Chanchinbu versus Sap Sikul

Inkharkhip hun chhung khan ni tam fe chu Aizawla chanchinbu liante'n a lehkha-in chanchinbu an chhuah thei lova, chuvangin portable document format (pdf) hmangin social media kaltlangin an sem a. 

Khatih hunlaia an chanchinbu tihchhuah man kha an chanchinbu latute hnenah an laksak lo. Hetih hunlai hian editor leh reporter-te chu an hah ngaiin an hah reng a, nidang ang bawkin hna an thawk rim a ni tih mit ngeia hmutu zingah ka tel. An chanchibu latute hnenah pawisa an la lo mai ni lovin, inkharkhip avanga chanchinbu sem thei lo, chanchinbu semtute chu an sem man hu aia tam pe-in an la ṭanpui zawk a ni. Mizorama kan chanchinbu liante an ti ṭha hle mai a, lukhum phawk meuhvin chibai i buk ang u. 

Hetiang a nih lai hian hman deuhva ka thil tawn sawi chak ka nei. Kan naute sap sikul (English medium school)-a hostel-ah kan dah a. Zirna kum thar (academic session) hi April a inṭan a ni a, March thla bul lama admission kan tihfelin hostel fee Rs 6,000 kha March thla atan kan pek nghal a ngai a. Hemi thla pum hian hostel-ah an awm lova, an hostel chaw bar khat pawh an bar lo. 

April thlaah pawh thla laihawl dawnah an lut chauhva, chutah pawh a bikimin Rs 6,000 tho kan chawi leh. December thlaah te sikul an kai kim lovin hostel-ah awm reng lo mahse an awm man kan chawi vek a, sikul kai tan leh hma (academic session tawp) chawlhah pawh chuti tho chu a ni. Hei hi chu em em a, ka ti deuh. 

Chanchinbu en­kawl­tute hian an chan­chinbu kan dawn loh man hi min rawn dil sela kan bengchheng ngawt ang. Chutih laiin mimal eizawnna ve ve-ah sikul lam thiltih danah chuan kan phunnawi lo viau mai a. Thil dangah hian kan thikthu kan tichhe viau lawi a. A chhan phei chu ka hre bik chiah lo. 

Thawh loh hlawh lak hi chu a fel chiah chuan ka hre lova, Sap sikul neitute sum siam dan ṭhenkhat hi chu a lutuk ka ti viau bawk. 

Thawmhnaw leh a behbawm, zirlai nu leh pa/ pi leh pu in kan lei ngei ngei ngai, mahse, an zirna atana chuti taka ṭangkai lem si lo hi a tam viau bawk.