Ramtiam chu khawiah nge?

'Zoramthar' tih kan 'ka' in a sawi mek laiin, kan nun erawh chuan 'Zoram chhia' a sawi mek a ni. Dikna in a ti zalen ang che, tih hi thu dik a nih ngai chuan, vawiinah hian Zoram mipuite hi kan zalen lo hle a ni.

Kan mihring nun hi a tlachhe zo tawh a, nun ber a tlakchhiat tawh chuan Biak In aṭang pawh­in beisei kan nei hleithei tawh lo.

Ram hruaitu kan neih tawh te hi in enlet duh sela chuan zak ngawih ngawih tur an ni. A bik takin ṭhalaite laka an mawhphurhnaah an hlawhchham chiang bal. Kan ram hi nakinah 'ṭhalaite kutah a la awm dawn a ni' tih hre reng chung si a, kaihhruaina ṭha an pek lohzia kan hre vek.

Vawiina ṭhalai an hnutchhiahte hi, kan tu leh fate hnenah kan rochun chhawn leh hma hian Zoram hi a tluchhe hman viau ang. Rilru corrupt nasa tak kan pe palh ang e. Ram leh hnam boral leh tluchhia kan hre fo, an chhungkua inenkawl dan dik lo ai chuan, ram hruaitute vang zelin a ni ram leh hnam hi a dinchhuah a, a boral ni. Chronicles bu kan zirah pawh a chiang hle.

Mihring hian benga kan hriat aiin, mita kan hmuh hian kan nunah thu a sawi nasa zawk. Chutiang chiah chuan vawiina kan ram hruaitute hian kan mit ngeia min hmuh tir chu 'thawk hah loa hausak min zirtir.' Dikna aiin hmelhriat ṭha ṭhain kawngro a su zawk, thiamna aiin tlin theihna tur pumpelh kawng min zirtir.

Principle nei lo Politician an pung a, party manifesto te hi thuneihna an chan theihna tura mipui min phiarrukna hmanrua an chang zo ta. Vawiina kan politician ṭhenkhat te tum ber chu, dawt a dik thei tur ang bera sawi te a ni a. Harsatna leh buaina eng emaw hlek a thlen a, a damdawi dik an chawh fuh hleithei der lo mai te hi enge a awmzia ni ta ang le?

Ram chu an hma­ngaih vek, mahse ram an hmangaihna hian an mit a tidel a, thil dik pawh an hmu hleithei tawh lo em mi? Politician ṭhenkhat te hi an sawi anga awm loin, an sawi loh zawk te hi an lo ngai pawimawh daih zawk fo.

Aw le, Zoram mi­puite in zawt i la, tu pawh hian zoram hi ṭha se, nuam se kan ti vek. Kan ṭawngṭaina tam berah pawh 'kan ram hi min dinthar leh se' tih hi kan dil ber a ni. Kan ram leh hnam dinthar leh tura kan kal zelna turah hian 'mihring zahawmna leh humhimna kan mamawh.

Kan chanvo kan chan ngei theihna tur hun, zalen leh inang tlang veka kan khawsak theih hun kan thlir mek lai a, kan ram hotu lu berin, 'Congress lo chu engah mah ka ngai lo,' tia a sawi han hriat chuan thla a muang lo ngei mai. Ram tiam chu kan la hlat awm ngawt mai.

- Prof. J.V. Hluna