‘Mi hmingṭhatnaa insawi luh tum’ tih kha

Vanglaini 15th August, 2018 chhuak Editorial a, ‘mi hmingṭhatnaa insawiluh tum’ tih kha ngun takin ka lo chhiar a, editor hi politic a luh aṭang hian editorial pawh hian ko a thlak ta deuh em ni aw ka ti a! Tin, a thupui hman hi a dengkhawng viau mai a, Vanglaini editorial atan chuan a inhmeh lo ka lo ti deuh a ni.

Kum 1998 a MNF leh MPC sorkar inṭawm­ah khan khatihlai Health Minister chu Pu KL Lianchia a ni a. Pu Lianchia ho hian Falkawn Referral Hospital hi sak ṭan a ni. MNF leh MPC thawh­dunna a tawp a, MNF sorkar khan a keng­kawh chho ta zel a.

He Hospital sak thuah hian Congress lam hian MNF chu eng­mah ti lo, he Hos­pital sakna tur cen­tral aṭanga pawisa lokal pawh engmah lova chhuah ang leh hluihlawn ang deuhin an Press Release-ah te an sawi nasa a. Mizo mipui pawhin Congress lam sawi dan chu an awih ṭhup hman niin a lang.

Mahse, Pu Lalruat­kima MNF MLA a han ṭawngchhuak ve a. “MIMER lo pian theihna tura a bul ṭan­tu dik tak chu MNF an lo ni” tih a hriat theih a. Central aṭanga pawisa Rs. vbc 40 hmang khan tuna building awm zinga 51 zet an lo sa zo tih te kan lo hre ta zel a. Hetiang a nih chuan approach road leh a hmun hma siamrem te pawh engemaw zat an thawk dawn tih a chiang a, MIMER kan neih theih nan Congress sorkar pawh hian theihtawp tak meuh an chhuah a, tihfel ngaiapui a tam a, ngaihtuahna an seng nasa a, hna pawh an thawk nasa.

Congress Minis­try hmasaa Health Minister Pu Lalrin­liana Sailo pawh MIMER kan neih theihna tura hma nasa taka latu a ni a, ani pawh hi sawi hmaih a thiang lo.

Chief Minister nau Pu Lalthanzara Health Minster a han ni a, a ni pawhin theihtawp a chhuah a. Chief Minister duhsakna leh ṭhahnemngaih puina pawh a dawng a ni mahna; Mahse, Dynasty rule lo pian theihna tura kawng sialna chi khat a nih hlauh chuan mi ṭhenkhat tan MIMER hi anchhe dawng a ni thei tho.

Mi hmingṭhatnaa insawiluh tum lam pawh a lo ni lova, Falkawn Referral Hospital sak thu-ah engmah ti lo, central aṭanga sum lokal pawh ei zo ang deuhthaw leh hluihlawn anga sawina awm fo hi Pu Lalruatkima MLA hian a rawn sawifiah ve mai niah ngai ila.

Tunhma deuh Vanglaini editorial kha chu nise ‘hmingṭhatna mahnia pumbilh tum hi chin loh nise’ a tih duh zawk hmel te ka han ti ve a nih chu.

- Varthanzama