Ṭawng mai mai suh se
MLA kan thlang dawn. Campaign boruak a ngaihnawm. Thusawi pawh ngaihnawm tak tak kan hre leh ṭan tawh a, heng thilah hian a dik chin hi sawi tawh se a ṭha ang, Mizo mipui hi an duh duh min sawi khum tawh lo se, kan politician-te hian ngaihsan pawh an hlawh ve thei ang. Tunah hi chuan tunge politician ngaisang che u?
Pu Lal Thanhawla khan cheng khat mah ka ei ru lo a ti a, a thusawi hi a dik leh dik loh ka sawi dawn lova, mipui nawlpuiin kan sawi chhunzawm danah hi chuan kan ngaih a ṭha lova, kan rinhlel a niin ka hria. Kan hotupa ber hi thlahtu aṭang ami hausa chu ni mah se an chhungkuain eizawnna dang kawng an zawh hriat a ni lova, a thil neih a pung tual tual mai si a, a MLA (CM) hlawh hi chu an kham bikin a rinawm si lova, ‘eiru lo’ a intih hian sorkar pawisa a ziak bo lo a ni thei a, kawng dangin a hlawh bak hamṭhatna a neih hi chu kan ring a ni.
Thusawi han sawi takah chuan MNF President Pu Zoramthanga hian thu a ngam bawrh bawrh lutuk a, Congress-in kum 10 ro an rel tih kan hriat vek hi a ni ngaihdan chuan, “Pathianin kum 10 thil zir turin min ti,” a ti daih mai a, Congress an tling a ni mai a, MNF hi Pathianin thil zir tura a tihna hi an hre chiang a nih loh chuan Pathian hi politics-a chak lote inhnemna atana duh duh sawitir mai mai tur a ni ngai lo. Mipui hnena cheng nuai 3 pek a tiam maite leh hna nei lote unemployment allowance pek a tiamte kha kan la hria.
Pu Zorama hian, "GSDP tihsan dâwrh kan tum dawn. Mizo contractor tan a tam thei ang ber hna siam a nih theih nan Mizoram construction corporation din a ni ang a, hei mai bakah hian, lekhathiam hna hmu lote tan unemployment allowance thla tin pek a ni ang," tiin a lo sawi tawh a, India ram state hausa pawhin an tih theih loh hi kum 10 a CM laia amah hretu Mizote hian kan ring lem lo.
Tun hnaiah ṭangrual pawlin Pu Lalduhoma hi an CM candidate atan an vawrh a, ani pawh hi public leader ni si ṭawng tur chin hre lo a ni tho a, ṭawng tur a hre lutuk zawk pawh a ni thei tho bawk a, an thusawi tawhte kha chhui kir ila, inkawkalh leh belhchian dawl lo a a ther fur ang.
Kan Chief Minister ni rei pahnihte hian an duh duh hi an sawi a, mipuite hi engah vak min ngai lovin an duh duh hi min tiam a, an duh ang angin an inchhal niin a lang a, hengte hi ṭhangtar zawkte chuan an hriatthiam loh thil a ni ta. Ṭhangtharte hi chuan khawvel hmun danga political leader-te thiltih dan leh an thusawite an hai chhuak phak vek a, an hre chiang em em a, kan political leader-te nen an han khaikhin ang a, duh duh sawi hruaitu nih hi chu mipui zah lohna a ni.
- Lalpektluanga