Ni 100 inhlawhna
Mirethei zawkte fairel a ruah mai loh nana central lama kan hotuten policy ṭha tak an rawn duan hi keini thingtlang mite hian kan chhawr hle a, kawng tam takah kan harsatna min sutkian sak hi kan lawm hle a ni.
Theih nise central kan pute khu zoar tuilai ngei mai leh hruizik kheh thar zu pek hial kan duh, mahse kan hmuh theih mai a mite anga tham lungawi mai leh tlawn chi an nih hmel lem loh bakah chutiang thil chu an beisei hmel lem lo. Keini tan khaw ṭhenawma ni khat kal chhuah pawh a harsa bawk nen kan tih sak ta lo mai a ni.
Keini mirethei leh thil hre zau lote tan hlei hlei hian he thil hi a ṭangkai a, chutih rual erawh chuan heng hmasawnna rahbi hian harsatna min siam ta fo mai. Ni za (100) inhlawhna chu kan hnathawh aṭanga ni 15 ral hmain hlawh kan dawng tur niin kan lo hria a, mahse kum chanve te, kum khat lai mai te hlawh kan hmu ta lo fo hi engnge a awmzia ni ta? Office lam chuan ti dik an in ti viau a, office leh kan khaw inkarah hian penkawina tur nghah loh dawr takngial pawh awm si lo hian eng tin nge kan ta tur hian kan kut a rawn thlen loh theih?
Kan card rangkachak (job card) ah kan account number kan ziaklut tel vek a, mahse pawisa a rawn lut lawi si lova, thuneitute kan han zawh lahin in account hranah a lut a ni ang an ti liam mai a, card a kan ziah lan hauh loh account-ah eng tin nge ka pawisa chu a rawn luh theih ang? Chhungkaw zinga mi ni hauh si lo chhungkaw hming ziahnaa an hming lo ziah belh ve ngawt lah awm bawk.
Heng thil hian thingtlang pa tam tak min tibuai mek a, hlothlawh ṭul lai a ni a, khawpui pisa lama kal reng hman kan ni bik si lo, vawi khat kala chin fel theih lah ni hek suh. Sawhthing tal hi mân man deuhin hralh thei ila chu hlawhfa lain kan in buaipui ve thei mai tur hi a ni a, mahse sawrkarin kan sawhthing aiin Takam leh Tuikuk ho a ngai pawimawh zawk miau si a, ram leilung fate kan pachhiat phah a nih hi.
Sawrkar hian hmasawnna tur ruahmanna a neih te hi a ṭha lutuk vek. Heng ruahmanna te hi dik leh ṭha takin, ram hmangaihna rilru pu-in, mahni chauha hlawkna dap lova, midang nena kan hlawk tlan vek nan dikna nen mahni hna ṭheuh thawk sela, kan ram hian hma a sawn em em ang.
Nunna bu-a hming ziah lam aia kohhrana hming ziah kan ngaih pawimawh chhung chuan kan ramin lei rem a rap thei lo ang.
- Lalramhmuaka Fanai