Inthlan kan hmabak leh ta maw...

Politician ram hruai­tu ṭheuh ṭheuh, ram an hmangaih dan hi a inchen lo thei ngawt mai.

Kan Prime Minister-in development ringawt a atchilh a, vei berah a nei emaw tih mai tur a nih laiin keini state-ah erawh politician-ten mirethei te a derin an in hmangih siak a. NLUP cheng nuai khat sem tih te, sawhthing kg 1 cheng 50 a lei tih te chu kan hmatheh leh kan maurawkela zawng khuang ber emaw tih tur a ni ta! A thlawna pawisa fai sem leh ringawt ṭhin hian ram ropui min thlen lo vang. Ram hmasawn kan tih zawng zawng hi a thlawna pawisa sem hmanga ding chhuak leh hmasawn pakhat mah an awm lo.

Mipuite retheihna remchanga hmanga a thlawna pawisa sem tawktarh leh ringawt ṭhin ai chuan kan lei hnuai hausakna hai chhuak zawng te hian ṭan la ila. Khawlphethaa intodelh thei tur hian nasa takin ṭan la bawk i la, chumi hmang chuan ei leh barah te kan intodelh bakah industry lian tham din nan te kan hmang ang a, ṭhalai sang telin kan ram chhungah ei­zawnna hna an hmu mai zawk dawn a ni.

Chutiang lam hawia hmalakna awm si lo a ‘kutdawh hnam kan ni, compensation la hnam kan ni’ in tih khum leh ringawt mai te hi a ṭha lo. Hetiang ṭawngkam hi kan ram hruaitute ka aṭang hian ri chhuak tawh lo se a ṭha ngawt mai.

Kan ei leh in, kan silh leh fen te hi harsa taka kan thawh chhuah a kan lei a ni ve a, kut kan dawh lo a, mi tam zawk hian compensation lak tur lah kan nei hek lo. Hetianga in ṭawngkhum hi a dawngsawngtu tan chuan thil hriat nuam a ni lo.

Ram changkang leh hmasawn ber ber te pawh hi an mamawh kawng tinrenga into­delh famkim an ni bik lo. An mamawh tam zawk chu thar chhuak bawk mahse an mamawh ṭhenkhat chu ram dang aṭanga an lak luh a ni ve tho.

Entir nan, USA chu ei leh barah intodelh viau mahse oil erawh Middle East ram aṭangin a chawk luh reng a ngai ve tho. Chumi avang chuan tumahin US hi kutdawh hnam an ni kan ti lo.

Tunah hian kan ram hi nasa takin ruihhloin min run mek a, ruihhlo avangin ṭhalai tam tak kan vuiliam tawh a, kan vui liam mek zel bawk a. Tlawmngai pawl lian ber YMA pawhin nasa takin ruihhlo hi a do a, ‘Ruihhlo do kum’ te hial a lo puang tawh ṭhin a nih kha.

Ruihhlo do kawnga ṭan lak a ngaih tehlul nen sawrkar berin zu an zuar tlat mai a, hraitthiam a va har em. Mi rethei zu kan leih bua a, sawrkar berin zu a zuar lawi si. ‘Zu zawrh hi kan ṭawng-ṭai chhanna a ni’ te kan la ti ta dah leh nghal, a buaithlak ṭhin mang e.

Keini anga ram buai tuar ve bawk, kan zawlpuia kan ngaih ṭhin Nagaland te pawh kan chung en ti tih ta. Nagaland plywood siam te kan han lei ta a, rual awh hi a na ṭhin ngawt mai. Kan ram hruaitu, kan mi hausa leh rem hre chin hian ṭan han la se la, ram ro tling siam chhuah a hun ta hle mai.

Hetiang zawnga ṭan kan la lo a nih chuan mi hnuvaiah chaurau ek kan thai kum khua mai ang tih pawh a hlauhawm. “Lal putar tak, thurawn dawngsawng duh lotu ai chuan nakina lal mai tur a thlakhlelh awm zawk” tih hi kan innghahna a nih tak mai hi a.

- H Vanmawia, New Serchhip