MAU/ RUA (Bamboo) SAWNGBAWLNA

Mizoram leilung hi Mau hian a ngeihin a ṭo duh hle a, thinghmun ramchang pawh lo atan vat mahse a chul pawl meuh chuan mau a ṭoin mau hmunah a chang deuh zel a ni. Chutih lai chuan mau hmun, mau an lak rem tawhnaah chuan mau a ṭo zui chuang tawh lem lo. Heta ṭang ringawt pawh hian mau/ rua hian ze dangdai tak a nei a ni ang e tih awl tak a ni.

 

Zoram buai 1966 hma khan ramtang rual ka ni ve tawh a. In sak nan bang atan mau pawh ka sat ve hman a, khatia bang tur a nih avang khan a sah danah ka pa’n fimkhur a ngaih thu leh kum thum (3 years) mau lo chu sah a awih lova, kum thum tling lo sah palh a awl avang khan October thla aṭanga kumthar January thla chhunga sat ngei turin min hrilh a; kan mau sah te chu pakhatmah a nget a awm ta lo. 

Kum 2000 bawr vel chho aṭang khan mau hman ṭangkai pawh kan in tihhmuh chho nasa ta viau a, Zoram sum leh pai a tih hmasawnna (sustainable development) kawng pakhat ni ngei dawnin a lang reng a ni. Hetih lai hian mau awmzia hre lem loten an han sawngbawl chuan an thilsiam nget pawh a awm a, an hralh tawh kir leh tak pawh an awm niin a hriat. Heng thil hian Zoram hmel an tibal a, a chunga kan sawi ang hun a sah chauh khi lo hmang ta se tuna “Mizoram mau a ṭha lo” titu ṭhenkhat chuan an ti kher lovang. Chubakah Mizoram hi India ram state zinga pakhat ni ve reng si hian kan hmel a danglam avang hian Central India Officer ṭhenkhat lahin Mizoram thil hi ‘thil chhe bik’ anga sawi tum ṭalh an awm ve bawk. 

Kum 1974 daih tawhah khan Mizoram Apex Agri­culture Marketing Co-Op Society Ltd (MARKPEX) (a constituent of MIZOFED) khan Sawhthing chingtute hnen aṭanga sawhthing leikhawmin NAFED (National Agriculture Co-operative Federation Ltd, New Delhi) ah a hralh sak a. An officer ṭhenkhat chuan khatia phurh sen loh deuh thaw sawhthing an han leikhawm takah chuan Mizoram sawhthing chu sawiselna an zawng a, fibre a tam tite in sawi hnawm na an zawng a; mahse MARKPEX hotuten Technical Point a an hnial hnuah leh Bangladesh-ah Silchar vai hovin tam tham tak an thawn tak hnuah khan sawisel ngaihna an hre ta lo chauh a ni. 

Mizoram Mau/ Rua pawh hi kan hlawhtlin pui dawn nia a lan veleh Mizoram sawrkar hotute bulah chuan Mizoram Mau/ Rua a ṭha lo tih tum hrim hrim central sorkar official ṭhenkhat an awm ngei dawn tih hi hre lawk ila a ṭha ngawt mai. Mau/ Rua hmanga Industry din hi tunah hrih chuan a technology kan la nei tlem hrih ang tih chu a hriat a, a technology hi kan zawn thiam a pawimawh hle ang. Pu. R. Saikhuma of Chhingchhip chuan Mau/Rua hmanga Meihawla rawh dan Japan ramah a han zir a, Mau/ Rua meihawl leh Mau tui (Bamboo Vinegar) siam chhuah dan a ni ber mai. 

Tunah hian Maharastra State-ah pawh Mau Meihawl leh Mau Tui hi an siamchhuak ṭan a, an indaih lo hle a, Mizoram thleng thlengin lei tur an rawn dap tawh a ni. 

Mau hmang hian eng Industry pawh hi din ila Unit 100 tal awm sela, a siam­chhuah kha a leitu tan buaipui tham law law ni thei zel sela. Mau/ Rua hmanga kan thilsiam chhuah reng rengah, mau/ rua kan ngah si a. Tunah rih hi chuan a technology hi kan nei tlem rih hle a, a tam thei ang ber INBAR (International Bamboo and Rattan) kaltlangin China-ah in tirh nise chuan Technology kan neih belh thei ngeiin kan ring. Technology ṭha kan neiha Mizoram dap chhuak khawpa kan mau te kan hman ṭangkai chuan Zoram hi hmasawnna namen lovin min ṭhutchilh tawh dawn a ni. 

Bamboo Agarbatti Stick pawh kum 2007 hmalam khan nasa fe a thawnchhuak an awm tawh a, mahse, a square stick chi chauh kha a ni rih. Kum 2010 hnu lamah khan a market a awm tawh lova, Round Stick chi chauh a market a awm a, chu pawh chu South East Asia aṭanga lakluh an phal tak hnuah khan, a siamchhuah kha a hlawk chiah ta lo a ni. Tunah erawh chuan Round Stick lak luhah (import) sorkarin chhiah tam zawk a lak tak avangin a tih tlak leh dawnin a lang. 

Mau chungchangah hian beiseina sang tak kan la nei a, Mizoram Sawrkarin Bamboo Committee/ Board te dinin Bamboo Development Agency hial pawh a nei a. Heng Sawrkar hmanrua pahnih hian hmasawnna an thlen ngei beisei ila. Mau chungchangah hian keini Mizoram Chamber of Commerce and Industries te hian khawl chungchangah emaw a market chungchangah emaw kan phak tawk angin tu pawh mau chung changah lo puih kan inpeih reng e.