Pu CM, Rangvamual bula Excise leh Police hi sawn vek rawh

Champhai lama pawl hrang hrangin kan Chief Minister hnena zak map lova dan kengkawhtu Champhai DC Pi Maria CT Zuali sawn tura an ngen ngam tawh avang khan keini dikna duhtu zawk hi chu kan ngawi mai mai tawh tur a ni lo va, Rangvamual zu zuar rualin, "Pu Chief Minister, RV leh a chhehvela dan lova zu kan zawrhna tibuaitu Police leh Excise department mi leh sate hi sawn vek rawh," tih nen a danglamna kan hmu ve thiam lo ve.

SMUGGLING DIK TAK

Myanmar lam aṭanga Champhai District lama kuhva rah rawn phurh luh hi dan lo a ni a, chu chu smuggling a ni. Smuggling hi silai tawlh ruk, rangkachak tawlh ruk, ruihhlo tawlh ruk tihna ni lovin dan lova thil tawlh ruk hi smuggling a ni. Oxford Learner's Dictionary kha lo keu ve ta mai mai ula, chutah chuan Smuggling chu, "The crime of taking, sending or bringing goods secretly and illegally into or out of a country," tiin a inziak kuau a ni. Oxford hi in la pawm lo a nih pawhin a unaupa Cambridge Dictionary chuan smuggling chu "The crime of taking goods or people into or out of a country illegally," tiin a dah leh tawp a ni.

Myanmar lam aṭanga phalna nei lova thil lakluh hi smuggling a ni. Hei hi a lo hlawk deuh a nih pawhin sawi mawi chi a ni lo. A phurtu lirtheite pawh kha in lo hlawk deuh a nih pawhin smuggling avanga hlawk mai mai in ni a, smuggled goods ni lo dan anga lakluh leh phurh kual tur Mizoram chhungah thil dang zawng ta mai zawk ula, smuggling tihtawp tumtu DC huaisen sawn tura Mizoram mit hmuha mahni DC sawn phuta in lo au rual ta pawh hi Champhai District mipui hi an inthurual ka ring thei lo a ni.

CHAMPHAI, INNGAIHTUAH RAWH

Champhai hi 'Mizo khua' inti ngat ṭhin kha an ni a, 'Zokhawpui' an inti ṭhin tiin an sawi a ni. Champhai District hi District ṭhenkhat ang lo taka kawng hrang hranga Mizo bik lehzuala inngai an nih mai bakah; khawhar hla sak dan thlenga a dik bika inchhal an ni ṭhin a, Tuipui Ral han tihte pawh hi zai lamah te, culture vawnhim kawngah pawh dik bika indah an ni ṭhin a ni lo'm ni le?

Kuhva phur tàwnah in tlawm mai dawn em ni le? Champhai District chhungah hian kuhva phurh vanga ding chhuak leh hausa hi an tam a nih pawhin a a sum tel ve miah lo hi a tam zawk in ni a, tute emaw hlawkna um avanga in khua leh in district hmingchhe mek hi in phal em ni le? Aw, Champhai District mipui, Mizo hnam zia vawnhim kawngah pawh mi dang chunga leng nia inngaite u, tunah hian in khua leh in district chu sum ûm leh hlâwkna a nih phawt chuan dan lova sumdawnna pawh duh em em, mahni thuneitu pawh sawn tura CM hnena hek duh khawp thinlung pu angin District dang mipuiin an hmu tur che u hi in phal dawn em ni le?

SORKAR, I AW CHHUAH RAWH

Mizoram sorkar hi Mizorama roreltu tur an ni a, Champhai District chhunga dan lova kuhva phurh luh leh; Mizoram pawna an phurh danah hian ro pawh rel ngam lovin mei khupin i ṭhu nu reng mai dawn em ni le? Kan sorkar hruaitute u, mipa takin in puan veng ula, he thil hi in hmachhawn ngam dawn lo em ni le? Sorkar hruaitu ṭhenkhat kuhva tawlhnaah an inhnamhmawih tia an puhna hi a tak emaw kan tih theihna tur hian ngawi reng lovin; in dikzia tilang tur khawpin dan lova sumdawnna smuggling lian tak hi rawn titawp rup ta che u.

Champhai District chhunga MLA kan neihte pawh hi in hawina lam tilang ngam ta che u maw le! Kan ram rorelna in sang bera ṭhu tlak khawpa mipuiin an ngaih in ni a, kuhva sumdawnnaa inhnamhnawih mi 1,000 pawh ni lo vote hi nge in duh; dikna duh Mizo mipui tam zawk vote? tih hi lo inbûk tawh rawh u le. Kuhva sumdawng mihausate hian inthlan dawnah candidate te nuai tam takin an pui kual a, chuvangin MLA/Minister pawh an che ngam lo an tih titi khawchang hi a dik lo tih rawn fiah turin in au chhuak ngam dawn em? In ngawih reng chuan an puhna che u hi a dik tiin miin an puh chhunzawm zel palh ang che u, kan Pute u.

POLICE HMINGTHATE U

Ruihhlo a ruka an fûn; rawn lut pawh a ni lo va, truck trip lian pui pui kan kawngpuiah a tlan tlang a, hei hi Police kan neihte hian an titawp thei a nih loh chuan Police-te hian an man hmak hmak thei ang tih hi ka kutphah tih tlukin ka chiang a ni. Police berin an man si lo va, Police ṭhenkhat an hlawh zat kan hriat ve reng; in lian pui pui sa leh hausa thur thur kan hmuhte nen hian a inzawm lo chung chung hian kuhva rah tawlh ruk hi miin sawi zawm ta se, kan khaw tual leh kawngpuiah kuhva hi tawlh reng si se, Police hming ṭha tawh sa kha a chhe zo dawn asin.

Kuhva rah tawlh ruk hi Custom lam chiahin an man thei niin dan hre mite chuan an sawi a, mahse permit dik nei lova lo lut ru na na na chu an lirthei hi an tiding thei a, chu chu kan Police te hian an duh leh duh loh a ni mai. Police te che thei lova siamtu an awm vang nge, Custom kuta an dah vang nge? tih zawhna hi keini tan chuan chhân theih a ni lo va, kan Police hming ṭha tak takte u, khawngaih danin kan khawlaiah smuggling lirthei hi tlantir tawh lo teh u. Kan tu leh fate mit hmuhah hian smuggler te hian an lirthei hi Zoram kan pi leh pute sah chhuah ramah hian an kaltir zel hi in phal bik em ni? Aw, Police hotute u, ngaihtuah chiang teh u, kan ramah hian smuggler te hian an duh dan danin an lirthei hi an tlan tlangtir zel dawn em ni? Police hmingṭhate u, huaisen takin lo dang teh u.

YMA, YMA RAWH AW

Central YMA hi mi tam tak chuan awm kher ngai lo, thil ṭul lo, mi ṭhenkhatte politics kailawn mai mai, sorkar apiang tlawna sorkar pawh dodal ngam lo tiin an sawisel ṭhin. Central YMA ngawi reng kan neih chhung kha chuan hei hi a dik dawn niin kan lo ngai hman a, Central YMA an inthlan ṭhat rualin Myanmar aṭanga kuhva tawlhruk huaisen takin an rawn dodal nghal rup a, chu mai ni lovin YMA member te pawh kuhva tawlhnaa tel ve lo turin an ngen a ni. YMA a rawn par vul thar leh ta.

Aw, YMA hruaitute u, in thurualpui leh thawhpuite nen han do tak tak ula, a tirah sawiselna chu a awm a nih pawhin; Champhai Sub Headquartres chhungah pawh hian kuhva tawlh hnawksak titu leh dikna duhtu hi an tam zawk daih asin. YMA hian khaw tinah huaisen takin check gate siam ve mai teh u, dan lo a nih pawhin kuhva tawlh pawh dan a ni bik chuang lo va, kan Police-te check gate an kal tlang hmiah hmiah mai bawk si.

YMA hi an YMA ngam a nih chuan Champhai DC sawn tura CM ngen hial ngam pawl hi chu an biru ve tawh ang. RV zu zuar dan bawhchhetute pawh an ngawih mai mai chhan chu dan bawhchhia tih an inhriat avangin an eizawnna atana hnawk an sawisel ngam lo, dan bawhchhiaa sumdawnna chu dan bawhchhiaa sumdawnna a ni hlâwm tawl mai a, CM hnena DC sawn tura dilna chi a ni lo va, YMA hian DC a thlawp thu a chhuah ngam tawh bawka YMA hi YMA tlang ngam se a ṭha ber ang.

- Lalmuanpuia