KERALA TUILIAN-AH KAN HIM E

Kerala tuilian avangin chhungkhat lainâ, ṭhenrual ṭhaten Mizo awmte chanchin in ngaihven tih ka hria a, ka lawm tak zet.

Kottayam khaw­pui hi a hniam lam­in an tuar a, kan chhungkaw awmna lai erawh a sang deuh a. Harsatna a awm lem lo. Kottayam city-ah hian Inrinni thleng khân ruah a sur reng a, electric ni 3 chhung a thim. Inkalpawhna kawng a ping vek a, bazar thlai lei tur a awm lo bawk.

Kawtlai a reh duk a, office, zirna eng­kim khar vek a ni. Thliarkar tlawhpawh loh kan ang ber. Chhanchhuah tur zawngin a chhun a zânin kan chung lamah helicopter a thlawk kual reng thung a. Pathianni aṭang khan tui a kam zel a, August 21 kha chuan ni a sa vawl vawl a. Ruah rei lo tê a tla zauh. Tui chim buaina pawh a ziaawm ta viau mai.

Kerala pumpui erawh a hnim ruih a ni ber. News lam­ah in lo hre tho ang a. Mizo pakhat chanchin kan hriat hleihtheih loh kha tûkinah a him tih kan hria a, kan lawm hle. Mizo zingah nunna chân kan awm lo.

Chhinchhiahtlâk deuh chu dawr thil tlêm tak karah eng thil mah a to phah lo a, inchuh boruak hriat tur a awm hek lo. A awm ang ang a rate a pangngai vek. Hotel, catering, kohhran, mimal, sawr­kar etc ten chaw leh riahna free vekin a mamawh tan an intheh lâr a. "Min rawn pan rawh u" tiin an address an thawn darh nasa hlawm hle. Ṭhenkhatin thawmhnaw, buhfai an lo khawn bawk.

An lungrualna a thûk hle. Tuk khat chu Kerala whats­app group pakhat­ah 'buaina karah Kera­lites mi­pui fakawmzia leh hmutu ka nih avanga ka lawmzia' thu sâp-ṭawngin ka post ve hial!

Tuilianah hian mi 400 dawn an thi a. Nuai 10 dawn lai­­in an in leh lo chhuah­san/ chânin chhan­chhuahna bûk lamah an awm mêk.

Mi mangangte tan Mizoram Kristiante ṭawngṭai zel ula.

- Rev. Lalbiakhlira