SAWRKAR HNATHAWK HLAWH 10% PEK LEH A CHHEHVEL

Chief Secretary-in sawrkar hnathawk pawl hrang hrang hruaitute a koh khawm a, sawrkar hnathawkten kan ramin hun harsa a tawh laia lo ṭan ve nan sawrkar hnathawk Group hrang hrangten an hlawh aṭanga sawrkar tana thehchhuah theih zat tur an han sawiho kha a ni a. Kha sawihonaah khan, a hmuna kal ve chuan inthlahrung tak leh ngaihthlak sual nei a nih hlau takin, "Mi dang hriat dan ka hre lova," tiin ama hriat dan a rawn sawi a. Chutah chuan Chief Secrtetary chuan an sawihona point hrang hrangte chu mahni pawlah ṭheuh sawiho a, ngaihdan la fawmkhawm leh ni mai tura a rawt lai chuan kalkhawm lam aṭangin CS rawtna pakhat, '10%  chu Covid 19 do lêt nana thawh ve chu remti tlang nia inngai tlangin thu kan ti tlu thei mai lo'm ni? tih chu zawhna eng emaw awm karah chuan khaikhawmna a ni ta niin a lang a ni. 

Hemi chungchangah hian ngaihdan hrang hrang pawh a tam ve ta viau niin a lang.  Chutiang ngaihdan chu dah ṭhain, a kalphung hi han sawi hmasa ta ila. Covid19  do letna kawnga sawrkar hmalaknaah hian sum leh pai lama sawrkar hnathawkte phutna lam hawi pawh, March thla lam aṭang tawh khan a ri fuih fuih tawh na a, hma han lak mumal tak chu tuna kan Chief Secretary-in  sawrkar hnathawk pawl hrang hrang hruaitute a kohkhawm a, an sawihona hi a ni mai awm e. 

Ṭhenkhatin hetia pek hi âwm an tih viau laiin, chhan hrang hrang avanga âwm ti lo pawh an awm tih a lang reng a ni. A âwm emaw âwm lo emaw thudangah dah ta ila, sawrkar hnathawk hlawh hi, amah sawrkar hnathawk ngeiin ama thu a, a phalna ngeia thehchhuah a nei a nih loh chuan emaw, India danpui Article 360 angin India ram President-in Financial Emergency a puang emaw, Article 213-na anga Governor-in Ordinance anga a puang a nih loh chuan, khawi association emaw khawilai DDO in emaw an pawl member-te hlawh, an establishment-a mite hlawh lo pawhpen ṭhensak hi chu a rem lova, dan kalh a ni. 

Sawrkar hnathawka khan ziakin a remtihna a pe a nih loh a, ṭhahnemngaihna avanga lo pawh ṭhensak ngawt an nih chuan, sawrkar hnathawk mimal tu pawhin an lungawilohna ke an penpui duh a nih bawk chuan, an hlawhtling zawk bawkin a rinawm. Eng pawl hruaitu emaw nih vanga member-te hlawh sawh hêk sakna tur lo pawmpuitute hian eng rilru in nge an pawmpui theih aw? Dan leh kalhmang hria hria an ni ngei awm si! 

Ṭhenkhatin sawrkar hna­thawk an hlawh a tam tam nen, tlem tê sih chhuahsak turah an phun ni awma sawite social media lamah chhiar tur a awm a. Tuten emaw pawisa thawh se ti a, au vak vak te, tuten emaw an thawh loh avanga dem rawngkai awrawl lek lek chhuah maite hi tih loh a ṭha zawk a nia. Kan theih ang tawk ti tura inzirtir erawh a sual loah ngai ila. Thawh ṭul la ti rih lem lote hian thawh an ui hrim hrim a nih hmel chiah lo. Sawihona kara lo ri chhuak  nia thudawn ṭhenkhatte hi a dik a nih chuan, awm lo tak tak pawh a awm bik chiah lo a ni. A nawlpui, a kawkipa in kar chhuah hma hian ke pen hmasakna awm tak tak a la tam ni hian a hriat ve tlat bawk a ni. 

Chief Secretary te FMGE&W leh Sawrkar hna­thawk pawl hruaitu hrang hrangte pawh hian hlawh in cut emaw, pawh ṭhen emaw hi a remchang lo tih hre tlângin heng thu:- April 6, 2020: Assam government announced 30% salary cut - Chief Ministers, Ministers & MLAs. The fund accrued will be used for the treatment of COVID-19 patients & mana­gement of the outbreak. 

Assam government is planning in a deduction of 10-20% from the monthly salary of state emoloyees. However, the deducted amount will be credited in their respective account with 4.5% interest in the next fiscal year. April salary paid full, tih te hi enin harh tel nan a ṭangkai thei ang. 

Secretariat Officer te phone bill thla tin cheng 1000/- te, Under Secretary chinin Housemaid an chhawrna thla tin 10000/- (mi pakhat) leh Deputy Secretary chin 10000/- (mi pahnih chhawrna) te, Laptop man to tak lei te hi a ṭul ber lo. Inthlan dawn affidavit lama declaration han en te khan ṭhenkhat tan chuan mi hausa tawntaw an nih rikngawt tawh lai a, an MLA hlawh an han tisang leh chiam chiam aṭang te khan, an hlawh tihsanna zat ṭheuh tal te kha chuan hma han hruai sela zui an va nuam dawn em. 

Union Cabinet te leh Par­liament member-ten 30% lai an hlan a ni lawm ni khah? Mipuite hmangaih a, an tana hnathawh kawr ha tura inzuarte ke pen thawm hi, mitdelte hriat khawp tal han awm sela, eibil thi thi tia theh chhhuah phal tur sawrkar hnathawk hi an va han tam dawn tehlul em. 

Tuna sawrkar hnathawk hlawh 10% kalpui tum ang hian kalpui ni ta se la, sawr­karah hian khawi Head of Account-ah nge a luh ang? Duh duhnaa pawh kual theih Chief Minister’s Relief Fund tur em ni ang? Eng atana hman tur nge? Devolution of taxes fund kan dawn vete khêkna tur zawk em ni?  State Consolidate fund-a luhtir ngawt lah a remchan lohna a awm dawn si. 

Tuna ka thu hriatte hi dik tak maw? Kan CM zahawm takin Bank leh Company, mimal hausa nia lang ṭhenkhatte hnenah CM Relief Fund a dil a ni awm e, tihte hi a thei tan pawh pek a phurawm lo thei ang. A chhan chu mipui tana inhlan a, mipui rawngbawlsak tura inhuama au au te, sum leh pai lama an chet chhuah dan en hian, kan central lam MP leh minister-ten 30% an han hlan ang chi ke pênna lam awm ve hauh lova, midang pên tura beiseina hian Mizo nunkawng a hlat rih em mai. 

Hemi kawng bakah hian MLA fund-te hi surrender vek se, Covid 19 beih lêtna atan pawh hian ṭangkai tham tak a lo tling ang. Mipui tana ke an rawn pen chhuahna avanga chanvo an chelh hrang hrang Development Board Vice Chairman hrang hrang office kalpuina sensote pawh thil ṭul hmasa an ni tawh rih lo thei a ni. 

Heng zawng zawng piahah hian “Covid19 do letna atan hian sum leh pai chu Unlimited a ni ang,” tih te chu, “Khawh lut pur pur, lehlama liam zur zur thei” awm bawk karah hian ngaihngam taka muang leiah ṭhu emaw kan intih lai a, sum leh pai harsatna lam a awm ni awm taka CS-in a hnuaia mite a han kokhawm tlat te, Health Minister-in Covid 19 beihletna tur central lama a dil hlauh zawk te, Devolution of Taxes fund atana central sawrkar rawn theh chhuah first installment-te han en hian sum leh pai kan ngah tawk hmel si. Kan buaina hi chu PPE lei dan chipchiar (Procurement Details) Minister-in a hre ve mang lo nia sawite leh a dang dang sum leh pai riral dan awm nia hriatahte hian 

ngaihṭhat tawk lohna lian tak inzep a awm ṭan mek nen hian, mawng zang taka ke pen har ti deuh an lo awm a nih pawhin an mawh hauh lo bawk tho a nia. 

Sum leh paia kan state dinhmun hi a chhe hle a nih chuan kan Chief Minister ber hian mipuite thil awm dan min hrilhfiah chiang ngam se la, thu a lo sawi tawhte pawh sawifiah ngam se, ama mimal sum pai lam thehchhuah kawngah hma han hruai bawk sela, kei ni pawhin kan khawlbawmte phak ang tawk tawkin kan lo sawh keh ve tur hi a nia. 

Sawrkar hnathawk lam pawhin 10% mai ni lo pawh hi an inhuam em em ang tih hi Mizo ni bawk Kristian ni bawk zingah hian a va han sawi huai ngamawm ve le aw...