Fak tlak Power & Electricity department

Furpui lo thleng hian keini tlangrama chengte tan harsatna namenlo a thlen ṭhin. Lei min vangin mi ṭhenkhatin in leh lo, nunna thlengin an chan a; hmun tam takah lei tawlh leh kawng bal vangin kawng a ping a. Ṭhal laia kawng khu em em kha a lo diak leh ta em em a; Vawkhniakzawn thla a lo thlen meuh chuan hmanni lawka kawng siam thar ṭha em em pawh kha fur khat ruahtui tlain a nan pawp ta nge, a khuar lai hel a ngai leh ta chu a nih hi.

Power supply lah thli leh ruah vangin a khaihlak ve fo a, buh leh thlai leh thil nung tam takte tana malsawm ruah hian harsatna min thlen ve tho zawng a nih hi.

July thla tir lam khan Pathianni tuk khat chu electric siam tur hovin tukṭhuan ei tur an order avangin chhungkua kan inkhawm kim thei lo va. Pathianni em ema hna han thawh tak mai chu an ṭul viau a ni chek ang chu ka ti a. Mahse, an ṭul chhan kan ngaihtuah chiang a, ni khat leh zan khat power supply kan hmuh tawh loh avanga ‘kan tan’ a chhiatna lai zawng an lo ni.

Chhun thingpui kan in lai chuan kawtah motor ṭha tak tak SE, EE, SDO tih intar hi an lo ding khup khup mai a. Keia ngaihdanah kha chuan TMB-in MR te te (an huat thu ni suh se) an rawn phur khawm ang a, JE tuai deuh hovin emaw hna an thawk turah ka lo ngai a, a lo ni lo tawp mai. A lal lal, a thu thu, a hlawh tam tam kha a ṭul ṭulah an tang a, an naute tan chuan inkhawm sawi rik ngam pawh a nih hmel loh.

Tun hma chuan electric han thim zeuh khan eng dang ngaihtuah lovin a department lam kan mawh viau a, rei tak tak en loh chang pawh kan nei ṭhin a nih kha. Power khaihlak chhan hi kawng hnih lian tak a awm ṭhin a, power supply indaih loh vang hrim hrim leh a chhiat vang a ni.

Tun hma khan Mizoramin power supply duh khawp kan hmuh ṭhin loh avangin in en chhawk ṭul changte a awm a, tin, hmun ṭhenkhatah VIP ten programme an neih avanga han bawksik deuh chang pawh a awm ṭhin. Supply lamin a daih loh miau chuan vawi khata en rual theih ni hek lo, in en chhawk a lo ngai ta a, a thawktute duh danah en vek ni mah se a ngaihna a awm ngang lo zawk a lo ni.

Mahse, tunah chuan kan luite khuapin thawh chhuah tlem azawng kan nei ve ta a, a hma anga power indaih loh kha kan nei tlem ta. Hei vang hian power supply khaihlak ṭhin hi a chhan bul ber chu a chhiat leh chiangkuan loh vang a ni ta a ni. Thir ban hmanga power supply a nih avang hian fur pui lo thlena harsatna kan tawh ṭhinte hi chu sut kian hleih theih loh a ni a, mipuite pawhin kan hriatthiam a ṭul khawp mai.

Thir ban hmanga power supply kan nih avanga harsatna awm ṭhin leh a zualpui tal chin fel dan kawng hi mipui ten kan ngaihtuah a hun ve ta khawp mai. June ni 27 khan DC Conference Hall-ah Aizawl district-a MIMIR hnuaia project siam ṭha thlan chhuah 20 ten pakhatna nih inchuhin power point presentation hmanga intihsiakna kan nei a. Keini Seling khua ten power supply kan hmuh kikawi dan kan sawi khan hotute beng chu a verh ngei turah kan ngai.

Power kan chawk luhna hnar pui ber Zuangtui khu km 45 chauha hla a ni a, mahse, Zuangtui aṭangin Bukpuiah a phei a, Bukpui aṭanga lo let lehin km 300 chuang zet a kal kual hnuah kan dawng ve ta chauh a nih chu.

Heti ang hi kan nih avangin a ban chhia leh tlute avangin harsatna tam tak kan tawk ṭhin a, kan buaina sut kian nan ‘Implementation of 50 kw Solar Power Plan in Seling Village’ tiin solar thahrui chakna bun kan tum a, mahse kan hlawhtling zo ta lo. Solar power siam chhuak tura sawrkhar laipui hmalakna te, Mizoram sawrkhar ngei pawhin a ngaih pawimawh dante ngaihtuah hian he lam kawnga ke kan pen hi a pawimawh takzet a ni.

Thupui kan pensan thui hmain lut leh ta ila. P&E lama thawktute hian fur khaw chhia lo thlen chang hian ‘khaw ṭhat hun’ nghak ve ta ṭhin se chu kan thim rei tlat tlat ṭhin awm. Mahse, anni chuan power supply kan neih loh rual rualin eng vang nge tiin a chhiatna hmun an chhui nghal char char a, an hmuh rual rualin a thim a var pawh thlu lovin an thawk zui nghal mai ṭhin. Hmanni pawh kan kawmthlangah thing ro tluin thirhrui 6 (11 Kv line) ngawt a vaw chat pek a. Zan lamah min entir ngei an duh avangin khaw nuam lo deuh chungin nilengin an buai a, khaw thim dawnah barrel tia vel thing pakhat, kham kova awm kih ngei ngei ngai an hmu bawk a. Chhun khaw engin a daih lo, khua a nal em em mai si, torchlight hawh chawpin thing chu an kit a, dar 8 velah kan eng ve thei ta nge nge a ni.

Upa ten ‘Ṭampui mitthiin unau laina a kai chhuak a, mi kawlh sakawlhin pasalṭha a puang zar’ an tih angin fur khaw chhia hian department ṭhenkhat mualpho viau mah se P&E Dept. te thawhrimzia erawh a puang zar ṭhin a ni.

Hetia kan sawi avang hian P&E lama thawktute hi vanram an kai vek ang kan tihna a ni hran lo. An hna an ngaih pawimawhzia hi mipui ten kan hmuh thiampui a, department ṭhenkhat tan phei chuan entawn tlak tak an nihzia hi kan hriat a ṭul. An zingah hian ramhuai tuibur ngaina ve tak tak, hna ṭul loh changa awl em emte pawh an awm thei, mahse, lal hmei an sawi ang maia inrin ruk reng erawh an ngai thung a ni.

- R.Lalfakawma, Seling