ZOFA TE PANGPAR MAWI BER (Hmangaihberte lenna Kolasib-ah)

Pangpar hi chi tam tak a awm a, mihring tungchho zingah pangpar mawi ti lo hi kan awm ang em le! Kan Zoram chhungah ringawt pawh hian pangpar chi hrang hrang a tam hle a, khawvel zau zawk thlir phei chuan chhiar sen loh a awm a ni. Chung zingah chuan mitin hian mawi tih ber kan nei ṭheuhin ka ring a. Tin, Pangpar chikhat mi tam takin mawi kan tih ber a awm thei bawk ang.

Zofate hi hnam naupang te kan inti a, ṭhenkhatin kan naupan lohzia chhuiin Lal Isua khawvel a lo chen laia Israel te nen khan kan insawi unau hmiah bawk a. A enga pawh chu lo nise khawvel mihringte zinga inelna chi hrang hrangah hi chuan kan la naupang khawp mai.

Kum 60 kal ta vel maiah pawh khan keiniho ngei pawh hian mau tiang kawm leh sahatah rah hmangin Hockey te kan khel a, Serṭawk rah senin football te kan khel ṭhin a nih kha. Tunah erawh National Sub-Junior Football, North East qualifier Kolasib-ah an khelh mek a, an ball pet lai hi pakhat Rs 6000/- (sangruk) man te zuk ni a!

Kan thupui lamah aw. Zofate hi kan upa emaw kan naupang emaw vawiin thleng hian infiamna lamah hma kan sawn chho viau kan ti a, a dik pawh a dik a ni. Tual chhungah, National leh International inkhelhah te Zofate hming a lang ve ta zauh zauh mai. National-ah a bikin football-ah phei chuan India rama club lianho zingah Mizo tlangval awm lohna a vang tawh hle; I League Champion te kan ni thei ta hial a, a va ropui em! Ṭhalaite ṭang sauh sauh turin ka chah duh a ni.

Awle, a aia sangah aw. National Games mai ni lo; International lamah te lang phak chu kan la tam lo. Football lamah tlangval 2/3 chu kan lang ve tawh a, chu pawh Asia khawmualpui huapah chauh. Khawvel huap World Cup emaw, Olympic lamah te phei chuan Mizo fate hming hi hmuh tur a la awm lo, ṭanlak a va ngai em, kan ṭhalaite hian khawvel huapin hma an la thei a ni.

Sawi tur a tam, ziah sen a ni dawn lo. Pu Thansanga Zote leh Pi Lalzarmawii te fa 8 zinga a pangana Nl. Lalremsiami kum 18, Class XII zirlai mek hian Women Hockey World Cup ah te goal khung hial tawhin tuna Asiam Games khelh mekah pawh hattrick te hial siamin tunah Zo­fate tan pangpar mawi­ah a han ṭang thei ta.

Zofate hi khaw­velah kan awm ve a ni tih pholangtu Nl. Lalremsiami, College Veng, hmangaihber te lenna Kolasib nula hi tunah chuan infiamna lamah Zofate pangpar mawi ber a lo ni ta. Zoram ṭang fan fan.

- P.C Pakunga