Senior hnawl tum hi

Tun hnaia Vanglaini article pa­khat kha kan hmuh chuan politics-a senior hnawl tumna awm deuh kha an sawi a, kha kha tlem sawi belh ve hlek a chakawm a, politics-ah hian 'senior' kan tihte hi 'ṭhalai' tih leh 'ṭhangthar' kan tihte aiin an ṭangkai zawk ṭhin tih sawi chhuah ve a ṭul a ni.

Ṭhalai kan tihte hi lehkhathiam leh hawi zau deuh zawk ni mah se politics-ah na na na hi chuan 'veteran' hi an ṭangkai a, inthlan dawna a tawpa han 'fight' tak tak tur phei chuan anni experience nai tluka ṭha hi an awm lo. Tun hnaia hmel thar an ṭhat rinna leh a hlui deuh apiang an ṭhing tawh anga sawina hi kan thlir chian loh vang mai mai a nih ka ring.

Khawvel ram hruai­tute hi thlir ila, ram hruaitu naupang tak tak leh ṭhalai zawk awm mah se ram tam zawkah hi chuan 'veteran' tak tak hi ram hruaitu an ni a, heng mite hi an ṭhat loh zawkna sawi tur a awm reng reng lo. "Kan ram hruaitu hi a la ṭhalai bawka hma kan sawn a nia," han tih tur pawh hi a awm lova, Mizoramah hian eng hi kan hria ni maw a hlui zawk hnawl duhna leh ṭhalai politics-a rawnhriat pawh nei lo ṭha zawka ngaihna hi a awm tlat a, hei hi thil dangah a ṭha zawk a nih pawhin politics-ah hi chuan a dik thei tlat lo.

MNF-in Speaker hlui Pu Lalchamliana chawlhtir duhna an nei tih leh MP hlui Pu Lalhmingliana ding tawh lo mai tura nawrtu an awm tihte hi chu Mizoram politics-ah chuan 'suicide' tlukah ka ngai. Tin, hei bakah hian Congress party lamah pawh hian Pu K Lalrinthanga, Pu Hmingdailova Khiangte, Pu Lal­rinmawia, Pu R Lal­zirliana thlengin chawlhtir duhna a awm ru a ni awm a, hengte hi politics-ah chuan 'suicide' a nih theih ka ring.

Ṭhangthar an ṭha kan tih rualin an nau­pana ringawt hi an ṭhat zawkna a ni thei lova, an thiamna kan tihte pawh hi lehkhathiam san ngawr ngawr aiin ram tana a ngaihna an hriat leh hriat loh lam hi ngaih pawimawh ni zawk se a finthlak ang.

Thil pakhat han belh leh lawk ila, kan Congress President, kan MNF President leh kan Ṭangrual Pawl Chief Minister candidate-te hi an ṭawng duh dan em em hi a fel lo khawp mai. Congress Pre­sident hi huaisen deuh hian a ṭawng bung hmuk hmuk a, MNF President hi thu awihawm loh deuh deuh sawiin a dak zar zar a, ZPM CM hual lah hi hmana a thusawi letlingin a pawt zuah zah bawk a, politics lama kan hruaitute hian ṭawng­kam hi fim­khur se a ṭha khawp a ni.

- Lalhmunmawia