Sorkar thuchhuak a inkalh

Mizoram sorkar chuan hun eng emaw chen zana inkhawm leh puipunnaah mask vuah chunga zaiho a khap loh hnuah tunah hian a khap leh mek a; mask vuah chung pawh ni se, zaihoin Covid-19 hripui a tidarh niin an ngai a ni ngei ang. Mahse, zai chungchangah hian sorkar hi a mumal lo ve deuh em aw, a tih theih.

IPR department press release-a tarlan danin, November 10, 2021-a SAD Conference Hall, MINECO-a Health Minister Dr R Lalthangliana hoa State Level Expert Committee on COVID-19 Management an ṭhutkhawmnaah, mipui punkhawmnaah a huhoa zai a la him loh thu Expert Team-in an sawi tih tarlan a ni.

IPR presss release-ah chuan, "...a huhova zai leh ring tak taka au hi mask vuah ṭha chung pawhin a him tâwk lo tih khawvel hmun hrang hranga an zir chiannaah tarlan an nih thu an sawi a," tih a ni.

Chief secretary Pi Renu Sharma-i'n December 1 aṭanga January 15, 2022 thlenga SOP hman tur November 30, 2021-a a tihchhuahah erawh chuan thu a dang leh a; mask vuahin zaihonaah pawh ni se, mi dang kài chhâwng tur 86% laiin a vèn/dan thu tarlan a ni thung.

November 30, 2021-a tihchhuah SOP-ah chuan, "Mask vuah lova thusawi leh zai a him lo a. Ṭang taka kan ṭawng emaw, kan zai hian aerosol (chil per sín tak, boruaka chámbáng rei si) kan phuh chhuak a. Kha aerosol kha hma zâwn ft. 4 zên zâwn (1.3 metres) thleng kan phuh chhuak thei a. Ṭha taka mask kan hrên chuan hma lama aerosol chhuak tur chu kam sír/biang lamah emaw, lu lamahte mask chuan a lo dang per a, a léng thui lo bawk a ni. Kan lo positive a nih pawhin, mask tlángláwn (surgical mask) chauh pawh uluk taka kan hrên chuan kan chil per aṭanga mi dang kan va kài chhâwng tur hi 86% laiin a veng a ni. Chuvangin, mi dang hnaiha thusawi lai leh zâi laiin uluk taka surgical mask tal vuah ṭhin tur a ni," tih a ni.

Nikum November 10-a sorkar thuchhuah leh a hnu ni 20 leka SOP-in an tarlante hi a inkalh tlat mai a. Kan ram bikah zir chianna awm chuang lo leh 'Khawvel hmun hrang hranga zir chiannaah' tihte hi a taka hmuh tur awm chuang loin, rinthuin an ti mai mai emaw ni chu aw, tih mai awl tak a ni. 'Zirchiannaah' an tih fo pawh hi zir chian a ni rêng em, tih pawh ngaihtuah theih tak a ni bawk.

Eng pawh ni se, mipui vantlang nun khawih thil a nih avangin fimkhur zawk leh behchhan mumal deuha kal zel theih ni se a duhawm khawp mai a; chutiang tur chuan sorkar leh kan mithiamte pawh ka'n ngen ve a ni e.

- Kezo