Kan hun pui lo thleng turah hian...

Tetea Hmar hian, “Mizo te hian hun pui pathum, ngaihhlut em em mai kan nei a, chung hun pui te chu a lo thlen chuan kan ri suau zel a, chung kan hun pawimawh pathum te chu- World Cup, Christmas leh MLA election te a ni” a ti a, a ti dik ngawt mai.

World Cup kan ngaihlu a, Christmas lo thleng tur pawh nasa takin kan ur lawk ṭhin a, MLA election-ah ngat phei chuan kan sahawk hi a ni ber mai. Heng kan hun ngaihhlut pathum te hi kumin hian kan thleng vek dawn niin a lang ta a, kum chhinchhiah tlak tak a ni dawn.

Hetianga kum khat chhunga hun pui pathum inher chhuah kum hi a thleng zen zen lo a, kum sawmhnih hmalam, kum 1998 kha a thlen hnuhnun ber a ni. Hetiang kum a her chhuah leh hun tur chu 2038 a ni daih tawh dawn a ni.

World Cup-ah chuan keini hian ṭan lam ram nei teh pawh ni i la awmzia a awm vak lo. Mizo zingah ṭantu an tam avangin kumin khan England kha an champion phah lo a, champion team France khan Mizoram hi India ram bungkhat a ni ve tih hi an hre kher lo ang. Ngai hluin ngaihlu lo mah i la World Cup kalphung chu a ngai reng a, cham­pion tur pawh a dang­lam phah lo ang.

Chutiang bawkin Christmas te pawh thlarau lam thil te a nih ngawt loh chuan kan ngaihhlut chiam emaw ngaihhlut vak loh pawhin kan nunah nghawng a nei lutuk lem lo. Kum tin khel loin a hun ngaiah a lo her chhuak mai ṭhin.

Kan ngaihhlut hun pui pathum zinga pawi­­­mawh ber, kan nitin khawsak nghawng pha awm­chhun chu MLA elec­tion hi a ni. MLA elec­tion-ah chuan kan in buat­saih dan te, kan dawnsawn dan leh kan ngaihhlut dan emaw ngaihhlut loh dan hian thui takin kawngro a su a ni.

Kum tawpa inthlan pui kan hmachhawn turah pawh hian rilru lam lo inbuatsaih lawk i la, kan bial leh ram tana mi ṭha tur nia kan hriat te rilruin lo dap lawk se a ṭha hle mai. Politics hi a pawimawh a, ram hruaitu ṭha kan neih zel theih nan kan ngaihven tur a ni.

USA sawi ang. Pre­sident thlan dawn ṭum chuan mi nawlpuiin politics an ngaihven a, party pahnihin Presi­dential candidate atana an vawrh chhuah te pawh an chik peih a, an mimal nun thlengin an lep se a ni. US mipui nawlpui chuan an ram hruaitu tur meuh chu an duh tui hle. Chutiang chu mipui nawlpui rilru put hmang a nih avangin ram hruaitu ṭha han nei lo chi zia zang pawh an ni lo ve.

Keini pawh hian duh tui i la, thil chik peih i la, kan biala rawn ding turte pawh an ram kaihhruai tum dan leh an mimal nun chenin i chik zel ang u. Politics chuan kan ngaihven emaw ngaihven lo emaw kan nun hi thui takin a nghawng dawn tho tho. Mipuiin politics kan ngaihven a, kan duhtui viau chuan political party te pawhin candidate set chungchangah nasa takin an fimkhur phah ngei ang.

Vote lo hralh te, therhlo beisei vanga a dik a dawk thlu lova vote thlak te, mi ṭha leh ṭha lo tliar hrang hleithei lo khawpa party ruih chilh te hi kan bansan a hun ta khawp mai.

Kan ran vulh chuan man a nei a, kan hralh ṭhin. Nawhchizuar te an in hralh bawk ṭhin. I vote i hralh hian ran ang chauha dinhmun hniamah i indah a, nawhchizuar rilru bak i pel lo tihna.

- K Lalrinchhana