nakinah a la pawi lutuk ang tih a hlauhawm a ni.

India ram zepui pakhat ‘secularism’ chu lehkhaah inziak kelh kulh mah se a tak ramah chuan nek chepin a awm mek tih a hriat telh telh si a. Hetih laia mahni ṭanghma haina ni ngei tura puh theihin mi ṭhenkhatin an lo mawngzawmpui hi chu Kristiante tan a inhmeh lo takzet a ni.

Missionary of Charities te buaina

Vadodara, Gujarat-a Mother Teresa-i pawl Missionaries of Charity (MoC) te chungah FIR an theh lut riap mai a. Mite mak tih a hlawh viau. MoC te hi tu sawisel rual lohva ngaih deuhthaw an ni a. Mi chhumchhe ber berte tana an rawngbawlna hi khawvel pumpuiin a hriatpui a ni si a. Sakhaw inlehna dik lo taka kalpui thinin an puh chhe hle a ni. ‘Forced Conversion’ case hi sawi thin mah se India ram khawiah mah hian hetiang tia thiam loh chang hi an la awm lo a ni awm e.

Vadodara-a FIR an thehluh aṭanga kar 2 hnuah chuan Office Pui lamah buaina a thleng zui a. MoC-in foreign ṭanpuina an hmuh ṭhin chu an ‘block’ (hman theih lovin an dah) ta riap mai a, FCRA (foreign tanpuina dawn phalna) renew mumal loh vang niin an sawi. He thil phei hi chuan khawvel a deng dawt a ni ber mai. Missionaries of Charity te enkawl mi 22,000 te hmakhua ngai lovin an puh chhe lo thei lo. Sakhaw dang do ho hian FCRA dan hi an chelek nasa a, hemi dan an siam kherkhiap tak hmang hian an lawm loh zawng rep ro an tum ṭhin ni ngei tur a ni. Missionaries of Charity te FCRA chu tunah chuan an tinung leh tawh tih pawh hre nghal ila.

Thu a rum chhunzawm hle mai

‘India ram hi puana hmai khuh ṭhin Muslim leh Kristiante laka tihzalen’ hi an tum niin BJP MLA pakhat chuan hman deuh lawk khan Madhya Pradeshah mipui hmaah a sawi riap riap mai.

Chumi hma thla 2 velah Surguja district, Chhattisgarh-ah mi 1000 vel ‘Sakhaw Inleh tihtawp ni rawh se,’ tiin an kal khawm bawk a. Parmatmanand Maharaj, an hotu pakhat chuan pungkhawm ho chu ‘hrei nena inthuama sakhaw inlehtir ching Kristiante chu bei turin’ a fuih a ni awm e. Hre loten an hriat ve theih nana Chanchin Tha hriltute hun thimin a nang zel a ni.

Sudarshan News Editor-in-Chief Suresh Chavhanke chuan, “He ram hi Hindu Rashtra (Hindu ram) - a siam turin kan thawk tawp thlengin kan bei ang a, a ṭul chuan kan nunna kan hlan ang a, midang nunna pawh kan la mai ang,” tiin Hindutva group pakhat Hindu Yuva Vahini intawh khawmna pakhat Delhi hmuna December 19-a neihah a au chhuak bawk a, midangte pawh thu a tiamtir nual hlawm a ni awm e. He thil thleng avang hian social media lamah erawh chuan beih let a tawk nasa hle a ni awm e.

Sakhaw thil piah lam

Human Rights Activist leh writer, Cedric Prakash chuan Indian Currents-a a article “A Year of Agony for Christians” tihah chuan tunlai India ramah hian Fascism (democracy nih dan phung kalha hnam lak vung leh ngaihdan dang neite rahbehna) zia 14 political scientist Dr Lawrence Britt-an 2003-a a chhawpchhuah ang chi kan a awm kim vek niin a sawi. Chung zingah chuan – midangte dikna chanvo namnulna, duh loh zawngte hmuh sakhina leh chhuah chhiat phet tumna, Mass Media control, sakhua leh sorkar kaihkawp tlat, sangawizawn pawlte hleihluak taka vulh, te a tel.

Cedric Prakash chuan, “Vawiina India rama thil thleng mek hi Kristian emaw, Muslim emaw chungchang mai a ni lo va, kan Constitution: India ram nihna thuk ber chungchang a ni. He ramah hian mi chi hrang hrang kan len leh len loh chungchang a ni a. Dikna, zalenna, intluktlanna leh nunhona chungchang a ni… Constitutiona thu inphum chungchang … democracy chungchang a ni,” a ti ngawih ngawih mai. Kan hmuhpui phak a va pawimawh tehlul em!

- Rev Dr Ramengliana Ralte, Secretary, North East India Christian Council