Hna zawngte tana siam National Career Service

Mizote hi thiamzirna lamah theihna sang tak nei kan ni a. Training mumal tak nei thei phei ila chuan kan theihna leh thiamna hmantlak lehzuala chhuak tur pawh tam tak kan awm a rinawm.

Tunlai ṭhalaiteah hna neih loh vanga zahna a nasa a, theihtawp chhuahin an zawng tak tak tawh a ni. Hna thawh tur duh si, zawn dan thiam lutuk si lo, puih ngai pawh tam tak an awm tih a hriat.

India sawrkarin hna zawng mekte tan National portal changtlung leh rintlak a siam hi ṭangkai tak leh hlawk taka kan hman theih nan ṭhalaite hnena hrilh hriat hi kan tihtur ni ngeiin a lang bawk a, chuvangin a chungchang thu hi kimchang takin kan han tarlang dawn a ni.

National Career Service hi eng nge a nih?

National Career Service (NCS) chu national web portal – www.ncs.govt.in a ni. Hetah hian hna zawngtu, hna thawh tur nei, hmalam hun atana kaihruaitu leh thiamthil zirna hmun ṭha neite nen hmun khata an intawhkhawmna tura duan a ni. Ṭhalaite hmalam hun sut enpuitu a ni ber awm e.

Eng atana duan nge a nih?

National Career Service (NCS) hian hna leh zirna (service) hrang hrang atana hriat tur pawimawh heng - Skill development zirna hmun leh zir theih dan, lehkha zir paha hnathawh tur, internship tihna, hnazawn zelna atan leh nun kawng zawhna atana biak rawn tur a thlawnin englai pawhin an awm rengna hmun a ni.

Tu siam nge? Eng nge a tum ber?

Government of India hnuaia Ministry of Labour and Employment siam a ni a, ni 20th July 2015 khan tlangzarh a ni. He Project hian employment exchange 978 a thlunzawm bakah career centres anga hman tur/theih a ni. He project hi e-governance thlazar hnuaia awm a ni a, hna zawng mek leh hnathawh tur neite inkar dawh zawm a, a karawl hnawh khah a, tih changtlun a, a tam thei ang berin thiamna bik zir chhuak a, hna an hmuh theih nana siam a ni - ṭangkai takin lo hmang ve ang che.

Sorkarin mimal te tein, tu mah a hranpain a pui thei lo a, chu vangin heng ṭhalaite tan a vibrant platform siam a, ṭhalai nunphung dik kawh hmuh a, tihchaka ram pum huapa public tana hna zawnsak hi a thil tum lian ber a ni.

NCS hnathawh leh a ṭangkaina tlangpuite:

1) Heng a hnuaia tarlan aṭangte hian a hman ṭangkai theih:-

a) NCS portal

b) Common Service Centre

c) Career Centre

d) Post Office

2) NCS hian hna ruak chhawp chhuah runpui (job fairs) leh hna awmzia sawifiahna (workshop for placement) a buatsaih ṭhin a ni.

3) NCS hian heng private organization : TCSION, Quess Core, Hire Mee, CSCs Microsoft etc. te hi a thlunzawm a, hna an lak dawnin NCS kaltlangin hna a la ṭhin.

4) NCS hian a chunga tarlana thawk thei tur khian online leh telephone hmangin career counselling a nei bawk ṭhin.

5) Registration reng reng hi a man awm lo (free) vek a ni a, Identity proof atan Aadhaar chiah a ngai.

6) NCS hian hriat tur pawimawh, training leh thiam thil tuaihriam (re-skilling) hunpui a buatsaih ṭhin.

7) Hmalam hun atan inruahmanna leh inbuatsaihna (career planning) hi hna thawh tur sector 32 hnuaia hna 3500 atan a buatsaih ṭhin a ni.

8) NCS portal-ah hian 30th Sept 2021 thleng khan India ṭhalai hna zawng mek mi 1,01,81,745 an in registered tawh a, chu'ng zinga mi 108,000 ten hna an hmuh tawh bakah hna thawh tur hi 1,43,937 lai a awm mek a ni.

9) National Career Service Centres hian SCs leh STs (NCSC-SCs/ STs) tan bik training leh kaihhruaina (guidance) a buatsaih ṭhin a. DGE kaltlangin National Career Service Centre hian pianphunga rualban lo (differently able) tan a buatsaihsak bawk ṭhin.

10) NCS hian India ram pumah 200 Model Career Centres (MCC) a siam tawh a ni.

- Noel Kompa