MNF ngei hian do ngam ula

MNF in lo ni hi in sual lo e. In pute zawng zawng pawh an dik lo vek lo ang. Mahse, a thunei zual tlemte, rilru dik loten Mizoram heti taka an chinglet hi an thlavang hauh loin, MNF ngei te hian han do ngam ula, kan ram chuan hma a va sawn dawn em aw! Chutiangin Party dang pawh hian Party ruih chilhna bansanin, mahni Party a mi dik lo apiang hi an thlavang hauh loin hnawl ngam ila, mahni Party ṭheuh a dik lo ho hi a thianfaitu, khalh ngiltu ni ngam ila ava ṭha dawn em...

Party worders-te hi kan mutan:
Party Worker-te bawk hian hruaitute zawk hi kan nawr dik lohna chin a awm nasa thei viau mai. Dik taka thil an tih dawn chuan kan phal lo zawk tlat zel. Mak ve mai mai tak a ni, hahthlak bawk si. Kan ram mutan pakhat a ni.

Mi dik apiang worker-ten kan vau a, kan party mi hleihluak taka an duhsak loh emaw, kan mimal hlawkna tur a thu an tihtluk loh chuan 'Ka campaign pui vanga tling i ni lawm ni, keimahni vanga hetiang dinhmun thleng hi i nih kha,' tiin kan kawk sawk sawk a. Anni lahin tlin nawn leh loh pawh huama Lalpa ṭihna avanga dik taka kal tlang aiin, a duap zawkah ṭangin, chân hlauh vangin thil dik lo an tih phah ve fo mai.

Party worker-te ṭheuh hian a dik lo apiangte hi, 'Engatinge hetianga dik lo taka i tih? Kan puihna avanga hetiang dinhmun thleng hi i ni lo'm ni?, Dik takin ti tawh rawh. Ram tana dik taka in thawh hian mitinin kan hlawk pui' ti ngam zawk ila, kan khalh ngil thei awm si a.

PATHIAN ZAH LO:

Opposition nih lai chauha ram hmangaih, a fawng chelhtu nih veleha a hmaa mite tih dik loh ang bawk (a aia nasa pawh a ni ang chu)-a che ve zel kan han nite hi a mak ngawt mai. Pathian aiin Party kan hlau zawk a, ringtu kan inti ve reng bawk si. Biak Ina pawndum bahtirtu khan Biak In a zah lo kan ti a ni thei e, Pathian a zah lo erawh kan ti thei bik lo ang! Sim duh si lo, sual tinreng zak kêp chungin, a lang a mawiin Biak Inah Pathian be turin kan kal a. Biak Ina kan awm lai reng pawhin 'Eng tin nge ka eiruk ang, eng angin nge mipui ka bum ang' tih kan ngaihtuah a. Kan tih dik loh sawi mawina tur leh kan sual khuhna tur, Party side nei ranin Bible thu behchhan kan zawng a, a dik lo lai apiang sawi mamna kan ngaihtuah a, a taka Bible thu nunpui tum miah si lo leh a taka Lalpa ṭihna nei miah si lo hian Pathian hming kawrah hmangin, rawngbawltu nih kan hreh lo. Hengho hian Biak In an zah a nih pawhin pawndum bahtirtu aiin Lalpa an zah bik lo tih a chiang e. (Pawndum bahtirtu khan Lalpa a zah lo em tih erawh kan hre lo)

MIPUITEN POLITICS KAN THLIR DAN THLAK A HUN:

Mipui mimir hrim hrimin Politics kan hmuh dan a dik lo nasa tawh a, Politics a nih avangin engkim leng leh thiangah kan ngai ngawt mai hi thlak a hun ta e. Hetiang a nih avang hian Politics-a inhmangho chuan engkim lengah an ngaih phah a, mipui lahin, 'Politocs a ni a, duh duhin lo che vel mai mai rawh se, Kohhranah emaw YMA-ah emaw, hmun dangah an rawn lak luh loh chuan a tawk' kan ti mai a. Kohhrana thianghlim tak kha politics khawvelah a duh duh danin kan taltir leh phal si a, kan thikthu hi i tichhe tawh teh ang u. Politician lo kal hmasaten min tikhaw lo zo tawh a, dawt sawi, mi rel, inbum, tih theih loh tur intiam, sum sem, vote lei zawng zawng a thiangah kan ngai zo vek tawh. Hawh u, Politics, a tel loa kan khawsak theih lohna hi thianghlim taka khelh turin i beisei tawh teh ang u. Chutianga ti lo, hmanlai politics, mipui bum tum, dawt leh therhlo hmanga inlei tlin tumte hi hnawl ngam ang u. Politics a nih vanga ṭawp deuh pawh kan en liam zel chuan, ramin kan tuar leh tho si a, a buaithlak.

RORELTUTE AIIN PATHIAN ZAH ZAWK TAWH ANG U:

Kan ram heti khawpa suasam a, an duh duha chinglettute hi vantlang hmaa an inlan laite hian mipuite hian au-el khum ruih ruih tawh zawk tur kan nih laiin kan la intlawnsiak emaw tih mai tur a ni a. Roreltu dinhmun hi a zahawm, chutihrualin roreltu dik lote hi chuan zah an phu bîk lo. Dawt min hrilh a, mipui kan retheih laiin anni'n an bank account an lo tipung thur thur a. Lem changin, an eiruk sa hmangin mi ṭhenkhat an han ṭanpui der leh vel a. An sual khuh mawina mai mai a ni. Thinlung lam thlirtu Lalpa tan hian tenawm mai an ni si a. Roreltute aiin roreltute chunga thuneitu Lalpa hi mipuite pawhin i zah zawk ang u.

MIMALA SUM MIN PEK AIIN DIK TAKA SORKAR A KAL HIAN KAN HLAWKPUI ZAWK:

Inthlan dawna pawisa tlem te emaw, contract min tiam emaw, Rs. nuai 2/3, sing 2/1, sang nga emaw min pek hian kan lawm ve em em a. Mahse, kan thla khat electric bill pek man pawh a daih ngawr ngawr emaw a ni lek chauh si. Pawisa min pe loin, contract min pe lo mah se, dik taka thil an kalpui a, sum a hmanna turah dik taka sorkarin a hman chuan mipuiin kan chawi tur tam tak hi a tlahniam ang a, chu chu kan tan vek a ni a, an sum min pek tlem te ai khan awmzia a awm zawk tihte ngaihtuah ve tawh teh ang u.

- Johny Hmar