DAWN TISEI

Berawlui lung lakna hmun a chim a, nunna hlu tak chan pali zinga pahnih phei chu naupang an ni. Sorkar, pawl, kohhran leh mimal aṭangin suntu leh raltu an awm nual a, ralna sum tling khawm pawh nuai chuang fe a ni awm e. Mahse, duh thlan tur ni se lusun chhungte khan sum aiin nunna an thlang zawkin a rinawm.

Vanduaina lo thlen hma khan an hnathawhna chu a him tawk lo a ni tih hmutute pawh an awm a; mah se sahimnna tura an thurawnin lunglakna hmun neitute thinlung lam a thleng thui vak lo a ni awm e. Sebo hnua se kawng khar ang chauh a ni e; mi pali nunna chu a liam ta.

Lung lakna hmun neitu chungah sorkarin dan a lek kawh aṭang hian midangte tan pawh hnathawktute himna a pawimawhzia hriat thar a ṭul hle ang. Lengpui daiah mi pakhat pawh a lunglakna hmunah chesualin a boral a, eng ang chiahin nge suntu leh raltu a neih ve hriat a ni meuh lo. Hnathawhna hmun chu eng hna pawh ni se mihring nunna atan a him tawk tur a ni.

Lunglawn veng, Lunglei-ah lei tawlhin in pakhat hnawlin nunna chan 10 zinga panga chu naupang kum 14 hnuai lam an ni. Chhiat tawk chhung la damte chungah ralna leh ṭanpuina a luang lut ruih ruih mai. Ṭanpuina sum tam tham tak pawh tlingkhawm mah se, an khawhar leh lunglen chu a nep chuang hauh lo ang. Chenna in sakna tur hmun te pawh hi him tawk lo a va tam em!

Aizawl veng tam tak a insakna hmun leh sak dan te thlir chuan 2013 a Laipuitlang lei tawlh ang kha Aizawl leh khaw dangah pawh a thlen theihna tur a awm nualin a lang. Hmun him lova inhmun in pek leh in sak thar la awm zel te hian chhiatrupna kawngah nitin a hma aiin min hnuk hnai mai zawk niin a lang.

Pangzawl bula Saiha night bus chesuala thi mi 11 zingah pawh naupang an tel bawk. Vanduai leh chhiat tawh hian naupang leh puitling a thliar lo a ni. He thil thlen chhan pawh hi ngaihtuah kual chuan Haulawng - Lunglei inkar kawng chhe lutuk an helna lama chesual an ni ti ila a dik ve tho ang. Turini lei mi pahnihin an zawh chim avanga pakhatin nunna a chan ringawt pawh kha, ngaihtuah nasat poh leh a mak mai a ni. Hmun him tawk lo a ni tih chu hria se hnathawktute khan thawktute ni lo pawn lam mi phei chu an kal an phal a rinawm lo hle. Power & Electricity Department phei chuan hlauhawm chhinchhiahna tarin an hung hnan hmiah ṭhin hi!

Naupangte hian puitling angin chhia leh ṭha, hlauh tur leh hlauh loh tur an la thliar hrang thiam lova, chuvang tak chuan nu leh pa leh ṭanpuitu an mamawh hle a ni. He thu ziaktu pawh hi Vanzau Khiangzawl ram lo hal niah a ṭhiante nen lo vah hnaih lamah an kal chhuak chu lo hal turten hmuin “A hlauhawm, in kang hlum mai ang, haw vat rawh u” an tih avangin an kal sawn a. A tukah an va chhuah leh chuan a hma nia an kalna mual chu lo hal mei chhuak avangin a lo kang dum nuau deuh vek a ni. Pa ho khan an tih tur an ti a, a lawmawm hle mai. An thu kha zawm lo ta se, tuna thu ziak tur pawh hi a awm tawh lo maithei a ni!

Naupang tuia tlahlum an awm fo hi puitling zawkte tan ngaihtuah chian a ngai. Naupang himna tur kan sawiho fo hian an taksa, rilru leh chettlatna hmun te pawh huam tel se a ṭha ang. Tun kum nga 2014 - June, 2018 chhung khan Mizoramah naupang pahnih chin chunglam tuia chetsualna ṭum 10 a thleng a, naupang duhawm tak tak 24 laiin nunna hlu tak an hloh a ni. Heng chetsualna thleng tam zawk hi chu naupangte fimkhur loh leh at vang chu ni tho mah se tuikhuah neitute, kawng laitute leh hnathawktute fimkhur tawk loh pawh a ni tel thoin a lang. Hriat theih chinah naupang tuia chetsualna lian thamte chu-

2014 : Tuirivangah luiah 2

2015 : Chhimtuipuiah 2,

Phulmawi tuikhuahah 3,

2016 : Khawdungsei dilah 2, Tlangsam

dilah 2, Aizawl lui te tulianah 4,

2017 : Bungtlang ‘S’ dilah 2,

Ruantlang kawng sir tui tlingah 2,

Youth Recreation Centre, Falkland,

Zemabawk lei laih tui tlingah 2,

2018 : Haulawng bul Horticulture

Department tuikhuahah 3.

Ramin hma a sawn chuan hnathawhna chi hrang hrang pawh a pung zel ang. Kawng laih, in sak, tui khuah, lung lakna leh thil dang eng pawh ni se, hnathawhna hmun chu thawktute tan a him tawk tur a ni. Chhiatna thleng thei laka inven leh enkawlna hmanrua te pawh a hmun a zirin neih tur a awm ang. Chung piah lamah chuan ‘hnathawhna hmunhma kha midangte tan a him tawk em’ tih thlenga ngaihtuah tel a ngai ang. A bikin nunna atana him leh him lo tur pawh la hre phak lo naupangte tan a him tawk em tih pawh ngaihtuah tel a ngai hle ang.

Mizoram hian hma a sawn zel dawn a nih chuan mihring hriselna leh himna kawngah tun aia ngaihtuhna hman nasa a ngai dawn a ni. Naupangte zalen leh him zawka an lo ṭhan len theih nan Zoram puma puitlingte hian phat rual lohin mawhphurhna sang tak kan kan nei ṭheuh a ni.

- H. Lalchhuanvela, Ramhlun South, Aizawl