Kuhva tawlh rukah ṭang ulh lo teh u

Tunlaia kan thupui chai rawn Myanmar lam aṭanga rawn lut dan lova kuhva tawlh ruk chungchang hi ka lo chik ve neuh neuh a, political party pakhat hian kuhva tawlh ruk hi sual a ni tih hi an pawm hreh ngawih ngawih tih ka hmu chhuak thei.

Mithiam inti leh midik tia kan lo hriat ṭhinte pawh an chhung te, an ṭhiante leh an lam hnai kuhva tawlh ruka inhnam­hnawih an awm chuan an chhan (defend) ngar ngar ṭhin tih pawh ka hmu chhuak.

Dan lova thil tawlh ruk sawi avanga an­mahni party bei emaw ti tlat an awm hian kan ram dinhmun chhiatzia a tilang kan ti ve lo maw? Zu hi kan haw tlang a, zu zawrh ruk hi hlawk hle mah se dan lova zawrh a nih avangin dan keng­kawhtu lamin an man chuan a zu chu an leih bua a, a chang leh an hal ṭhin a, kuhva hal lo ngaimawh em em leh a haltu lam lo dem vak hi dikna duh vang leh Mizoram hmangaih vang ni lovin party atchilh vang a ni.

Zonet TV-in kuhva tawlh ruk leh Champhai DC trans­fer sawihona an buatsaihah Minister Pu Lalruatkima khan thil kha a pehhel kual nasa a, a sawi tum tak pawh chu kan zuk man chhuak thiam hlei lova.

A sawi ka lo hriat pakhat chu Kelkang daia kuhva, Cham­phai DC man kha a mimal man ni lovin sorkar man a ni, a ti a. Ka zawh belh duh chu sorkarin kuhva an man a, a kang ta a, sorkar laka FIR theh­luh tak ahnekin Cham­phai DC lakah FIR an thehlut a, chu chu Police lamin an lo register fel hmak a ni.

Kan kawngpuiah kan zavaia mithmuhin kuhva, kan rama thar ni miah lo chu kan rama thar anga chhalin dawt hmangin kan ziak lut a. Kan ram kawngpui chu a paltlang ta ruau ruau ṭhin a, chu kuhva phur chu mi tam tak chuan thil dang phur telah an ringhlel.

Kei chuan ka ring­hlel ve thiam lo, ka rinhlelh zawk chu kan rama kawngpuia kuhva tawlh ruk an kal tlang par par thei leh Kudam lian pui pui ualau taka an sa ngam hi chu thuneitu lam thawhpui an nei a nih ngei ka ring.

Kuhva tawlh ruk an sawi hian kan party min bei emaw kan tih tlat tawh chuan kan party lam zawk hi i inenfiah tawh ang u. Kuhva tawlh hi mi tam tak eizawnna a lo nih pawhin chu chuan Mamit leh Kolasib District chhunga chhungkaw tam tak kuhva eizawnna a tih chhiat si avangin tihtawp nghal vat tur a ni. Central YMA lo chu rin ngam tur pawh hriat an har tawh a nih hi.

Kuhva tawlh ruk kan sawi dek dek a, sorkar bei emaw ti tlat, kan party min beihna emaw ti tlat kha chuan a dik lo zawk in ṭan tih lo inpawm ula, lo ṭang ulh tawh lo teh u.

Tun hnaiah hian mahni khua, mahni ṭhiante chhungte leh mahni ngei kuhva tawlhruka inhnam­hnawih ve an awm avanga anmahni chhanna thu ziak pawh kan hmu leh ṭan tawh a, lo ṭang ulh lo mai teh u nangniho pawh kha.

- Mamawitea