ANNI LEH KEINI

Hnam fing zawkte chauh ni loin kan thlang vaihote ngei pawh khu keini ai thlawtin sumdawnna kawngah kher hi chuan an lo fing zawkin an ngaihtuahna pawh an lo hmang nasa daih zawk mai tih kan hre awm e. Ṭum khat chu Shillongah kan lengkual hi dawr pakhatah lutin an thil zawrhte chu kan thlir kual a, chutah a neitupa chu kan kiang hnaiah rawn kalin an dawr chu an hawn thar ve chauh a nih thu sawiin, keini hnen aṭang chuan thurawn a mamawh thu a rawn sawi a. Chutiang thu kan han hriat tirhah chuan mak kan han ti viau mai a. A dawrah chuan keini chu lut hmasa pawl pawh kan lo ni mai thei a, kan hnen aṭanga thurawn a beisei ang chuan tihhlawhtlin ngei tumin keini pawh chu hawi kual nawn lehin a dawr bungraw hun dan chu heti hian hung la tiin, ṭha zawk nia kan rin dan kan sawiin rei lo te hnuah chuan kan chhuahsan ta mai a. Kan chhuahsan hnuah chuan kan sawi angin a rem ṭhain a hung ṭha em tih erawh kan hre hauh lo nain; thurawn beiseia keini min han bia chu sumdawng thiam kan tiin ka fak viau zawk mai a, 'Sumdawng hlawhtling tak a la ni mawlh ang maw le' ka ti rilru nauh nauh a.

Phai lam dawr changkang leh hlun zawkahte phei chuan anmahni dawrtute hi an ngaihsak thiam em em a, anmahni dawrtute hming mai bakah Phone number leh Date of Birth te thlengin an lo chhinchhiahsak thlap ṭhin bawk a. Chu'ngte chu vawng ṭha rengin kum rei tak thleng Birthday wish message an la thawn peih ṭhin. Hei hi min hriat reng vang a ni hauh lo a, an dawra vawi khat emaw chauh thil kan lei a, anmahni kan dawrna avanga kan chunga an lawmna vang leh kan DoB an chhinchhiah vang mai mai chauh mah ni se la, a dawngtu tan chuan a va lawmawm si em. Hetiang hi Mizo sumdawngte hian kan tlin loh thil tak niin a hriat a, vawiin thleng hian hetiang ti hi kan Mizo sumdawng zingah hian awm pawh an la awm kher awm lo e. Thil ropui leh lian tak ni lem lo mahsela a dawngtu thinlungah chuan hriatreng a awl bikin anmahni chu dawr leh an chakawm phah thin a ni.

Ṭum khat chu Mizopa hnenah hian lu mehtir tumin ka kal a, kan In aṭanga a hlat bawk loh avangin leh Mizo a nih hrim hrim bawk avang chuan a thiam pangngai ve thoin ka hre bawk a tiin ka mamawh hun apianga biak mai theih turin a Phone number ka dil a. A hnua ka sam a lo sei tak viau hnuah chuan mehtir leh tuma ka han biak chuan zing karah chuan meh tur an tlem ṭhin avangin chawhma dar 11;00 velah chauh dawr a rawn hawn dawn thu a sawi a, mak ka ti hle mai. Chutiang chuan a hnuah pawh ka biak leh a chhân dan ngai bawka min chhan leh avang chuan vawiin thlengin amah chu dawr ka tum buai duh ta lo a. Eizawnna dang a neih ka hre bawk si lo a, chutia a eizawnna ber pawh mi zawng zawng dawr hawn hnu chauha hawn a tum reng mai chuan, 'A ni khat sum leh pai lakluh chu a beitham awm mang e aw' tihte ka ngaihtuah a.

Hetiang deuh bawk hian hmanni chu dawr pakhat hian kalin kan mamawh an neih leh neih loh zawtin an thil zawrh vel chu kan enkual pah bawk a. Dawr nghaktu hmeichhia (nula nge nu a nih erawh ka hre chiah lo a) chuan Cell Phone ah hian games khel pah hian min lo chhâwnin mi pawh melh chuang lo hian, "Kha' laiah khan lo zawng rawh u," a rawn ti a. A dawra thil zawrh zinga mi chu kan lei duh tak pawh lo awm se la dawr hi a chakawm loh em emin kan hria a, nimahsela hmun danga kan hmuh tawh loh avangin leh an dawra kan han hmuh tak bawk siah chuan kan lei ta tho a ni. Khati anga games khel paha melh pawh min melh loa min chhang kha mak ka ti viau mai a, dawr nghaktu ṭha tak chu a ni hauh lo mai ti rilru chunga pawisa kan pek zawh hnuah chuan kan chhuak leh mai ta a.

Heng kan Mizo dawr pahniha kan thil tawn aṭang hian kan Mizo unaute ngei ngei zawk mah ni se la, dawr an nawm loh zia leh hnam dang dawr nghaktute nena an inan loh zia kan hrethiam thei mai awm e. Min melh zawkin kan incheina a lo nalh lutuk bik lem loh vang chu nge ni ang a, kan hmel a lo ṭhat uchuak bik lem loh vang chu ni ang tihte ka ngaihtuahnaah a awm nghal bawk a. Nnimahsela chutiang pawh ni se, a thil zawrh lei tumin a dawrah kan lut a nih chuan thil dang laklawh nei hauh loa min lo ngaihsak turah ka ngai. Chutiang a ni bawk si lo chu mak ka ti a, a games khelh lai chu a laklawh mai bakah a thinlung a pe hle mai tih ka hriatin dawr nghak tlakah ka ngai lo a, sumdawnna kawnga kal zel chi ni pawhin ka hre lo a ni.

Chutianga ka han sawina chhan pawh Mizote hian thil pakhata thinlung sawrbing tak tak hi kan thiam lo nge kan peih lo ni dawn kan ti thei ngai meuh lo a. Nimahsela, sumdawng kan ni emaw zirlai kan ni emaw eng thil timi kan ni a nih pawhin, thil pakhata insawrbing hi thil ṭul tak a nih bawk si avangin, Mizo zingah hian chutiang mamawh chu tam tak kan awm a. Phai lam leh hmun changkang zawka sumdawngte chuan anmahni dawrtute an ngaihsakzia leh, hmel hlim taka an dawngsawng ṭhin leh, a hnu kum tam tak thlenga an piannia lawmpuina thu an la rawn thawn zat zat peih ang kher chuan ti lo mah ila, hmaichhana ngaihsakna lantir chu kan tihmakmawh a ni a, chu tak chu dawr nghaktu tam takin kan tlakchham ber a ni bawk si. Aizawl dawr ṭhenkhatte ngei pawh hian kan Cell Phone number chhinchhiahin an dawra thil thleng thar leh eng eng emawte hi min rawn thawn fo ṭhin bawk a, thinlung hian hetiang hi chu a hlat tak tak thei ngai lo.

He sumdawnna khawvelah hian sumdawngte chuan Customers' satisfaction hi kan ngaihpawimawh ber tur a ni a, chumi a nih loh chuan sumdawnna nei ve ṭhin mah ila kan hlawhtling thei ngai lo ang. Eng vangin nge hnam dang sumdawngte dawr an nawm bik a, kan ram chhungah ngei pawh mi tu pawh maiin pan nuam bika kan hriat kan tih chuan anmahni dawrtute an ngaihsak thiam vang a ni mai. Chu chu kan unau sumdawngte chuan an tlachham tlat si a ni. Dawr nghaktu nui hmel hi a dawrtu tân hmuh a nawm êm êm si laiin anmahni dawrtute hmuha nui hmel pu ngai hauh lote pawh hi kan tam mai a, nui hmel han pu hram hram thei ṭhin se la anmahni tan a ṭhat zawk dawn tehlul nen hian.

Vai sumdawngte lah hian Mizo mizia hi an han hre thei em em mai bawk si a, tunah phei hi chuan thingtlang kilkhawr tak tak thlengin sumdawnna kua an hreuh tawh a, heti reng a nih chuan tun aṭanga kum sawm a lo thlen leh meuh chuan kan Mizo sumdawnna tam tak hi an la nek ral ngeiin a rinawm. Vawiin aṭang hian sumdawngte hi i harh ang u, dawr inang rau rauah anni aiin dawr kan nuam zawk tur a ni a, anni aiin dawrtu kan ngah zawk bawk tur a ni.

- Mahmuaka Chhakchhuak