Remna saui tan tih kha

Health Minister Dr R Lalthangliana chet ṭhat fak chunga Chief Minister Pu Zoramthanga beih nuam ti chunga Congress lam rawng­kai tak mai article 'Remna Sa ui tan a hun' tih kha ka lo chhiar ve a. Kha kha chanchinbu article inchhang kual velah a tawp mai mai dawna ka rin laiin Health Minister ber khan Chief Minister nen an inkar a ṭhat thu leh an inkar boruak engmah a awm loh thu kha a thusawiah khan a rawn sawi chhuak ve tlat mai a. Article ziak naran ngawih bo pui mai tur nia rin kha a rawn ri ta hluai kan ti thei awm e. 

Keini politics lama hnuhma nei lo leh ral thlir tan chuan kha article hrim hrim kha chu huat tur awmah ka ngai lova, kha aia na khan politics-ah chuan an inbei ṭhin. 

Facebook-ah phei chuan thu hriam tak takin an inbei vak vak ṭhin a, chuvangin huata lak turah ka lo ngai lo ve ringawt a, Health Minister a rawn ṭawng chhuah kha chuan, 'Ekhai a, kan ngaih aiin thil hi a lo serious thei dawn a nih hi a' tih ngaihtuah­na kan nei rum rum hman dawn a, mahse thil awm dan han thlir han thlir hian Healh Minister leh CM inkar boruak chhia ni lovin Opposition lamin boruak chhia siam an tum vang niin a lang ta zawk tlat mai. 

Kawng hnih aṭang thlir theih thil awmah hian Health Minister leh CM inkar a boruak awm tak tak lo, politics hmanga thiam taka kal pui tum na mai mai a nih hmel ta zawk a ni. 

'Remna sa ui tan' hi a hun kan ti a nih chuan Ruling Party leh Opposition party zawk hian Covid - 19 chhung bik atan hian Remna sa ui chu tan zawk rawh se. Mizoram zawng zawng kan inpum khat a ṭul hun laiah hian party leh party lam hi lo ri ve sek lo zawk se, chanchinbu leh Facebook leh Whatsapp thleng hian party hi chu dah ṭha ila, inremna lam hi i zawng tlang tawh zawk ang u khai.