Kan ‘experienced politician’ te

Tunlaia titi awm reng mai chu ‘ṭhangtharte khawvel’ tih hi a ni a, ‘ṭhalaite khawvel thar’ tihte hi ruling party Congress hian an sawi ri sek bawk a. Heng boruak karah hian kan mi hmasa leh tawnhriat ngah, kawng hrang hranga mifing leh fel tak takte iai a, an ṭhatna tak pawh la finfiah loh kum naupang lama kal kan intihhmuh nia a lanlai hian, ṭhangthar apiang an ṭhain an fing bik lova, tawnhriat ngahte hi an ṭhat lohna ka hre lova, political party-te hnenah he thu hi puanzar hunlai niin ka hria.

Whatsapp leh social media thu hi rintlak kher lo mahse MNF thu kual velah khan kan MLA neih pawha ‘clean’ ber pawl leh mi thiam, MA-ah pawh ‘gold medallist’ ngat Pu Lalchamliana hming ka hmu lova, a mak ka ti hle.

Ani hi vangvat kai mai pawh ni lovin MNF sorkar lai pawha an hmel timawitu leh an hming tiṭhatu a ni a, Minister term khat a ni chunga hausa ve miah lo a ni a, Speaker a nih chhung pawhin a rorel a lai a, mi ṭa leh mi dik a ni. MNF hian an paih a nih ngat chuan an châk lo ang chu!

MP hlui Pu Lalhmingliana hming ka hmu lo bawk a, ani hi MNF politician kumhlunah chuan lehkhathiam zinga mi a ni a, MP a nih chhung pawha a khawi zawng pawha mi hmingchhe lo a ni.

Lehkha chhiar zau a nih bakah party-ah pawh rinawm taka rawngbawl ṭhin a ni. Tun hi MNF tan chance ṭha, kum 10 opposition an nih zawh tawh hnua invawrh chhuah lehna hun remchang a nih vangin MLA candidate hi chu a ni ngei turah ka ngai a, MLA candidate-ah a lang dawn lo a nih chuan ani dinhmunah hian ding ila chu MNF hi chhuahsan kan rilruk duh hial ang.

Pu R Tlanghmingthanga hming ka hmu lo leh a, ani hi chawlh hrim hrim a tum a nih loh chuan MNF tha tichaktu zinga mi a ni. Titi ṭhenkhatah chuan amahin chawlh a tum an ti. Chawlh a tum tak tak a nih loh chuan ding leh se a tlin leh ngei a rinawm. Pu K Vanlalauva, Pu Rualchhina etc hming ka hmu lo bawk a, anni hi kaih thawh tumna a awm tawh lo em ni ang, tih ka ngaihtuah rauh rauh mai.

Congress lam titi hi kan la hre tam lova, anni hian Pu Lal Thanhawla, Pu R Romawia, Pu JH Roṭhuama leh Pu Hiphei etc hi inthlan hnuhnung ber khan an la vawrh tling tih kan hria.

Tunah chuan kum 80 tling tawh leh 75 chung lam an ni fur tawh ang. Chutihlaia Pu Chama, Pu Hminga etc te an vanglai a la pel lo a, an finna leh an tawnhriat a ṭha si a, MLA mai ni lo cabinet minister hial ni thei tura lang ni si, titi ah an lang pha miah lo mai hian min barakhaih a, ‘experienced politician’ kan tih zinga ‘lehkhathiam chin’ hi chu eng party pawh ni se ram hian a mamawh hle a ni.

Party tinah hian ‘ṭhalai an ṭha’ hi kan han ti thla zen a, kan politician zinga ṭhalai kan neihte hi an ṭhat em em bikna han hmuh tur hi a vang a, a upa tawhte nen hian danglamna hmuh tur awm mang lovin an tâl vel mai mai a nih hi. Ṭhalai tih ai chuan ‘lehkhathiam’ hi dah pawimawh ila, degree lam ni lovin ‘mithiam’ tia sawi tur chin ang hi dah sang ila, chung mite chu kan koh chhuah theih chuan ṭhalai an ni emaw, ṭhalai tawh lo deuh pawh ni se ramin an ṭhatpui zawkin ka ring.

Tawnhriat ngah, lo inzir fing tawh, thil tam tak lo tuar tawh, kawng thui tak lo zawh tawh, party tana hrehawm zawng zawng lo tawn tawh, party chhiat ber lai pawha rinawm tlatte hi party hian hre reng se, mi thiam an nih phei chuan nakin zela ram tana chenfakawm tur an nih a rinawm.

- Lalhmunmawia, Chaltlang