Zoram harh rawh

Tunlai kan ram thilthleng chuan min ṭhawngin rilru a va kam em, mahse ka ram leh hnam chhan nan thil tam ka ti thei si lo. Ram leilung faten kan chanvo kan chan loh chan ngiata kan nawr pawh a hlawhtlin theih loh lai leh, rethei bakberha kan kun laia kan mikhual Takam (Chakma an in ti) ten kan chan ai min chuhpui ta rup mai hi a va zahthlak tehlul em.

Kil lehlamah Tuikuk ṭhen­khatten kawhmawh an lo bawl a, duh vang renga an chhuahsan a hruaikir leh hamṭhatna an lo phut rawl nen, ka inhrosa ka inhrosa ve mai. Heti fakoa hnamdang kan ram chhunga an huangtau ta hi tu thiam loh nge? Heng mite kan rama an huangtau taka an rawn sapatal ngam chhan hi mipui hian tunge a kaikuang tih chu kan hria, mahse sum duh vang bawkin kan haider a ni ber. Sum tlemte it tur tawka rethei manganga min siamtute tho kha heng mite huangtau tirtu chu an ni lawm ni?

Zirna chungchangah hian tunah court a thiam kan chan leh chan loh aiin heng leilung fa pawh ni loten Category 1 min chuhpui ngam hrim hrim hi tlawmna a ni. Hnam huaisen kan ni kan in ti a ni lawm ni? Tunah sapui hliam um leh ral bei a ram mut a ngai tawh lo pawh a ni thei, mahse tuna kan fate chan ai chhuhsak tumtu hnamdang lakah hian tlawm ngai lo hnam huaisen kan nihzia kan lan tir dawn lawm ni? I mikhualin i fapa ro chan tur a chuhpui ngam ta hi tu mawh nge?

Roreltu pa ber mawh a ni tih hi hriat a hun viau. Tin, ṭhalaite pawhin he thilah hian mawh kan phur nasa, zoram chhan tur, mi dik lote paiha dikna tung dingtu turte kan ni. Vote duh vanga hma la ngam lo hruaitu kan nei a nih vaih chuan kan ram hi vote lei nan an hmang mai ni loin kan hnam hi an dahkham a ni ang.

Kan ramah hian chhiarpui kan nei ve ṭhin a, chu chhiarpuia an chhinchhiah dan kan en chuan kan in thlahpun dan a hriat theih a ni. Mizote hi chu Pathianin in thlahpung tura min tih angin kan in thlahpung a, kan ramah kan awm a. Takam (Chakma an inti) te hi chu kan politician-te thlah pun an ni. Kan rama an pun chak dan chhutin tu nu chhul mahin a zo hian ka ring lo. Chu tiang thil hre vek sawrkar hian enge a tih? Eng tin nge hma a lak? Mipuiten hmalakna a awm awm kan hre lo a ni.

Political party tin ten an aiawh an tirhna ‘join platform’ hi ka chhim ve tawh, Chakma candidate an neih dawn leh dawn loh zawhna chu PRISM leh ZPM ten an neih dawn loh thu huai takin an puang a, MNF lamin midang neih leh neih lohah an innghah thu an sawi lek a (party dangin an neih chuan neih, neih loh chuan neih loh), MPCC phei chuan an chhang ngam lo a ni. Rilru a kal thui duh khawp mai, sawrkarna la siam loten huai takin an sawi a, a fawng chelh tawhtu leh chelh mektute erawh an khup zul zul mai chu a ni si. Tun kan buaina boruk hi tawng baw lo chi kan lo ni lo.

Mipuite hian min beitute hi beihlet ve kan duh, a dan hmang kan hre si lo, sawrkar mizia kan thlir kan lung a awi si lo. Hma la tura kan rin, kan beisei awm chhun chu sawrkar aiin Zirlai Pawl leh YMA te an ni ta. ILP check leh foreigner dap chhuah, kawng chhe siam thleng pawhin a ni ang chu, loh theih lohin tlawmngai pawlin an kutken a ngai ta a nih hi.

Inthlan dawn hnaiha Zo­ramin hmangaihtu a ngah vei nen, harsatna a tawh chiah chuan khang hmangaihtute kha an relhru zo leh vek nia!

Hawh u, ram hmangaih rilru puin, party anga inla hrang loin, thiamthu in sawi siak loin, keimahni, kan tu leh fate leh Mizo hnam awm zel tur tana himna leh dinchhuahna tlak Zoram i din tlang ang u. Ṭanrual hi chakna a ni.

Kan ṭanrual loh vanga heng buaina hi tawk kan ni a, khua a tlai hma hian kan in siamṭhat a ngai, a nih loh chuan kan pi leh pu ten lu chhum ban chhum huama an lo sah zau, theih nise vawi tam nun chân an huamna chhan kan ram zimte, pi pute thisenin a lei hi kan chân mai a hlauhawm a ni. Aw, Zoram harh lul teh!

- Lalramhmuaka Fanai