Kuhva tawlh ruk kan lo thlir ve a

Zonet buatsaih kuhva tawlh ruk chungchang sawihona kha ngun takin ka lo ngaithla ve reng a, YouTube lamah pawh ka en chhuak leh nghe nghe a, he thila ngaihtuah ngun ngai em em leh Central YMA lam leh Zirlai pawl (an la au chhuak lovin ka hria) leh pressure group zawng zawng (political party lam chu lo ngawi se) inthurualin an chhui zui ngai chu Professor Vanlalchhawna sawi hetiang thilah hian politician te leh sorkar official an inthurual a nih loh chuan kuhva hi a hlawm lianin a tawlh ruk theih loh, a tih hi a ni.

Kuhvaa dan lo anga sumdawnna hi chu Professor Vanlalchhawna sawi, "Kuhvaa dan lova sumdawnna hian dan dik taka kuhvaa sumdawngtute a nek chep," a tih hi a pawimawh em em a, Mizoram khaw thlang lama Hachhek tlangdunga kuthnathawktute rawktu hi Myanmar aṭanga kuhva a ruka tawlhtu mi tlem te leh an thurualpuite hi an ni a, hei hi chu kan tihtawp ngei ngei a ngai a ni. Dan lova lakluh chu sawi loh dan anga lakluh pawh ni se kan kuthnathawktute tana pawisawitu an nih chuan Mizo mipui inthurual hian kan do zawk tur a nih laiin tunah hian kuhvaa sumdawng hi mi 100 tel vel bak an nih hmel si lova, chumite chuan a tlangdung pumpuia kuhva chingtute thawh rah an ti buai a nih chuan Mizoram sorkar hian a titawp ngei ngei tur a ni.

"Mizoram sorkar pawhin kuhvaa dan lova sumdawnna a fight ngam tur a ni," tih a rawn sawi chhuah pawh hi engvangin nge kan sorkar hian a fight ngam lohva, tute nge he thil ah hian inhnamhmawih tih hi tih chian a ngai a ni. MCS Association thuchhuah kha kan zir chian phei chuan MCS ho khan sorkara thiltithei tak takte avangin kuhva dan lova lakluh hi an ti tawp ngam lo ti ang deuhthawin an sawi chhuak a, chutiang khawpa an sawi ngam chuan thil dik lo tawp mai hi a in phum ru ngei a nih hmel a, a nihna hi hre lo mah ila a dik zan lo tih hi chu a chiang a ni.

"Thurualpui mumal neih loh chuan a tlang theih loh hrim hrim," tiin kuhva rah tawlh ruk chungchang hi media-ah huaisen tak in an sawi chhuak ta a, hei hi CYMA hian a zir chian chuan a rawn zir chhuah i beisei ang u. CYMA hi hun rei tak kha an reh veng veng a, tuna CYMA hruaitu thar an rawn lan hnu hian huaisen takin an rawn ṭawng chhuak a, han ṭang zel se dik lo na na na chu hlawk mahse i do vang u khai.