Buaipui tham modification

“Mizo ṭawnga a thuchheh danglam anga a lam dan emaw, a hawrawp emaw inthlak” tiin pu Mafaa’n modification a hrilh fiah a; a fiah tawk khawp mai. Modified form emaw, sub­junctive mood form ti pawhin kan sawi ṭhin.

Ka hmuh leh hriat theih chinah modification hi kan hre chiang ta lovin kan ngai pawimawh ta lo hle mai a, puitling zingah pawh hmang dik lo kan pung.

Tualchhung chanchinbu leh local channel-ah pawh hman dik loh a awm leh ṭhin; programme host leh judge te, film lehlin leh thil dang dangahte pawh. Modification hman dik loh pawizia hi kan ngaihtuah lo niin a lang a, a chhe zawnga kan ṭawng a tihkhawloh theih dan hi kan ngaihtuah ngun a ngai ta!

“Artui kang ka ei.” “Ka ngaihsang zawng tak i ni.” “Heng thil pahnih hi ṭhen hrang theih an ni lo.” “Kan nun hi ṭha taka hmang i tum ang u.”

Heng thu dik lohna hi kan hre nghal mai thei ang. ‘Kan’ tih hmanna tura ‘kang’ kan hman chuan ‘kan’ thumal hi a bo dawn tihna a ni. Chutiang zelin ngaihsan ti lova ngaihsang, ṭhen hran ti lova ṭhen hrang, hman ti lova hmang kan tih chuan, ngaihsan, hran leh hman thumalte hi hman lohin a ral dawn a, kan hnam ṭawng thumal a bo ṭeuh dawn tihna a nih chu; a nghawng chu a na khawp ang!

Chuvangin, he thil hi uluk taka kan ngaihtuah a, hman dik kan tum a pawimawh. Mizo subject-ah hian modi­fied form chungchang hi pawl 3 aṭanga pawl 12 thlengin a tel deuh zel a, zirtirtute pawhin tih takzeta naupangte kan zirtir a ṭul ta!

Hetiang zela kan in thlahdah chuan, ‘Zun In’ pawh kan nei tawh lo vang a, “A bang theih” tiin thingtlang sikul naupangte pawh an au dual dual tawh mai ang.

Tichuan, kan hnam ṭawng chu a bo ṭhen zel ang a, thumal thar siam belh kan harsat si. Ṭan lak kan va ngai tehlul em! Hawh u, kan hnam ṭawng hi tibotu ni lovin humhalhtu nih i tum zel ang u.

- Lalramchuana, Chungtlang