ZORAM A HAHCHHIAU

Ṭum khat chu zawhte hmai leh taksa an chei chhe lai ka hmu a, darthlalang a hmaa an dahah chuan a inen a, a buai pha miah lo nia! Tihfai tum ta chûk emaw, mangang phili leh buai ta viau tura ka lo beisei vang pawh a ni mahna le.

Zoram Khawvel Pa Pu L.Keivom (L) khan 'ti hian a sawi a, "Mizoram a hahchhiau chuan khawvel hmun hrang hranga Zofâte pawh kan lo hritlâng ṭhin a ni" tiin. Tunlai kan hun tawn mek thlirin Zoram a hri­tlâng mek, a Covid emaw Omicron ve hial maithei zawk! Zofâte min tipumkhat tlattu a awm, chu chu thumal syllable lam li a vuah a ni 'inlungrualna'.

History chhui theih chinah Zofâte inlungrual ber ṭum chu 26th July 2021 kha a ni maithei. Hnam dang nen a ni emaw issue lian tham thlengah chuan Mizo nih a nuam. Lungrualna hian kan in unauna hi a tipumkhat tlat nia.

Chu hnam ropui nih chu SEDP sem hun ngawt nghaka thlamuanpui tham tur a ni lo. Chu hnam chhunga cheng mihringte chu an dik em? An rinawm em? Thu dikah an huaisen em? tih hi a pawimawh ber.

Pawl leh party bakah an pumpui chauh hmangaihtuten a ṭhenawm pa a ṭâm em? Natna tuarin a damlo em? tih a ngaihtuah thleng lo a, ram leh hnam hmasawnna takngial pawh a ngaihtuah thleng tawh lo ṭhin.

Hlawkna leh hausakna umin mi chanai an ei a, zah a inkiltawih ahnêkin chawimawi rawn an hlawh a, a chang chuan parṭhi an awrh nawlh nawlh zel nia.

Smuggler kan tih dan lova chete do tura mi huaisen, kan ram tana 'Che Guevara', tawrh phah hial dawn pawha dikna tlangaupui duh tlat mi, âwm nem zawk a ni emaw derdep vang mai a dawt tui nû a inchirhtheh ve lo, he ramah an la awm pheuh pheuh hi chu mihringte lakah hian kan Lalpa khi a la beidawng lo a ni tih a chiang!

Hmaithing­hâwng vuahten chhung lamah ram an tichhe mek a, thihpui loh natna, hripui ni lo min kai a nih hi. Mi dik lote vangin thil ṭha leh dik duh ngam an na tawh a, an na mek zel.

Ram siam ṭha turin politics leh kohhran hi kan sûtpui vawn tlat dawn nge, kan inenfiah zawk dawn? Zoram a hahchhiau a, a hritlan mek lai hian, thu dika ding ngam loten "I duhzawng vana miin an tih angin, leia miten ti rawh se" tih hi an la sawi lui zel ngam ang em?

Duham leh hma­sialnaa khatte avangin kan ram leh hnam hmai a bal a, darthlalang hmaa ding mek kan ni bawk. Ran â kan tih zawhte hmai bal ang lek kha kan ni dawn nge thovin kan inthingharh dawn?

Ram leh hnam hma lam hun tur chu i duhthlannaah a innghat tawh e.

- Rosangzuala, Salem veng, Lunglei