Eng tak nge kan kah chhuah?

Nikum lama C Vanlalsawma thu ziak "Eng tak nge kan kah chhuah?" tih kha ka hai chhuak leh a, a thu kha a tawi na'ngin a thu ken kha chu a sei hle tih han tui hnih ve duhna a lo piang a, nikum lama ramri buaina avanga vanduaithlak taka silai hmeh puah a nih khan Assam Police lamah khan nunna chan an awm nual a, kha kha hnehna chang ang mai khan kan han uanpui dawn dawn a. Kan hnehna tur chu kan ramri kan humhalh theih hunah chiah a ni dawn a, silai hmet puak chung pawha mahni ramria chhâl ngei pawh humhalh ngam lo kan nih reng si chuan kan au kha au loh nen a thuhmun reng ang tih hi ngaihdan pakhat lo piang ve chu a ni.

A ziaktu hmasa khan, "Mizoram leh Assam ramri buai kan sawi apianga a serh zinga a mei chu, 'Kan ramri chu 1875 ramri kha a ni a,' tih hi a ni. He ramri kan sawi teivet hi Dholai thlang lamah a ni, an ti. He ramri hi kan hauh ngam lo a, Vairengte dai maia kan Police Out Post meuh pawh Assam hian min rawn chuhpui ngam a, chu mite chu kan Police huaisente'n an kap ta a ni. 'Kan inkah hma leh kan inkah hnua kan ram hauh chin hi a la ngai reng' an ti teh fo hi a nihna tak hriat a chakawm a ni," tiin a rawn ziak a, a nihna tak hriat a chak hi tunah chuan a hriat tawh a ni mai a, kan inkah hmaa kan ramri kha a la ngai reng a, kan inkah hma ai khan kan Vairengte loneitu ṭhenkhat chuan an huan an venghim thei tawh lo zawk hial a nih hi.

Thuziak hmasaah khan kan ram kan humhalh lohzia a sawi khan Raju chanchin leh ramri kha heti hian a sawi a, "Kan sorkar hruaitute, kan political party leh NGO pawhin 1875 ramri kan pawm tlang a ni. He ramri chhunga cheng Lailapur lam chuan an duh hun hunah kan kawngpui chu an dang vel mai mai a. Tu nge a nih pawh kan chian loh Raju-a tih chauhva kan hmelhriat Lailapur mi chuan a duh hunah a naute fuihpawrhin Mizoram kawngpui a dang thei tih hi kan hmu ṭhin. He Raju-a hi kan ramri chhunga (1875 ramri kan pawm a nih chuan) chhunga mi a ni a, zuk man mai ang u hmiang? Heti reng renga min zah lo Lailapur (kan ram chhunga kan chhâl) lawka awm a ni si a," tiin a han ziak tawn tawn a. Raju-a man chu sawi loh Vairengte daiah kan police duty post neih sa min chhuhsak an tum kan la let leh thei pawh hnehna chang angin kan inchhuah duh a ni si a, kan ram hi kan zauh dawnin a lang lo a ni.

Ramri chinfel hi chu political issue dik tak a nih avangin ṭawngkam thiam vanga sawi fel mai mai chi a ni lo va, ngawih renga tih fel theih a ni bawk si lo va, kan hotute tan chuan a luhaithlak dawn a ni. Chutiang tih huama roreltu ni tura candidate an nih avang hian kan han beisei sang ṭhin a, an tan pawh a harsa em em chung hian tuna kan dinhmun hi chu silai hmet puaka buaina chhuah hma leh buaina chhuah hnu ramri ngai reng sing state kan ni ta em ni le? Aitlang leh a chhehvel huan neitu mangang au thawm kan hria kan hre leh ṭan tawh a nih si hi.

- Lalremruata