Kan mi pawimawhte zin ṭhin hi

Hman deuhah khan tuna kan Chief Minister hian ram pawna zin a uar khawp a, a hming chuan ‘sawmna’ chu a dawng ṭhin ngei niin a lang.

Tunlai hian UD&PA leh Ai­zawl Municipal Cor­poration lam kaihhnawih hian zin hi an han uar khawp a, a khat tawk hian Sapramah an awm leh heu ṭhin a, kan khawpui lamin hma a sawn phah em em lo a ni mai thei; an zin hma leh zin hu hian a danglam miah lo.

Tun hnai deuhah khan UD&PA Minister kha a zin a, amah mai ni lovin sorkar official-te nen an inzui diah diah mai a. Europe-a hmun nuam deuh deuh an fang a, kha kha kan hlawkpui ta em? tihte kei mi mawl hian ka hre lova, ani zin kha chu politics zawngte khan beih a han tawk deuh kha a ni a, an insawifiah danah chuan, “Mi­zoram Sorkar UD&PA department hian AMRUT hnuaia Urban Re-forms an kalpui chu hna an thawhṭhat em vangin kum 2015-2016 khan cheng nuai 163 leh kum 2016-2017 khan cheng nuai 180 incentive an dawng a.

Incentive an dawn aṭanga 10% (cheng nuai 34.3) hi a rawn petu Govt. of India (GOI) chuan ram pawn zinna (exposure visit) atan rawn dahsakin a phalsak nghal bawk a ni.

Minister leh sorkar officials pathumte hian zin nan Mizoram sorkar pawisa an hmang lova, GOI-in pawisa a rawn dahsak leh phalsak hi hmangin an zin zawk a ni,” an ti a, ka pawm thlap mai. An thu sawi hi ka pawm thlap a, mahse ka zawhna chu an zin hi Mizoramin a hlawkpui em?

Kumin kum tir lam kha a ni tain ka hria, USA-a Smart City Symposium & Exhibition tihah AMC Councillor pahnih (ruling leh opposition) an zin leh bawk a, an thil hmuhte kha media lamah khan an puangzar a, an kalna kha an hlawk pui em em ang tih ring mah ila AMC hnathawh dan kalphung chu a la danglam chuangin a lang lo. A zina te tan chuan USA hmuhna hun ṭha a ni maiin ka hria a, chu chu ṭangkai takin an hmang a, mahse Mizoramah erawh AMC hian hmasawnna thar an neih phah awm ka hre miah lo.

Tunlai hian Eu­rope-ah pawh khual­zin (tourist) hip deuh deuh ramte fangin AMC Councillor lam hi an zin kual leh diah diah a, hei lo pawh hi mipui hriat lem loh hian AMC official te hi an zin chhuak leh nawlh ṭhin an ti. Tin, UD&PA lam pawh hian zin tur hi a khat tawkin an nei ṭhin e, an ti bawk a.

Mi faten an thei a, an tlin a, an cho a, an zin a ni mai. Hengte hian Mizoram sorkar pawisa an hmang lo turah ngai ila, kan budget ei hek lova an zin thei a nih chuan a ṭha a, ka zawhna chu “Mizoramin a hlawkpui em?” tih mai hi a ni.

- Lalremruata Hnamte (Maruata)