HRIPUI LENGIN A HRIN, KAN NUNPHUNG DANGLAM TA HI

Hripuiin kan kawngka min kalhsak a, thlabarin mipui kan khur a, thihna leh hri kai thar an pung zel a. Puipun leh vah chhuah a theih loh a, rei tak inkharkhip turin kan intodelh si lo, hri a ziaawm deuh a, hlauthawng tak chungin eizawnna hrang hrang thawh theih dan kan siam a. Hri kai kan pung thar leh a, Political party-te inpuhmawhin, RTPCR din duh lo tih te, Mobile van a thlawna pek la duh lo tih te, sorkar hlawhchham, tih hmangte in kan invawm vel a.

Hri kai lah chu India ram state zinga polulation-a teh a, kai sang ber kan ni ta ngar ngar mai si. Mipui lam aṭangin mi harsate puihna thawh khawmin, sem sem dam dam eibil thi thi formula han hmang chiam mah ila, retheihna khurah kan lut tial tial si.

Hri kai pung zel chungin, a tih ngaihna ngang a awm si lova, a tlak tlak vanduai policy hmangin, kan inthlah zalen leh ta ngawt mai a. Pathian biak Inkhawm pangngai kalpuiin, intih hlimna hrang hrang pawh phalsakin kan awm ta.

Nunphung thar chu: He kan hun tharah hian, Pathian biak inkhawm chu mi 1000 inkhawm thinnaah, a tam berah mi 500 bak inkhawm tawh lo ang vel kan ni. Chutih laiin park hrang hrangah te leh Tlawng lui lamah chuan, mipui an zi hut hut a, hmuhnawm khawpin an zi nuaih nuaih mai asin. Youtube lamah han en la, mak i ti zawk ang.

Hetiang hi kan nun­phung a ni zel tawh ang em? Hripui lengin min up bet rei tawh a, hlimhlawp hmang theia kan zalen meuh chuan, kan hlimna chu thlarau lam aiin, hmun nuam leh mipui intawl­lenna lam a ni ta em ni?

Kan sual ta viau em ni?: Ni bik lo e, heng mite hi thil sual tia kal an ni lem lo, rui buai leh insual buai awm lovin, an insulpel zut zut mai a, thenkhat thian zaho lo lam su nghawng nghawng pawh an awm, hlimna an chen ve a ni.

Thlarau lama tuihal an tlem ta hle em ni? ti dawn ila, a ni si lo. Bethel Ministry ho khan, kawng sir remchangah rawngbawlna neiin, khaw vawt karah thutna pawh awm lovah khan, darkar hnih zet ding ngar ngar peihin, mipui 1000 tel an pungkhawm peih tlat si.Taksa damna beisei vek an ni lem lo. Lalpa faka zaia lamin, thahnemngai takin kawng sirah an tawngtai hliam hliam mai asin.

Demna thu nen maw...: Biakbuk lama kal kan tlem tawh em avangin, Pulpit tlang aṭangin, hriin min nuaina karah, thlarau va tuihal kan awm tawh lo tiin, kan mangan thu kan tlangaupui a, eng hi nge kan rinna hi ni ta? tiin a dem zawngin kan au vak vak a, kan au dik lo ve thei tho.

Hripui leng avanga hun rei tak hna thawk thei lo va kan awm hnu hian, kan mamawh a lo tam tawh a, thalai tam tak sorkar hna hmu loten, eizawnna thar an zawng suau suau a, kan hun awl zawng zawng deuhthaw chu hna thawh nan kan hmang tawh. Kar tawp a lo ni a, hun awl kan neih chu rilru hahchawlh nana hman tumin, kan vak suau suau ta ni berin a lang.

Sapho pawh khuan hetiang nun hi an hmanna a rei tawh, week end hi an thlahlel em em, beach-ah te, inkhel en tein an hun awl an hmang ral a, Biak In lama lawi peih an awm tawh meuh lo, an Biak Inte chu kharin a awm a, a then an hralh a, inkhawm peih awm chhun chu kum 50 chung lam deuh vek an ni tawh. Hetiang nunah hian Mizote pawh kan lut ve thei a ni.

Kohhran lam atangin: Kumin puitling Sunday School zirlaiah khan, kohhran rawngbawlna huang zauh tulna kan zir ho tawh a, kha zirlaiah khan, kan nun phung danglam zelah hian, tunhma a kan lo chin thinte kha tih danglam a tul theih thu te, rawngbawlna huang pawh zauh zel kan ngaih thute kan zir tawh a nih kha.

Kumin 2021 Synod-ah khan, inkhawm tih tlem thu agenda-ah a lo lut a, Exe­cutive committee-in rawn zir chiang se, an rawtna chu Synod leha ngaihtuah ho tura thu tih tluk a ni.

A danglam thei em?: Kan nunphung danglam zel hian, hmana kan tih dan kalpui reng ringawt hi, kan thatpui tawh lo maithei. Inkhawm tih tlem thu sawi chuan, rinna chak lo huangah kan khung tlat zel a, kan inkhawm dan phung pawh tih danglam kan hreh em em a ni.

Chawlhni leh Inrin zan tih loh chu, zan dang inkhawm lo hian a kal theih tho lawm ni? Chawhni chaw­hnute hi, Hmeichhe inkhawm leh KTP inkhawm atante hian hman phal tawh ila, nilai zan thunun leh lak luh hi inrinni zanah a tih theih tho si. SS pawh hi kan bu kan let nasa tawh tho a, Sermon inkhawm atan hman kan phal thei tawh ang em?

Khawvel kohhran than dan kan thlir chuan, liturgycal kohhran aiin charismatic an thangduang zawk. Urhsun hi a tha, khunkhan erawh zo lo a awm theih. Khunkhanna uar nasa ber Roman Catholic kohhran hian thangthar nun an tuar nasa ber. Thangthar nun mila inkhawm dan siam thiam kohhran apiang an thang duang mai a ni. Pulpit rawngbawlnaah hian projector nen power point hman remchanna kan pe thei ve ang em? tihte pawh hi ngaihtuah a hun ve tawh lawm ni?

Hei hi hria ila: Hri leng a ziaawm hunah, tun ang renga kan kal chuan, Pathian biak inkhawm kan pun theih han, camping campaign hmangin innawr phur leh kan tum ang a, thla khat vel chu kan lam luih luih maithei, a lo rei ang a, inkhawm kan tlem leh pharh ang.

Engpawh nise, kan mipuite tuihalna lo tulh tur hian, a dawhthleng kan siam thiam loh chuan, Biak In ropui tak tak kan dinahte hian, inkhawm tur kan hmu tlem tial tial mai thei a ni.

- Lalrinliana Colney