KHAPISTAN

Mizoram tluka khap tamna ram hi khawvel hmun dangah hian a awm ve ang em ka hre lo. A khap theih dék dék tawh chu kan khap vek ni berin ka hria. Tuna SOP thar bera khap leh khuahkhirhna siamte hian awmzia a nei lo ber àwm e.

Covid hlauh vangin kha leh chen kha kan inkhap bet a, kan mangan fe tawh hnu leh kan fairel bel a ruak vek tawh hnuah tlemin an han thlah dul hlek a. Krismas leh kumthar ruai buatsaih thlengin min khapsak a, chhunah erawh thingpui leh chhang dawh turin an intlar leh ang pút pút a. A Dan siamtute ngei pawhin an eiin an in pûk pûk tho a ni. Ka hmuh dan ber chuan hri do dan hre si lo, do lo anga lan duh bawk si lo, tihngaihna hriat loh vanga inkhap vel mai mai niin ka hria.

Dawr inhawn chhâwk, intlan chhâwk, zan curfew, Biak Inah a leng zat aṭanga teha 50%, mitthi vuinaah mi 50-aia tam lo tih angreng thlengin kan mi thiamte'n Dan min zamsak a, min khuahkhirh a. Mahse, hri chuan kiam lam pan loin pun lam a pan zel zawk a, chuti chung chuan dawr inhawn chhâwkna Dan thar an han zam leh ta ngawt chu a ni a! Kar khata ni 1-zel dawr khar hian hri a kiam phah ang em? Omicron hi a lo luh loh phah ang em? A teuh lo mai. Inhrêkbehna leh thuneihna lek kawhna mai mai a ni. Awmzia a han neih lohzia chu Inrinniah chuan dawr zawng zawng hawn phal a nih leh si danah pawh hian a chiang reng. Dawrkaite hi an khawngaihthlak takzet tawh.

Ka tehkhin ber chu, kawngkapui hawng huau si, khar ṭha si lo, tu nge lo lut tih lam ngaihtuah lék loa an lo luh tawh hnua pindana inkalhkhum leh lawi si kan ang ka tia. State pawnah mi an zinin ṭhenkhat an lo lut bawk a, chu chu kan dang thei lo a nih pawhin kawngkapuia an lo luh dawnah uluk taka lo enfiah ni ta zawk se. Chuti ni loa hlauhawm lo luhtir hnua a chhunga awmte khuahkhirh leh hren beh tlat kha a dik lem lo a ni. Chhunah inkhawm phal siin zanah inkhawm kan han khap leh hmiah a. Party thila programme neih a rem laiin gym, beauty parlour tih angreng chu hawn phal a ni leh lo lawi a! Heng hmunah hian hri hi a huangtau bik nge ni dawn ni! A réltute hian 'chhan loh aiah Petera' an ti mai mai ni berin ka hria.

Hri lah hi kan han sawi hlauhawm thiam em em lehnghal a. Hri kai hmuh chhuah an awm lahin 'vanduaithlak takin' kan han ti kher a. Hneh theih a nihzia te, dam chhuak an tamzia te, Vaccine-in nasa takin min pui a ni tih thute chu kan sawi duh lo a, thihpui theih a nihzia hlir kan sawi thung a. Hlau inti si kha chan loh hlauin kan innék leh ang tuau tuau a, a hlau ber berte kha a chuh chak chak an ni zui bawk a.

Engpawh ni se, khap tam berna ram record hi i siam law law mai teh ang u.