LEHKHA CHHIAR
‘Lehkhachhiar ṭhin Kristian chu a ṭhang zel a, lehkha chhiar a peih loh rualin a ṭhan pawh a tawp ve mai ṭhin.’ - John Wesley
Lehkha chhiar peih loh leh chhiar duh loh hi sual lian tak leh Setana hnathawh langsar tak, mah se, kan hriat si loh a ni. Lehkha chhiar tam loh hi mawlna leh retheihna kawng inṭanna bul a ni. Zahna leh mualphona leh buaina min thlen ṭhintu, thinurna leh thilsual min tihtir ṭhintu a ni. Hremhmun kal turte tana hremhmun lamlian zawh ṭanna a ni bawk.
Mihring nun dan tur dik min hriat lohtirtu a ni a, mi chi hrang hrang bulah leh a hun leh a hmun azira awm dan tur min hriat lohtirtu a ni. Pathiana piantharna dik min hriat lohtirtu a ni. Lehkhabu leh chanchinbu pawh chhiar ngai loho hi ram leh hnam tana mi hnawksak an ni ṭhin. Finna leh ṭhatna leh hmasawnna aia mawlna leh âtna thlang zawktute, thatchhiatna leh sual lam âwntute an ni. Lehkha chhiar tlem hi midangte um phak lohna leh rual pawl phak lohna leh mi an lohna chi khat a ni.
Mahni phak tawka lehkha chhiar tam avanga mahni phak tawk aia dinhmun ṭha leh sang, mahni phak tawk aia chanvo sang leh ropui, mahni phak tawk aia mite tana ṭangkai leh mite zah kai hi eng zat tak awm ang maw? Lehkha chhiar tam loh avanga mahni nihna tur leh mahni dinhmun tura awm lo, mahni chanvo tur leh chan ai chang lo, mahni mizia dik tak leh mahni talent hloh avanga mi rethei leh vakvai ni ta, mite hmuhsit ni ta hi eng zat tak awm ang i maw?
Ka duhthusam: Mi zawng zawng chunga thuneitu ni ila, mipui mimal tinin nun dan leh changkanna dik an lo hriat/ neih theih nan leh ram leh hnam hi changkanna dika a lo changkan nan leh ram a lo nawm zawk nan; mi zawng zawng hi ni tin lehkhabu ṭha leh chanchinbu ṭha ka chhiar luih tir ziah ang.
Heng te hi i hre reng ang u. Kristian-te chuan Dan hi kan ngai pawimawh tur a ni. Khawvel dan kan ngai pawimawh ang a, Pathian dan kan ngai pawimawh ang a, dik takin kan nung tur a ni.
Eng mi pawhnise, lehkha chhiar tlem chu innghahna tlak leh rintlak a ni tak tak lova, belhchian a dawl lova, a ruak leh kawrawng, milem mai a ni. Eng mi pawh lehkha chhiar tam chuan belhchian an dawl a, mi tak tak an nih avangin mi ten an ngaina-in an zah ṭhin.
- K. Hmingthankaia