Inkhawm loh chhan

Hripui kai an pun leh deuh avangin thuneituten dawr in hawn chhawk tur an ti leh a. Dawr nghaktu pawl chuan Chief Minister an hmu vat a, dawr hawn vanga hri a darh loh thu sawiin an harsatna te an thlen tih kan hria. CM pawhin dik a ti a, hma laksak nghal a tum thu a lo hrilh a ni.

Zan inkhawm leh inkhawmnaa zai khap a ni a. “Chhun­ah aiin zanah hri a hlauhawm bik em ni… eng vangin nge an khap… kan inkhawm hi a duh duha a khap tur a ni em… Mi thiamte chu tute nge…” tiin sawrkar kan dem luih luih a ni ber.

Sawrkarin koh­hran thu a ngaih­pawimawhzia hi hai rual a ni lo. Inkhawm vanga hri kai an pun phah lo a nih chuan kohhran hian dawr­kai pawl ang hian zan inkhawm chu a dil ve mai tur a ni.

Inkhawm kan duh tak tak a nih chuan kohhranin ngenna kan siam ang a, aw kan chhuah ang a, chu ti taka inkhawm duh chu min khap reng bik lo ang. Fimkhur taka inkhawm turin min tih mai a rinawm.

Sawrkar hi a fimkhur a, mi thiam mai bakah tlawmngai pawl leh kohhran rawn chungin thil a ti ṭhin. Mi thiamten inkharkhip hlih a ngai ṭan an tih pawh khan MKHC lamin inkharkhip chhunzawm turin an ngen a, mi thiamte thu aiin kohhran hruaitute thu a awih zawk a nih kha.

Eng emaw tih fuh loh deuh a awm pawhin sawrkar chuan keimahni thuin kan ti lo, kohhran leh tlawmngai pawl nena ti kan ni an tizel ang.

Inkhawm vanga hri a darh ai chuan inkhawm loh mai tur a ni. Inkhawm khap a nih vang hian sawrkar hi demna tur a awm lo. Inkhawm kan duh tak tak chuan kohhran hruaitute hian fimkhur taka inkhawm hi dil ve mai tur a ni ang.

Kan inkhawm loh chhan hi sawrkarin min khap vang aiin kohhran hruaituten inkhawm kan dil loh vang a ni zawk thei.

- Lalmuanzova Khiangte, Lunglei